💞എന്റെ കൃഷ്ണ 10 💞

‘ഇത്ര വേഗം എത്ത്യ?😇’

ഞാൻ കോട്ടുവായിട്ട് കൈയൊക്കെ നിവർത്തി ഒന്ന് ഞെരിപിരികൊണ്ടാണ് ചോദിച്ചത്…. എന്തോ വീട്ടിലെ  കട്ടിലിൽ നിന്ന് എണീക്കുന്നത് പോലെ 😆……

‘എന്തുവാടെ ഇത്….നീ രാത്രിയൊക്കെ ഓടിക്കുമ്പോ അരി ഭക്ഷണം ഒന്നും കഴിക്കല്ലേട്ടാ….’  എന്റെ ഉറക്കം കണ്ട് മാമൻ ഒരു ഉപദേശമെന്ന പോലെ പറഞ്ഞ് വണ്ടിയിൽ നിന്നിറങ്ങി…..

‘മ്മ്മ്മ്മ്…… അതല്ലേ മാമാ  ചപ്പാത്തി വെച്ച് താങ്ങുന്നത്…..ചപ്പാത്തി കിട്ടിയില്ലേൽ പൊറോട്ട… അതും ഇല്ലേൽ പച്ചവെളളം…… അപ്പോ പിന്നെ ഉറക്കം എന്നൊരു സാധനത്തിന്റെ ചിന്ത പോലും വരില്ല……😅’

ഞാൻ അതും പറഞ്ഞ് വണ്ടിയിൽ നിന്നിറങ്ങിയതോടെ മാമൻ വണ്ടി ലോക്ക് ചെയ്ത് താക്കോൽ എനിക്ക് തന്നു…

ഞങ്ങൾ വീട്ടിലേക്ക്  നടക്കുന്നതിനിടയിൽ മാമൻ  എന്റെ തോളിലൂടെ കൈയിട്ട്  ചേർത്ത് പിടിച്ചു…..പണ്ട്  പൂരപ്പറമ്പിലും,  സിനിമ കാണിക്കാൻ കൊണ്ടുപോകുമ്പോഴും ഒക്കെ പിടിച്ചിരുന്ന പോലെ…… 😊

മാമനെ നോക്കിയപ്പോൾ  തല താഴ്ത്തി എന്തോ ആലോചിച്ച് നടക്കുന്നത് പോലെ…….

എന്തോ പറ്റിയല്ലോ മാമന്….

‘എന്താണ് KSRTCയെ  രക്ഷിക്കാനുളള വല്ല പരിവാടി ആലോചിക്കേണ? 😅’

ഞാനൊരു ചിരിയോടെയാണത്‌ ചോദിച്ചത്……

‘വണ്ടിക്കിനി  സീ സി  എത്ര ബാക്കിയുണ്ടെടാ……..? ‘

മറുപടിയെന്നോണം എന്നെ നോക്കാതെയാണ് മാമനത്‌ പറഞ്ഞത്.

‘അത്……. അതൊരു പതിനഞ്ചു ലക്ഷം കാണും….. എന്തെ തരാൻ വല്ല ഉദ്ദേശവും ഉണ്ടാ? 😁

‘ഹ്മ്മ്മ്മ് …… 15 ഒന്നും ഇല്ലേലും ഞാൻ എന്റെ പി എഫിൽ നിന്നൊരു 5 ലക്ഷം എടുത്ത്  നിനക്ക് തരാം……നീ എന്നിട്ട് പതിയെ  ഉറക്കം നിന്നുളള ഓട്ടം ഒക്കെ കുറക്കാൻ നോക്ക്…. ചെറിയ പ്രായം അല്ലേടാ നിനക്ക്…….’

ചിരി വരുത്തിയാണ് എന്നോടത് പറഞ്ഞതെങ്കിലും ആ ഉളള്  അറിയാവുന്നത് കൊണ്ട് മാമന്റെ സങ്കടം എനിക്ക് മനസ്സിലായി….

‘ഹിഹി…. ഓഹ് പിന്നെ   ഒരു

‘പി എഫ്’ കാരൻ വന്നേക്കണ് 😆….

മാസം ഒരു ലക്ഷം ഉറുപ്പിക അടുത്ത് ഓട്ടം പോയി കിട്ടുന്നുണ്ട്…….അതിൽ

സീ സി  അടവും കഴിഞ്ഞ് ഒരു അറുപതിനായിരം മിച്ചം  വെക്കാനും പറ്റുന്നുണ്ട്…….അതോണ്ട് പി എഫ് ഒക്കെ അവിടെ കിടക്കട്ടെ….

‘ഡാ അതല്ലടാ…  ഇനി പഴയ പോലെയല്ല……..നിന്റെ ജീവിതത്തിലേക്ക് ഒരു പെണ്ണ് വന്ന് കേറാൻ പോകാ…..

ഇനി  ഇങ്ങനെ ഉറക്കം

നിന്നൊക്കെ…….

അതും  ഇത്രയും ദൂരം……….😒

ഇനി അങ്ങനെ വേണ്ടടാ…. ‘

‘ഹാ ഇതെന്താണിത്‌  ‘മ്യാമന് ‘

പറ്റിയത്…….

ഞാൻ കളിയാക്കുന്ന വിളിച്ചത്‌ കേട്ട്  പുളളിക്ക് ചിരി വന്നെങ്കിലും  പുറത്ത് കാണിക്കാതെ   നടക്കുന്ന കണ്ടപ്പോ എനിക്ക് ചിരി വന്നു 😆…..

ഹിഹി അല്ല പിന്നെ….😅

എന്റെ മാമാ…. നമ്മളീ  വളയം പിടിക്കാൻ   ഇന്നും ഇന്നലെയും തുടങ്ങിയതാണാ…..

ഇങ്ങോട്ട് നടക്ക് എന്റ ചക്കര കുട്ടാ…… 😄ഞാൻ അതും പറഞ്ഞ് പുളളിക്കാരനേം കെട്ടിപിടിച്ച് നടന്നു…..

‘ഹിഹി…. നിന്റൊരു കാര്യം…….

പണ്ട് നിന്റെ അച്ഛൻ അമ്മയെ കല്യാണം കഴിക്കുന്ന സമയത്ത് എങ്ങനെയായിരുന്നോ… അത് പോലെയാ നീ ഇപ്പോ…. അതെ സംസാരവും ചിരിയും ഒക്കെ….. ‘

ഹിഹി…. പിന്നെ ഞാൻ എന്റെ അച്ഛന്റെ പോലെയല്ലേ വരേണ്ടത്…. അല്ലേൽ എന്റെ അമ്മക്കല്ലേ അതിന്റെ മോശം…… ഹിഹിഹി…. 😁

‘കി കി ക്കി…. കിളിക്കല്ലേടാ ചെക്കാ….  എന്ത് പറഞ്ഞാലും കൌണ്ടർ അടിക്ക് മാത്രം കുറവില്ല……😒 ‘

അതും പറഞ്ഞ് എന്റെ കൈ എടുത്ത് മാറ്റി മാമൻ ഇത്തിരി വേഗത്തിൽ തന്നെ നടന്നു……..

“ഹാ പിണങ്ങല്ലെടോ……😅 ഇയ്യാളിതെന്തോന്ന്  പിളളാരെ പോലെ………ടോ  ആനവണ്ടിക്കരാ… നിക്കടോ അവിടെ ……. 😆

ഹൈ അവിടെ നിക്കാനാ പറഞ്ഞെ… ‘

ഞാൻ അതും പറഞ്ഞു  ചിരിച്ചോണ്ട് പിന്നാലെ ഓടി…….

ഞാൻ വരുന്നത് കണ്ടതും  എനിക്ക് പിടിതരാതിരിക്കാൻ  പുളളിയും😂.

വീടിന്റെ ഗേറ്റിനടുത്തെത്തിയപ്പോൾ

ഇറയത്ത് അച്ഛനും മുത്തശ്ശനും ഇരിക്കുന്ന കണ്ടപ്പോഴാണ്  ഞങ്ങൾ മാമനും അനന്തരവനും ആണെന്ന് ഒരു ബോധം വന്നത് 😆…….

അച്ഛനെ ഒടുക്കത്തെ പേടിയാണ് മാമന്….. ചെറുതായിട്ട് എനിക്കും 😇😁…..

വേറൊന്നുമല്ല…..ആരോടെങ്കിലും ഇത്  പറഞ്ഞ് മനുഷ്യനെ നാണം കെടുത്തും… അതന്നെ….

‘ആഹ്  നിങ്ങളെ വിളിക്കാൻ ഫോൺ എടുക്കാൻ അമ്മുവിനോട് പറഞ്ഞുളളു….’അച്ഛൻ അത് പറഞ്ഞ് തീരുന്നതിന് മുന്നേ അമ്മു അകത്ത്‌ നിന്ന് അച്ഛന്റെ ഫോണായിട്ട് എത്തി..

‘ആഹ്…….ദേ വിളിക്കാൻ ഫോൺ എടുത്തപ്പോഴേക്കും എത്തിയോ…. ‘

ഞങ്ങളെ കണ്ടതും അമ്മുവിന്റെ വക ചോദ്യം…….

‘എന്തേ….. എത്തണ്ടേ…… പോയി ചായ എടുക്കാൻ പറയെടി…….’ ഞാൻ അതും പറഞ്ഞ് അവളെയും ഉന്തി തളളി ഹാളിലേക്ക് പോയി…… എന്റെ പുറകെ കേറിയ മാമനോട് മുത്തശ്ശൻ എന്തോ ചോദിച്ചതോടെ  പാവം അവിടെ പെട്ട് പോയി…… 😄

‘അമ്മേ ദേ അച്ചുച്ചേട്ടനും മാമനും എത്തി…. ചായ എടുത്തോ  ‘…….

അമ്മു അതും പറഞ്ഞ് വിളിച്ച് കൂവി……

‘എന്തൊരു ഒച്ചയാടി……മനുഷ്യന്റെ ചെവി പോയി ‘…….ഞാൻ അതും പറഞ്ഞ് അവളുടെ പുറത്ത് പയ്യെ ഒരടിയും കൊടുത്ത് മുറിയിലേക്ക് കേറി…….

ബാത്‌റൂമിൽ കേറി മൂത്രമൊഴിക്കാൻ നിന്നിട്ട് കോപ്പ് തീരണുമില്ല 😑….

കൈയും കാലുമൊക്കെ കഴുകിയൊന്ന് ഫ്രഷായി വന്നതും

കൈയിൽ ജ്യൂസ്‌ ആയി  കിച്ചു മുറിയിൽ നിൽക്കുന്നു…..

എന്താണെന്നറിയില്ല…. അവളുടെ ആ ഗ്ലാസും പിടിച്ചുളള നിൽപ്പ് കണ്ടപ്പോൾ എന്റെ ചുണ്ടിൽ അറിയാതൊരു ചിരി പൊട്ടി ….

ഞാൻ അടുത്തേക്ക് ചെന്നതും ഷാൾ കൊണ്ട് ഗ്ലാസിൽ പറ്റിപ്പിടിച്ചിരുന്ന ഈർപ്പത്തുളളികൾ തുടച്ചുകൊണ്ട്

ചെറുചിരിയോടെ ജ്യൂസ്‌ എനിക്ക് നേരെ നീട്ടി……

‘ആഹ് ജ്യൂസാ 😋…ഇതെന്താപ്പോ ജ്യൂസ്‌ അടിച്ചേ കിച്ചുവേ ‘……

‘ന്റ അച്ചേട്ടാ ആദ്യം ഇത് കുടിച്ചേ…. കിച്ചു പിണങ്ങുന്ന പോലെയത് പറഞ്ഞിട്ട്  ഗ്ലാസ്സ് എന്റെ കൈയിലേക്ക് വെച്ചു തന്നു….

ജ്യൂസിന് നല്ല  തണുപ്പ്….. ഒരു കവിൾ എടുത്തതും   തണുപ്പ് കൊണ്ട്  ഞാൻ കണ്ണൊന്നു അടച്ചു തുറന്നു…

അടിപൊളിയാണെന്ന് കുടിച്ചുകൊണ്ട് തന്നെ ഞാൻ കണ്ണ്കൊണ്ട് കാണിച്ചു…

എന്റെ പെണ്ണ് അതൊക്കെ കൈ  കെട്ടി  ഒരു ചിരിയോടെ നോക്കി നിൽക്കയാണ്…

രാവിലെ അമ്മായി ഒക്കെ കൊണ്ടുവന്ന മാങ്ങ വൈകിട്ട് അടിച്ചതാ….. അച്ചേട്ടനും മാമനും വേണ്ടി മാറ്റി വെച്ചതാ…….

കിച്ചു അത് പറഞ്ഞുകൊണ്ടിരിക്കെ ഞാൻ ബാക്കി അവൾക്ക് നേരെ നീട്ടി…..😊

പെണ്ണിന്റെ കണ്ണുകൾ വിടർന്ന്, വല്ലാത്തൊരു നാണം ആ മുഖത്ത് കണ്ടു…..

കിച്ചു എന്നോട് മുഴുവൻ കുടിക്കാൻ പറയുമെന്ന് കരുതിയാണ്  ഞാൻ ഗ്ലാസ് നീട്ടിയത്… പക്ഷെ തെറ്റിപ്പോയി…

വല്ലാത്തൊരു കൊതിയോടെയാണ് അവളാ ഗ്ലാസ്സ് വാങ്ങിയത്…..

എന്നെ നോക്കി ഒരു കളളചിരിയോടെ ഞാൻ ചുണ്ട് മുട്ടിച്ച് കുടിച്ച ഭാഗം നോക്കി കുടിക്കുന്നത്‌ കണ്ടപ്പോൾ ഒരു കൗതുകം ….😊

ഒരു കവിൾ കുടിച്ചിട്ട് ‘ഇനി അച്ചേട്ടൻ കുടിക്കെന്ന്’ പറഞ്ഞ് അവൾ പിന്നെയും എനിക്ക് തന്നു…..

അല്ലേലും ജ്യൂസ്‌ കുടിക്കാൻ തോന്നിയിട്ടല്ല പെണ്ണ് അത് വാങ്ങിയതെന്ന് എനിക്കറിയാം 😌…

ഞാൻ ബാക്കി കുടിച്ചുകൊണ്ട് മുറിയിൽ നിന്ന് നടന്നതും കിച്ചുവിന്റെ ഇടുപ്പിൽ പയ്യെ കൈ കൊണ്ട് പിച്ചുന്നപോലെ അമർത്തിവിട്ടതും പാവം നിന്നനിൽപ്പിൽ ചാടിപോയി😅…

ഹിഹി….. എന്റെ കൈയിൽ അവൾ പിടിച്ചപ്പോഴേക്കും ഞാൻ വേഗം മുറിയിൽ നിന്ന് പുറത്ത് ചാടി…

ഇല്ലേൽ അവളുടെ കൈയിൽ നിന്ന് നല്ലത് കിട്ട്യാനെ 😆…..

അമ്മുവിനെ സോഫയിൽ  കാണാത്തത്‌ കൊണ്ട് ഞാൻ പയ്യെ ഇറയത്തേക്ക് നടന്നു…..

ചെന്നപ്പോഴുണ്ട് അച്ഛന്റെ അടുത്തിരുന്ന് ഫോണിൽ തോണ്ടുകയാണ്…

അച്ഛനും മുത്തശ്ശനും മാമനും കൂടി നല്ല വർത്താനം….

മാമൻ പെട്ട് ഇരിക്കയാണെന്ന് കണ്ടാൽ തന്നെയറിയാം….. 😅

ഞാൻ ഇറയത്തേക്ക് ചെന്നതും  മാമൻ ജ്യൂസ്‌ കുടിച്ച ഗ്ലാസ്സ് വെച്ചിട്ട് വരാമെന്ന് പറഞ്ഞ് വേഗം  എണീറ്റ്   അകത്തേക്ക് നടന്നു….. ആള് നൈസ് ആയിട്ട് വലിഞ്ഞതാണ്……

‘ആഹ് ഇവിടിരിക്ക് അച്ചുമോനെ…. ‘

എന്നെ കണ്ടതും മുത്തശ്ശൻ ചിരിയോടെ  അടുത്തിരിക്കാൻ ഊന്നു വടി കസ്സേരയിൽ തട്ടി കാണിച്ചു….

പക്ഷെ എനിക്കെന്തോ ഒരു ചമ്മൽ പോലെ…..ഞാൻ ഒന്ന് ചിരിച്ച് തലയാട്ടികൊണ്ട് മന്നിച്ച് നിന്നതല്ലാതെ  പോയില്ല…. 😅

‘ഡാ  പറഞ്ഞത് കേട്ടില്ലേ…. നിന്നെ കാണാൻ കിട്ടണില്ലന്ന മുത്തശ്ശന്റെ പരാതി…  ഇവിടെ വന്നിരിക്ക്…’

അച്ഛന്റെ ശബ്ദം പൊങ്ങിയതും ഞാൻ വേഗം ചെന്ന് നിലത്തിരുന്നു…ഗ്രാനൈറ്റ് ഇട്ട തറയിലിരിക്കാൻ ഒരു സുഖം.

വല്ലാത്തൊരു വാത്സല്യത്തോടെയാണ് മുത്തശ്ശൻ ഓരോ കാര്യവും ചോദിക്കുന്നത്…. അച്ഛന്റെ അച്ഛനെ കണ്ട ഓർമ ഇല്ല… അപ്പുപ്പൻ  മരിച്ചതോടെ അമ്മുമ്മയെ അമ്മയുടെ മൂത്ത ചേച്ചി കൊണ്ടുപോയി… അതോടെ  അമ്മയുടെ  വീട്ടിലേക്കുളള പോക്കും കുറഞ്ഞു… പക്ഷെ ഇപ്പോൾ  മുത്തശ്ശനോട് സംസാരിക്കുമ്പോൾ മനസ്സിൽ വല്ലാത്തൊരു സന്തോഷം… എപ്പോഴും കുഞ്ഞുങ്ങളുടെ പോലുളള ചിരിയോടെയാണ് മുത്തശ്ശൻ സംസാരിക്കുന്നത്……

അപ്പോഴാണ് അടുക്കളയിൽ നിന്ന് അമ്മയും അമ്മായിയും ഇറയത്തേക്ക് വന്നത്….. അമ്മായി കൈയിൽ ചിപ്പ്സ് ആയിട്ടാണ് ചവിട്ട് പടിയിൽ വന്നിരുന്നത്…… അതിന് എപ്പോഴും എന്തെങ്കിലും ഇങ്ങനെ കൊറിച്ചുകൊണ്ടിരിക്കണം 😅….

‘കൃഷ്ണമോള് എവിടെ ‘  അച്ഛൻ ചോദിച്ച് കഴിഞ്ഞതും ട്രേയിൽ കാപ്പിയും കൊണ്ട് ആളെത്തി …..

‘അമ്മേ മധുരം കുറച്ചെ ഇട്ടിട്ടുളളു…..’

ആഹ് അത് നന്നായി….കഴിഞ്ഞ ടെസ്റ്റിന്  അച്ഛന് ഷുഗർ കുറച്ച് കാണിച്ച് മോളെ…..അമ്മ അതും പറഞ്ഞ് കിച്ചുവിന്റെ കൈയിൽ നിന്ന് ട്രേ വാങ്ങി കാപ്പി എല്ലാവർക്കും തന്നു……

കിച്ചുപെണ്ണ് ഗ്ലാസ്സ് വാങ്ങി  നേരെ   അമ്മായിയുടെ അടുത്ത് വന്നിരുന്നു……പാവം…എന്റെ ഒരു കൈ അകലത്തിലാണ് വന്നിരുന്നത് 😇…..എന്നിട്ട് കണ്ണ്കൊണ്ട് ഒരു കാണിക്കലും… എനിക്കത് കണ്ട് ചിരി വന്നെങ്കിലും കാപ്പി ചുണ്ടിൽ വെച്ച് അഡ്ജസ്റ്റ് ചെയ്തു….

“എനിക്കില്ലേ….. “മാമൻ കുളിച്ച് ഡ്രസ്സ്‌ മാറി തലയും തോർത്തികൊണ്ടാണ് അതും പറഞ്ഞ് ഇറയത്തേക്ക് വന്നത്…

‘ദേ ഇരിക്കണ്…. വേണോങ്കിൽ എടുത്ത് കുടിക്ക്…. ‘അമ്മായിയുടെ വർത്താനം കേട്ട് കിച്ചു ചിരിക്കയാണ്… 😅

അമ്മായിയും ഞാനും മാമനെ ഇടക്ക് നന്നായി തന്നെ കളിയാക്കുന്നത് കൊണ്ട് ഞങ്ങൾക്ക് പ്രേത്യകിച്ച് ചിരിയൊന്നും വന്നില്ല…

മാമൻ പാവം ഒരു മൂലക്ക് പോയിരുന്ന് കാപ്പി കുടിക്കാൻ തുടങ്ങി…….

എനിക്ക് എന്തോ നാളെ കിച്ചുപെണ്ണിനെ കോച്ചിങ് സെന്ററിൽ ചേർക്കുന്ന കാര്യം ഇപ്പോൾ പറയണമെന്നൊരു തോന്നൽ….😇

ശ്യോ പക്ഷെ അച്ഛന്റെ ഒരു നോട്ടം ഉണ്ട്,എനിക്കൊരു തീരുമാനം ഒക്കെ   എടുക്കാനുളള ബോധം വന്നോ ദൈവമേ എന്നർത്ഥത്തിൽ 😐 അതാണ് സഹിക്കാൻ പറ്റാത്തത്….

അമ്മയും അമ്മായിയും ഒക്കെയുളളത്‌ കൊണ്ട് ഒരു സമാധാനം……

എല്ലാവരെയും നോക്കിയപ്പോൾ  ഭയങ്കര വർത്താനം… ചിപ്പ്‌സിന്റെ പാക്കറ്റ് ഇപ്പോ അമ്മുവിന്റെ കൈയിലാണ്…. അമ്മായിയുടെ ഇരുവശത്തുമായി   കിച്ചുവും അമ്മയും കൂടി  ഇൻസ്റ്റാഗ്രാമിൽ ഓരോ വീഡിയോയും കണ്ടിരിക്കുകയാണ്…..

പെട്ടെന്നാണ് കറന്റ് പോയത്……

‘ദേ പോയി….. ഇനി ഇന്ന് വരോന്ന് ദൈവത്തിന് അറിയാം….. ‘അമ്മ അത് പറഞ്ഞതും കിച്ചു മെഴുകുതിരി എടുക്കാമെന്ന് പറഞ്ഞ് എണീറ്റു….

‘അവിടിരിക്ക് പെണ്ണെ… കറന്റ് വരുമ്പോ വരട്ടെ….കുറച്ച് നേരം വെട്ടം വേണ്ട….’ അമ്മായി അതും പറഞ്ഞ് കിച്ചുവിനെ പിടിച്ച് അടുത്തിരുത്തി…..

ഇത് തന്നെ അവസരം….

അമ്മയോടെന്നപോലെ  നൈസ് ആയിട്ട് കാര്യം പറയാം…..

‘അമ്മേ നാളെ കൃഷ്ണയെ നെറ്റ് എക്സാമിന് വേണ്ടി  കോച്ചിങ് സെന്ററിൽ ചേർത്താലോ എന്ന്….’

ഞാൻ അത് പറഞ്ഞതും എല്ലാവരും സൈലന്റ് ആയി…..

ദൈവമേ ഇതെന്ത് പാട്…. അതും ആലോചിച്ച് മിഴിച്ച് നിന്നപ്പോഴാണ് അമ്മ കാര്യം തിരക്കിയത്‌…..

‘ഡാ അത് എന്തിന്റെ കോച്ചിങ് ആണെടാ …. മോളൊന്നും പറഞ്ഞില്ലല്ലോ എന്നിട്ട്….’

അമ്മയുടെ ചോദ്യം പെട്ടെന്ന് കിച്ചുവിനോടായി…..

കിച്ചുപെണ്ണിന് ഇതൊന്നും അറിയില്ലെന്ന് അമ്മക്ക് അറിയില്ലലോ…. വേഗം ഞാൻ ഇടപെട്ട് കാര്യം പറഞ്ഞു….

അത് അമ്മേ  കൃഷ്ണക്ക്  അഡ്മിഷൻ കാര്യം ഒന്നും അറിയില്ലായിരുന്നു.. ഞാൻ നാളെ പറയാമെന്ന് കരുതിയിരുന്നതാ…..

‘ആഹ അത്ശെരി  ദേ മോന് കാര്യവിവരം ഒക്കെ വെച്ച് തുടങ്ങിട്ടാ….. ‘ അമ്മായിയുടെ ഡയലോഗ് കേട്ടതും എനിക്ക് ചെറിയൊരു ചിരി വന്നു……

‘ആഹ് നന്നായി…..പക്ഷെ ഇതിന്റെ കൂടെ പി എസ് സി കൂടി നോക്കിയാൽ നന്നായിരിക്കും…. അല്ലേ മോളെ…. ‘

‘അത്,    ആഹ് അച്ഛാ…. ‘

അച്ഛൻ പറഞ്ഞത് കേട്ട്  കിച്ചു വെപ്രാളതോടെ മറുപടി പറയുന്നത്‌ കേട്ടപ്പോൾ ഒരു രസം തോന്നി 😊….

പാവം അതിന്റെ കണ്ണ് മിഴിച്ചുളള  മുഖം ആ ഇരുട്ടിലും എനിക്ക് കാണാം….

‘മോൾക്ക്  വല്ല്യ ആഗ്രഹം ആയിരുന്നു ഇത്….. അവിടെന്ന് ഇവിടേക്ക് വന്നപ്പോ  ട്യൂഷൻ എടുക്കലും നിന്നു…. അതോടെ എന്റെ മോളുടെ ആഗ്രഹം  ഇല്ലാതായി എന്ന കരുതിയത്……

പക്ഷെ ഇപ്പോ ….  ‘

മുത്തശ്ശൻ അത്  പറഞ്ഞതും അച്ഛൻ ഇടപെട്ടു……

‘അച്ഛാ, കൃഷ്ണയെ എന്റെ മോന്റെ പെണ്ണായിട്ടല്ല കണ്ടത്… എന്റെ മോളായിട്ട…….’

അച്ഛന്റെ വാക്കുകൾ കേട്ടിട്ടാകണം പയ്യെ എന്റെ കൈയിൽ കിച്ചു പിടിച്ചത്…. ഞാനും അവളുടെ കുഞ്ഞികൈയിൽ മുറുക്കെ പിടിച്ചു…

‘ഡാ നാളെ പോകാൻ ഒക്കെ  കൈയിൽ പൈസ ഉണ്ടോടാ…… ‘

അച്ഛൻ പെട്ടെന്നുളള ചോദ്യമാണ് ഞങ്ങളെ ഉണർത്തിയത്…… കിച്ചു വേഗം കൈ വിട്ടു….

‘ആഹ്  ഓട്ടകാശ്  കൈയിലുണ്ട്… ‘

‘മ്മ്മ്… ‘

ഒരു മൂളലോടെ അച്ഛൻ സംസാരം അവസാനിപ്പിച്ചു…… പതിയെ എല്ലാവരും മറ്റു വർത്താനങ്ങളിലേക്ക് പോയപ്പോളും

നാളെ ചെയ്യേണ്ട കാര്യങ്ങളെ കുറിച്ചായി എന്റെ ചിന്ത….. ചെറിയൊരു വെപ്രാളം പോലെ….😇

‘അളിയാ ഇവിടെ സ്ഥിരം കറന്റ് പോക്ക് ഉണ്ടോ….. ‘മാമൻ അച്ഛനോട് ചോദിച്ചു തീരുന്നതിന് മുന്നേ കറന്റ് വന്നു….. എല്ലാവർക്കും പെട്ടെന്ന് വെട്ടം കണ്ടപ്പോൾ കണ്ണ് തുറക്കാൻ പറ്റാത്ത അവസ്ഥ….. കണ്ണ് ചിമ്മിച്ച് പയ്യെ വെളിച്ചത്തെ ഉൾകൊണ്ടു……

അമ്മ ഗ്ലാസുകൾ എല്ലാം എടുത്ത് അടുക്കളയിലേക്ക് നടന്നു….. പിന്നാലെ ഓരോരുത്തരായി അകത്തേക്ക് പോയി….അമ്മ കഴിക്കാൻ വിളിക്കുന്നത് വരെ ഞാനും മാമനും അച്ഛനും മുത്തശ്ശനും കൂടി വർത്താനം പറഞ്ഞിരുന്നു……

എന്തോ….. ഈ ലോകത്ത് ഏറ്റവും സമാധാനമുളള മനുഷ്യൻ മുത്തശ്ശൻ ആണെന്ന് എനിക്ക് തോന്നി…….😊

മുത്തശ്ശന് മരുന്ന് കഴിക്കണ്ടത്‌ കൊണ്ട് ഫുഡ് കഴിച്ചു  കഴിഞ്ഞ് അച്ഛൻ വേഗം കിച്ചുവിനെയും മുത്തശ്ശനെയും  കൊണ്ടുപോയി ആക്കി…..അമ്മായിക്ക് അമ്മുവിനെ കിട്ടിയിട്ട് കൊതി തീരാത്ത പോലെയാണ് അടുത്തിരുത്തി കൊഞ്ചിക്കുന്നത്…

കുറച്ച് നേരം മുറിയിൽ പോയി കിടന്നത് മാത്രം ഓർമയുണ്ട്…. രാവിലെ 6 മണിക്ക് അമ്മായി ചായയും കൊണ്ട് വന്ന് വിളിച്ചപ്പോഴാണ് കണ്ണ് തുറന്നത്…..

‘ഡാ നീ ഇന്നലെ ഉറങ്ങികളഞ്ഞല്ലേ…..

നിന്റെ ലൗ സ്റ്റോറി കേൾക്കാൻ ഞാനും മാമനും കൂടി വന്നപ്പോഴേക്കും നീ നല്ല ഉറക്കം…. ‘

അമ്മായിയുടെ വാർത്താനം കേട്ട് എനിക്ക് ചെറിയ ചിരി വന്നു…… 😄

ആ ചായ കുടിച്ച നേരം കൊണ്ട് ഞാൻ സ്റ്റോറി പറഞ്ഞ് കേൾപ്പിച്ചു…. അല്ല അതിനും മാത്രം വലിച്ചു നീട്ടി പറയാനുളള സ്റ്റോറി എനിക്കും കിച്ചൂനും ഇല്ലലോ 😅……

എല്ലാം കേട്ട് കഴിഞ്ഞ് താടിക്ക് കൈയും കൊടുത്ത് നിൽക്കുന്ന അമ്മായിനെ നോക്കി ഇതൊക്കെ എന്തെന്ന അർത്ഥത്തിൽ ഒരു എക്സ്സ്പ്രെഷനും ഇട്ട് മുണ്ടും തപ്പിപിടിച്ചുടുത്ത് ഞാൻ എണീറ്റു😃..

മേശപ്പുറത്തിരുന്ന ഫോൺ നോക്കിയപ്പോൾ  കിച്ചൂസ്സിന്റെ ഒരു മിസ്സ്‌കോളും,  ‘ഉറങ്ങിക്കോട്ട അച്ചേട്ടാ’ എന്നൊരു  മെസ്സേജും കിടക്കുന്നു  …… ഞാൻ വേഗം തിരിച്ചു വിളിച്ചു…..

ഫോൺ എടുത്ത പാടെ  ചെറിതായൊന്ന്  ചിണുങ്ങിക്കൊണ്ട്  ഇന്നലെ വേഗം ഉറങ്ങികളഞ്ഞല്ലേന്നൊരു ചോദ്യം…..

‘ഹിഹി….കിടന്നതേ ഓർമ്മയുളെളന്റെ കിച്ചുവേ……. ‘

‘മ്മ്മ്മ്….ഇന്നലെ   വിളിക്കും ന്ന് കരുതി…..കുറെ കഴിഞ്ഞിട്ടും വിളിക്കാതായപ്പോഴാ ഞാൻ വിളിച്ചേ… പിന്നെ  മനസ്സിലായി ഉറങ്ങിയെന്ന്…..’

‘ഇന്നലെ കിടന്നത് ഓർമ്മയുളളു കിച്ചൂസ്സേ…… നല്ല ഉറക്കം ഉറങ്ങി…. ‘

‘മ്മ്മ്മ്……. തോന്നി.. അതാ പിന്നേം വിളിക്കാഞ്ഞേ…..

അച്ചേട്ടാ അതില്ലേ ഇന്ന് എപ്പോഴാ കോച്ചിങ് സെന്ററിൽ പോവണ്ടേ……’

ആഹ് ഡി, അത് 9 മണിക്ക് പോയ പോരെ…..അപ്പോ പോകുന്ന വഴി  അമ്മൂസിനേം ആക്കാം…..

‘മ്മ്മ്… ന്നാ അത് മതി അച്ചേട്ടാ……അവളെ എണീപ്പിക്കട്ടെ…. ആഹ് ദേ വേഗം കുളിക്കാൻ നോക്കെട്ടാ….😗’

കിച്ചു അതും പറഞ്ഞ് ഫോൺ വെച്ചു…

പെണ്ണിന്റെ വർത്താനം കേട്ടപ്പോൾ തന്നെ മനസ്സിലായി വല്ലാത്ത സന്തോഷത്തിലാണെന്ന്……

ഞാൻ ചെന്ന്  മാമനെ നോക്കി……

ആള് നല്ല ഉറക്കം….. കുത്തിപ്പൊക്കാൻ നോക്കി അവസാനം ഞാൻ അവിടെ കിടപ്പായി……. 😅

‘ആഹ് രണ്ടും കൊളളാം…..ഡാ അച്ചു നിനക്കൊക്കെ രാവിലെ എണീറ്റ്  ഓടാൻ പൊക്കുടേ….. ഇതിനോട് പറഞ്ഞ് ഞാൻ തോറ്റു….. കിടക്കണ കിടപ്പ് കണ്ടില്ലേ….. ‘അമ്മായി അതും പറഞ്ഞ് റൂമിലേക്ക് വന്ന് മാമന്റെ പുതപ്പ് വലിച്ചു മാറ്റി….

‘ഡീ എന്തോന്നാടി  ഇത്….ഇന്നലെ ഉറങ്ങിയിട്ടുമില്ല…..വല്ലാത്ത ക്ഷീണം..’ അത് പറഞ്ഞപ്പോഴാണ് മാമന് ഞാൻ അടുത്തുണ്ടെന്ന ഓർമ വന്നത് പോലെ പെട്ടെന്ന് ഞെട്ടിയത്…… 😐…….

‘ഏഹ് എന്ത് ക്ഷീണം….? ഞാൻ അത് ചോദിച്ചതും അമ്മായി എന്തോ കളളത്തരം പിടിക്കപ്പെട്ടത് പോലെ വേഗം മുറിയിൽ നിന്ന് പോയി …😊

മാമനെ നോക്കിയപ്പോൾ പുളളി തലയിണ വെച്ച് മുഖം മൂടി കിടക്കുന്നു…… ‘

അപ്പോഴാണ് കാര്യം കത്തിയത്…😇

എനിക്കാണേൽ ചിരിയും വന്നിട്ട് വയ്യ…… ഞാൻ പിന്നെ അവിടെ നിന്നില്ല….  വേഗം നൈസ് ആയിട്ട് എണീറ്റ് എന്റെ  മുറിയിലേക്ക്

നടന്നു….😌

രാവിലെ തന്നെ ഓർത്ത് ചിരിക്കാനുളള വകയായി…..😅

വേഗം കുളിക്കാനുളള പരിവാടി നോക്കി…….കുളി കഴിഞ്ഞ് ഡ്രസ്സ്‌ മാറി വന്നപ്പോഴേക്കും സമയം 8 കഴിഞ്ഞ്…. ഇറയത്ത് ചെന്ന് നോക്കിയപ്പോൾ അച്ഛൻ എത്തിയിട്ടില്ല… മാമൻ കാർ കഴുകി തുടക്കുന്നു……രാവിലെ കേട്ടത്‌ വെച്ച് ചെറുതായിട്ടൊന്ന് വാരാമെന്ന് വിചാരിച്ച് അടുത്തേക്ക് പോയി…..

‘ആഹ് കുളിയൊക്കെ കഴിഞ്ഞാ… ഇപ്പോ ഇത്തിരി മെന വെച്ചിട്ടുണ്ട് നീ..

മ്മ്മ് എന്തായാലും നന്നായി…… ആ പെൺകൊച്ചിന്റെ കൂടെ നടക്കുമ്പോ  ഒരുങ്ങി തന്നെ നടക്കണം……😉’ പുളളി അതും പറഞ്ഞ്  പിന്നെയും വണ്ടി കഴുകാൻ തുടങ്ങി……..

ഇതിപ്പോ മാമനെ വരാൻ പോയി വാ തുറക്കുന്നതിന് മുന്നേ എനിക്കിട്ട്  കിട്ടി…..😶

‘ആഹ് കെട്ടാൻ പോണ പെണ്ണിനൊപ്പം പോകുമ്പോ ആരായാലും കുറച്ച് പൗഡർ ഒക്കെയിടും…. അതിനിപ്പോ എന്താ…….. ‘

‘എന്റ പൊന്നോ…. പറഞ്ഞെന്നെ ഉളളു……ഇതെന്താണ്  നല്ലത് പറഞ്ഞാലും കുറ്റം……… നീ ഒന്ന് പോയെ…’

‘ആഹ് ഞാൻ പോകേണ്….. വല്ലാത്ത ക്ഷീണം 😝പോയി ചായ കുടിക്കട്ടെ 😂……’ഞാൻ അത് പറഞ്ഞതും മാമൻ ഒന്ന് സ്റ്റക്ക് ആയി😅…..

‘ഡാ ഡാ… മതി മതി….നീ  ചെല്ല്…..’

ഹിഹി……മാമൻ നൈസ് ആയിട്ടൊന്ന് ചമ്മി….. 😆…..

‘ആ അതേയ് ഇന്നെങ്ങാനും കഴുകി കഴിയോ….   വണ്ടി ഒന്ന് വേണമായിരുന്നു……..’ഇത്തിരി സ്റ്റൈൽ ആയിട്ട് പോകാമെന്ന് കരുതിയാണ് മാമന്റെ ശകടം ചോദിച്ചത്…..

‘ആഹ് ടാ… ഇറങ്ങുമ്പോഴേക്കും കഴുകി കഴിയും…..’ മാമൻ വണ്ടി കഴുകികൊണ്ട് തന്നെ പറഞ്ഞത് കേട്ട് ഞാൻ അകത്ത് പോയി വേഗം ഫുഡ് കഴിക്കാൻ തുടങ്ങി…….

അമ്മായിയാണ് ഫുഡ് എടുത്ത് തന്നത്….. അമ്മ അടുക്കളയിൽ

പണിയിലായിരിക്കും….. എന്നും  എന്തെങ്കിലുമൊക്കെയായി സ്പെഷ്യൽ കറി അമ്മൂസിന് ഉണ്ടാക്കി കൊടുത്ത് വിടും…….

അതിന്റെ തിരക്കിൽ ആകും……

ഫുഡ് കഴിച്ച് ഒന്നുകൂടി മുറിയിൽ പോയി മുടിചീകി, സ്പ്രേ അടിച്ച് പൈസയുടെ ബാഗും എടുത്ത്  ഇറയത്ത് വന്നിരുന്നു…..കുറച്ച് നാൾ മുൻപ് വരെ എവിടേലും പോകാൻ  കുളി കഴിഞ്ഞ് ഡ്രസ്സ്‌ ഇട്ട് മുടി കൈ കൊണ്ട് രണ്ട് കാണിക്കൽ കാണിച്ച് പോയിരുന്ന ഞാനാണ് ഇപ്പോ ഇങ്ങനെ😑….

‘ആഹ് നിന്റെ തന്തപ്പടി എത്തിയല്ലോ,  ഇങ്ങേർക്ക് ഒന്ന് ചിരിച്ച് നടന്നൂടെടാ..’

അച്ഛൻ ഗേറ്റ് കടന്ന് വരുന്ന കണ്ട് ബക്കറ്റും കപ്പും കൊണ്ട് പിന്നിലേക്ക് പോകുന്നതിനിടയിൽ  മാമൻ എന്നോടായി പറഞ്ഞു…..

‘ആഹ് സ്വന്തം അളിയനല്ലേ…. നേരിട്ട് പറഞ്ഞൂടെ…. ‘അത് കേട്ടതും ഞാനില്ലെന്ന മട്ടിൽ മാമൻ വേഗം പോയി 😆

ഹിഹി…… മാമൻ പറയുന്നതിലും കാര്യം ഇല്ലാതില്ല…. 😅

അച്ഛന്റെ ക്ലബിൽ നിന്നുളള വരവ്വ് അമ്മുവിനെ സ്കൂളിൽ ആക്കാൻ വേണ്ടിയാണ്……എൻഫീൽഡ് ഓഫാക്കി വണ്ടിയിൽ ഇരുന്ന് തന്നെ സെന്റർ സ്റ്റാൻഡിൽ ഇടുന്നതാണ് അച്ഛന്റെ പതിവ്…വയസ്സ് 55 ആയെങ്കിലും  പറയാതിരിക്കാൻ പറ്റില്ല….ഒരൽപ്പം മാസ്സാണ്…

എന്നെ മൈൻഡ് ചെയ്യാതെ ഇറയത്തേക്ക് കേറി വന്ന്ആള്  പത്രം എടുത്ത് വായിക്കാൻ തുടങ്ങി….

‘അച്ഛാ അമ്മുവിനെ  ഞങ്ങൾ പോകുന്ന വഴി ആക്കികോളാം…..’

ഞാൻ പറഞ്ഞത് കേട്ട് അച്ഛൻ ഒന്ന് മൂളിക്കൊണ്ട് പിന്നെയും പത്രം വായന തുടങ്ങി…..

അകത്ത് നിന്ന് കലപില പോലെ വർത്താനം കേട്ടതും അമ്മൂസ് എത്തിയെന്ന് മനസ്സിലായി…..

ഞാൻ വേഗം എണീറ്റ് വണ്ടി തിരിച്ചിടാനായി കാറിനടുത്തേക്ക് നടന്നു…..

‘ഡാ ഇതിനാണോ പോകുന്നെ….. ‘

അച്ഛൻ വിളിച്ചു ചോദിച്ചത് കേട്ട് ഞാൻ തലയാട്ടി…..

‘മ്മ്മ്മ്… ബ്രേക്ക് ഒന്ന് ചവിട്ടി നോക്കിയിട്ടൊക്കെ എടുത്താ മതി…… ‘

അതും പറഞ്ഞ് ആള് പത്രത്തിന്റെ പേജ് മറി ച്ചു….മാമൻ ഇപ്പോ അടുത്തുണ്ടായെങ്കിൽ എനിക്ക് കേൾക്കാൻ മാത്രം സൗണ്ടിൽ അച്ഛനെ  എന്തെങ്കിലും പറഞ്ഞാനെ 😂…..

ഞാൻ വണ്ടി തിരിച്ചിട്ട് വണ്ടിയിൽ തന്നെയിരുന്നു…. പഴയ കാസറ്റ് ഇടുന്ന സെറ്റ് ഒക്കെ കാണുമ്പോൾ ഒരു കൗതുകം…. ആകെ മൊത്തം ഒരു വിന്റെജ്  ഫീൽ ആണ്….. ഓരോ കാര്യവും നോക്കിയിരുന്നപ്പോഴാണ് അമ്മൂസ് വന്ന് മുന്നിൽ കേറിയത്…….

എന്നെ കാണിക്കാൻ ആയി അവളുടെ പല്ല് കാട്ടിയുളള  ഒരു ചിരിയുണ്ട് 😊

‘കിച്ചേച്ചി  റെഡി ആയില്ലേടാ….. ‘

പെണ്ണിനെ കാണാത്തത് കൊണ്ട്

ഞാൻ  അമ്മൂസ്സിനോട്‌ ചോദിച്ചതും മുത്തശ്ശനെ കൈയിൽ പിടിച്ചു നടത്തികൊണ്ട് കിച്ചു മുറ്റത്തെത്തി…..

മുത്തശ്ശനെ വീട്ടിൽ ആക്കിയില്ലേൽ അവൾക്കൊരു സമാധാനം കിട്ടില്ലെന്ന്‌ എനിക്കറിയാം….. പിന്നെ രാവിലെ എണീറ്റ് ആഹാരം വരെ ഉണ്ടാക്കണം… ഇതെല്ലാം കഴിഞ്ഞ് വേണം വരാൻ…. പാവം….

അമ്മായി എന്തൊക്കെയോ കിച്ചുപെണ്ണിനോട് പറഞ്ഞ് ചിരിക്കുന്നുണ്ട്….. അമ്മ എല്ലാം എടുത്തിട്ടില്ലേയെന്ന് ചോദിച്ചിട്ടാകണം കിച്ചു ഹാൻഡ് ബാഗ് തുറന്ന് ഒന്നുകൂടി എല്ലാം നോക്കിയത്..കുറച്ച്  കഴിഞ്ഞപ്പോ അമ്മായിയും കിച്ചുവും കൂടി കാറിനടുത്തേക്ക് വരുന്നത് മിററിലൂടെ ഞാൻ കണ്ടു….

പിന്നിലെ ഡോർ തുറന്ന് കിച്ചു കേറിയിരുന്നതും അമ്മായി എന്റെയടുത്തേക്ക് വന്നു….

‘ഡാ ചെക്കാ , വൈകുന്നേരം ഞങ്ങൾക്ക് പോകേണ്ടതാട്ടാ….

കറങ്ങാൻ പോയി വൈകരുത്…. ‘

അത് കേട്ടതും കിച്ചൂസ്സിന് ചെറിയ ചിരി വന്നു….

എനിക്കും ചിരി വന്നെങ്കിലും ചുണ്ട് കൂട്ടി പിടിച്ചിരുന്നു…… അമ്മു അമ്മായിക്ക് റ്റാറ്റ കൊടുത്തതും ഞാൻ വണ്ടിയെടുത്തു ….

സമയം 9 മണി കഴിഞ്ഞിട്ടുളളു…

‘അച്ചേട്ടാ അവിടെ സർട്ടിഫിക്കറ്റ് കൊടുക്കേണ്ടി വരോ?…… ‘ കിച്ചു ഫയൽ എടുത്ത് എല്ലാം ഒന്നുകൂടി നോക്കികൊണ്ടാണ് എന്നോടത് ചോദിച്ചത്…..

‘ഏയ്യ് അവിടെ സർട്ടിഫിക്കറ്റ് ഒന്നും വേണ്ടി വരില്ലെടി …..വേണേൽ കോപ്പി കൊടുക്കാം……. ‘

‘മ്മ്മ്… ന്നാ അത് മതി അച്ചേട്ടാ….’

അത് പറഞ്ഞ് ഫയൽ എടുത്ത് വെച്ച് കിച്ചു  പുറത്തെ കാഴ്ചകൾ നോക്കിയിരിപ്പായി….അമ്മു സീറ്റിൽ ചാരിക്കിടക്കുകയാണ്…..

ഇവളുടെ മേത്ത് എല്ല് ഇല്ലേയെന്നൊരു സംശയം……സോഫയിൽ

ഇരിക്കേണെങ്കിലും വളഞ്ഞു കൂടി ഒരു പ്രേത്യേക രീതിയിൽ ഇരിക്കുന്നത് കാണാം….. 😅

‘ഡീ അമ്മൂസ്സേ  ഉറങ്ങ്യാ ‘…..

അനക്കമൊന്നും കാണാത്തത് കൊണ്ട് പതിയെ വിളിച്ചു നോക്കി…..

‘മ്മ്മ്മ് ഉറങ്ങി…. എന്നെ സ്കൂൾ എത്തുമ്പോൾ വിളിച്ചാ മതി… ‘

‘മ്മ്മ്മ്മ്…….ഒന്ന് മൂളിക്കൊണ്ട് വണ്ടി ഒന്ന് ചവിട്ടി വിട്ടു…….. ‘സമയം വൈകിയിട്ടില്ലെങ്കിലും ചെറിയൊരു ധൃതി പോലെ…..

സ്കൂളിന്റെ മുന്നിലെത്തിയതും  വണ്ടി അൻസാറിക്കാന്റെ കടയുടെ  മുന്നിലായി നിർത്തി…..കടയിലേക്ക് നോക്കിയപ്പോൾ അൻസാറിക്ക  ഷേക്ക്‌ അടിക്കുന്ന തിരക്കിലാണ്….

നൂറിത്ത ആരെയോ നോക്കി നിൽക്കുന്നുണ്ട്… അമ്മു കാറിൽ നിന്നിറങ്ങിയതും അവിടവിടെയായി നിൽക്കുന്ന കോഴിക്കൂട്ടം വായിനോക്കുന്നതൊക്കെ കാണാം😅.

അമ്മുവിനെ കണ്ടിട്ടാകണം നൂറിത്ത കാറിനുളളിലേക്ക് നോക്കിയത്……

ഞങ്ങളെ കണ്ടതും ആള് വേഗം വന്നു..

‘ദേ ഇക്കാ ഇതാരൊക്കെയാന്ന് നോക്ക്യേ…….. ‘ഇത്ത വിളിച്ചു പറഞ്ഞത് കേട്ട് ഇക്ക ഞങ്ങളെ നോക്കിയെങ്കിലും തിരക്ക് കാരണം ചിരിച്ചുകൊണ്ട് ഇപ്പോ വരാമെന്ന് ആക്ഷൻ കാണിച്ചു…..

‘ഇത്ത  ഇതാരെ നോക്കി നിക്കേണ്…..

ഇക്ക  അവിടെ ഓടി നടന്ന് പണിയെടുക്കുമ്പോ ഇങ്ങളിത് കാഴ്ച കണ്ട് നിന്നോ…… ‘

‘എന്റ അച്ചുവേ… ആബിത്താനെ നോക്കി നിന്നതാ ന്റ മോനെ…..

9മണിക്ക് വരേണ്ട കട്ട് ലെറ്റ് ഇപ്പോഴും എത്തീട്ടില്ല….. ഓള് ഇതെവിടെ പോയെന്നാവോ…… ‘

‘ആഹ് അതാണാ ഇത്ത പ്രശ്നം……. ദേ നിക്കണ കോഴികുഞ്ഞുങ്ങളെ പിടിച്ച് കട്ട് ലെറ്റ്‌ ആക്ക്ന്ന് ഇങ്ങള്… 😂’

അവിടെ വായീനോക്കി നിക്കുന്ന  കുറച്ചവൻമാരെ നോക്കി പറഞ്ഞതും ഇത്ത ചിരിയായി…. 😅

അല്ല പിന്നെ….സ്കൂളിൽ പഠിക്കുന്ന പിളേളരാണ് ഇങ്ങനെ നിക്കുന്നതെങ്കിൽ  പോട്ടെന്ന് വെക്കാം…ഇത് ഒരു പണിക്കും പോകാതെ  ഒരു ബൈക്കും എടുത്ത് രാവിലെ തന്നെ ഇറങ്ങിക്കോളും കുറെയെണ്ണങ്ങൾ ….

‘ആഹ് ഒരീസം എല്ലാത്തിനേം പിടിച്ച് ഞമ്മള് ഇറച്ചി പത്തിരി ഇണ്ടാക്കും….

എല്ലാ ദിവസോം ഒരു മിനിറ്റ് പോലും വൈകാതെ  കൃത്യമായിട്ട് വന്നോളും…….’   ഇത്തയുടെ വർത്താനം കേട്ട് കിച്ചുവും  അമ്മൂസ്സും ചിരിയാണ്😅

ഹിഹി…..അത്  ഞാൻ നിർത്തിച്ച് തരാ ഇത്താ……..പുതിയ ടൗൺ എസ് ഐ നമ്മടെ കൂട്ടുകാരനാണ്….

അക്കുവിനോട് ഈ കാര്യമൊന്ന് മറക്കാതെ  പറയണമെന്ന് മനസ്സിൽ ഉറപ്പിച്ചു….. കാര്യം  ഇവിടെ നടക്കുന്നത്  ഇന്നും അന്ന്യം നിന്ന് പോകാത്ത കലാരൂപം ആണെങ്കിലും എന്റെ കൊച്ച് അവിടെ പഠിക്കുമ്പോ  ആ കലാരൂപം അവിടെ ആടണ്ടാ…😅

‘എന്ന ഞാൻ പോകാൻ നോക്കട്ടെ….’

അമ്മു അതും പറഞ്ഞ് എനിക്കും കിച്ചുവിനും റ്റാറ്റയും തന്ന് സ്കൂളിലേക്ക് നടന്നതും,  അമ്മു പോകാൻ കാത്തിരുന്ന പോലെയാണ് കിച്ചു പിന്നിൽ നിന്നിറങ്ങി മുന്നിലേക്കിരുന്നത്‌…… എന്തോ വല്ല്യ കാര്യം നേടിയപോലെയാണ് എന്നെ നോക്കി പെണ്ണിന്റെ ചിരി….

അപ്പോഴാണ് ഒരു യുദ്ധം കഴിഞ്ഞത് പോലെ അൻസാറിക്ക വന്നത്……

‘ഒന്നും പറയണ്ടടാ മോനെ….. രാവിലെ തുടങ്ങിയ പണിയാണ്….

എന്നാലോ  ഒറ്റണം  പൈസ തരില്ല… പറ്റിലെഴുതിക്കോന്ന് പറഞ്ഞൊരു പോക്കാണ്…….

അല്ല ഇതാണല്ലേ നിന്റെ മൊഞ്ചത്തി..’

അൻസാറിക്ക കിച്ചുവിനെ നോക്കി പറഞ്ഞതും പെണ്ണിന് ചിരി വന്ന് ഒരു വഴിയായി…..

ഞാനും ഇക്ക പറഞ്ഞത് കേട്ട് ചിരിച്ചതല്ലാതെ  മറുപടി ഒന്നും പറഞ്ഞില്ല….

‘ഇതെങ്ങോട്ടാ രണ്ടാളും കൂടി…..

ഇത്തയുടെ വിചാരം ഞങ്ങൾ കറങ്ങാൻ പോകാനുളള പരിവാടി ആണെന്നാണ്….അത് ആ ചോദ്യത്തിൽ നിന്ന് തന്നെ മനസ്സിലായി…….

പക്ഷെ കിച്ചു വേഗം കാര്യം പറഞ്ഞു…..വളരെ ഫ്രീയായാണ് പെണ്ണ് ഇക്കാനോടും ഇത്തയോടും സംസാരിച്ചത്…..

‘ന്നാ ഇങ്ങടെ കച്ചോടം നടക്കട്ടെ…. ഞങ്ങള് പോകാൻ നോക്കട്ടെ  എന്ന ‘

ഞാൻ അതുംപറഞ്ഞ് വണ്ടി സ്റ്റാർട്ട്‌ ആക്കി…. കിച്ചു യാത്ര പറഞ്ഞതോടെ വണ്ടിയെടുത്തു……..

ഒരു അരമണിക്കൂറിൽ ഞങ്ങൾ തിരികെ ടൗണിൽ എത്തി…. ഒരു വലിയ  കോളേജ് ബിൽഡിംഗ്‌ പോലെ തന്നെയുളള കെട്ടിടമാണ് ‘കലാം ഇൻസ്റ്റിറ്റ്യൂഷൻ’…ഡിഗ്രി  മുതൽ സിവിൽ സർവീസിനു വരെ അവിടെ കോച്ചിങ് ഉണ്ട്…….

കാർ  നേരെ കോംബൗണ്ടിലേക്ക് കേറ്റി….ആദ്യമായിട്ടാണ് ഞാൻ അതിന്റെയുളളിൽ കേറിയത്….. അതുകൊണ്ട് ഓഫീസ് എവിടെയാണെന്ന് ഒരു പിടിയുമില്ല….

കുറച്ച് പ്രായം തോന്നിക്കുന്ന ചേച്ചിമാർ  വർത്താനം പറഞ്ഞ് നിൽക്കുന്നത് കണ്ടു………അവരോട് തന്നെ ചോദിക്കാമെന്ന് കരുതി   കിച്ചു ബാഗ് എടുത്ത് ഇറങ്ങിയതോടെ വണ്ടി ലോക്ക് ചെയ്ത് ഞങ്ങൾ അവർക്കരികിലേക്ക് നടന്നു….

‘ചേച്ചി ഇവിടെ ഓഫീസ് എവിടെയാണ്….’

‘ മോനെ ഇവിടെന്ന് നേരെ പോകുമ്പോ ഒരു സ്റ്റെയർ കാണാം.. അതിലൂടെ കേറി ലെഫ്റ്റ് തിരിഞ്ഞ് കാണുന്നതാണ് മെയിൻ ഓഫീസ്…’

‘ആഹ് ശെരി…. താങ്ക് യു ‘ ഒരു നന്ദിയും പറഞ്ഞ് കിച്ചുവിന്റെ കൈയും പിടിച്ച് നേരെ ഓഫീസിലേക്ക് പോയി…..

അകത്തേക്ക് കേറുന്നതിനു മുന്നെ ഒരു 60 വയസ്സ് തോന്നിക്കുന്ന സാരിയുടുത്ത്  കണ്ണടയൊക്കെ വെച്ചൊരു  സ്ത്രീ  പുറത്തേക്ക് വന്നു…..

‘ടീച്ചറെ ഇവിടെ നെറ്റ് എക്സാമിന്റെ കോച്ചിങ്നു  ചേരാൻ വേണ്ടിയാണ്…അപ്പോ ആരെയാ കാണേണ്ടതെന്ന്………….. ‘

ഞാനത് ചോദിച്ചതും അവരൊരു ചിരിയായിരുന്നു……. 😅

‘എടോ ഞാൻ ഇവിടത്തെ സ്റ്റുഡന്റ് ആണ്…… ദാ ആ ക്യാബിനിൽ കേറി പറഞ്ഞാൽ മതിയെന്ന് പറഞ്ഞ്  ഒരു മുറി ചൂണ്ടി കാണിച്ചു തന്നു……

‘അയ്യോ ലുക്ക് കണ്ടപ്പോ ഞാൻ കരുതി ടീച്ചർ ആണെന്ന്…. സോറിട്ടാ .. അല്ല, എന്തിനാ പഠിക്കുന്നെ…… ‘

ചെറുതായിട്ട് ചമ്മിയെങ്കിലും ഞാൻ നൈസ് ആയിട്ട് സംസാരിച്ചു……

‘ആഹ് ഞാൻ ഇവിടെ ‘മാസ്റ്റർ ഓഫ് സോഷ്യൽ വർക്ക്സ്’ ആണ് ചെയ്യുന്നത്…’

‘ ആഹ് ഓക്കെ  ശെരി എന്ന…….താങ്ക്സ് ‘…

അവർ  ബൈ പറഞ്ഞ് പോയതോടെ കിച്ചു എന്നെ കളിയാക്കുന്ന പോലെ വാ പൊത്തി ചിരി തുടങ്ങി…….

‘ഡീ സത്യായിട്ടും അവരെ കണ്ടാ ടീച്ചർ ആണെന്നല്ല പറയു.. ‘

‘ഹിഹി……എന്തായാലും ചമ്മിയില്ലേ അച്ചേട്ടൻ… 😄’

‘ഹ്മ്മ്മ്മ്………പത്താംക്ലാസ്സിലെ ഹെഡ് മിസ്ട്രസ് ആയിരുന്ന  ലക്ഷ്മിക്കുട്ടി ടീച്ചറെ പോലെ തോന്നി…….

ആഹ് വാ വാ…. അവിടെ ചെന്ന് ചോദിക്കാം…. ‘

അങ്ങനെ നേരെ ചെന്ന് അഡ്മിഷൻ കാര്യം സംസാരിച്ചു…..നല്ലൊരു മരിയാദയുളള മനുഷ്യൻ…..വളരെ സാവകാശം കാര്യങ്ങൾ സംസാരിച്ചു.

‘നെറ്റ് ബാച്ചിൽ വരുന്നവരെ മെയിൻ ആയിട്ട്  എക്സാമിന് തയ്യാറെടുപ്പിക്കലാണ് പ്രധാനം….’

ക്ലാസ്സിന്റെ കാര്യമൊക്കെ പറഞ്ഞ് കഴിഞ്ഞതും അഡ്മിഷനു വേണ്ടിയുളള ആപ്ലിക്കേഷൻ പൂരിപ്പിക്കാനായി തന്നു ….

പക്ഷെ കിച്ചു ഫോം പൂരിപ്പിക്കാതെ എന്നെയൊന്ന് നോക്കി…..

ഞാൻ കണ്ണുകൊണ്ട് എന്തായെന്ന് ചോദിക്കുന്ന പോലെ കാണിച്ചതും

കിച്ചു കാര്യം സാറിനോട് ചോദിച്ചു..

‘സാർ ഫീസ് എത്രയാണ്….’

‘ ഫീസ് 40000 രൂപയോളം വരും…..

പക്ഷെ അതിലൊന്നും പേടിക്കണ്ട….

6 മാസം കൊണ്ട് അടച്ചാൽ മതി… ഇപ്പോ ഒരു 5000  ബാങ്കിൽ പോയി ചലാൻ വഴി അടച്ച് അതിന്റെ റെസിപ്പ്റ്റ് ഓഫീസിൽ തന്നാൽ അഡ്മിഷൻ പ്രൊസെസ്സ്  കഴിഞ്ഞു……’

‘ആഹ് ഫീസ് വേഗം തന്നെ  അടക്കാം സാർ…… അതിലൊന്നും പ്രശ്നമില്ല….

ഞാൻ അതും പറഞ്ഞ് കിച്ചുവിനോട് ഫോം ഫിൽ ചെയ്യാൻ  പറഞ്ഞു……. ‘

ഓഫീസിൽ  നിന്ന് ഇറങ്ങി നടന്നുകൊണ്ടിരിക്കെ ഏതോ ഒരു ബാച്ചിന്റെ ക്ലാസ്സ്‌ കഴിഞ്ഞ് പല പ്രായത്തിലുളളവരുടെ  തിരക്കായി ആ വരാന്തയിൽ മുഴുവൻ….. കുറച്ച് പേർ ബാഗും തൂക്കി ഓടുന്നത് കാണാം….. ജോലിക്ക് പോകേണ്ടവരായിരിക്കും……

പതിയെ നടന്നു കാറിൽ കേറിയിരുന്നു……

‘എന്താടി മുഖം വല്ലാതിരിക്കുന്നെ….. ‘

കാര്യം എനിക്ക് മനസ്സിലായെങ്കിലും സീറ്റ്‌ ബെൽറ്റ്‌ ഇടുന്നതിനിടയിൽ  ഞാൻ ചോദിച്ചു….

‘അച്ചേട്ടാ ഫീസ്…………’

ഒന്ന് മടിച്ചുകൊണ്ട് കിച്ചു പറഞ്ഞത്‌ കേട്ടതും ഞാൻ അവളെയൊന്ന് നോക്കി …… അത് കണ്ടതും പെണ്ണ് മുഖത്ത് നോക്കാതെ നേരെ നോക്കി ഒറ്റയിരുപ്പ്…….

എനിക്ക് അവളുടെ ആക്ഷൻ കണ്ടിട്ടിട്ട് ചിരി വന്ന് പോയി 😊……

എന്റെ ചിരി കണ്ടതും ഗിയർ ലിവറിൽ പിടിച്ചിരുന്ന എന്റെ കൈയിൽ അവൾ പയ്യെ  രണ്ട് കൈകൊണ്ടും ചുറ്റിപിടിച്ച് തോളിലേക്ക് തല ചായ്ച്ചു…….

‘എന്തിനാടി  ഫീസിന്റെ കാര്യം ഓർത്ത് വിഷമിക്കുന്നെ….’

ഞാൻ ചോദിച്ചിട്ടും ഒന്നും മിണ്ടാതെ  എന്റെ കൈയിൽ പറ്റിച്ചേർന്നു തന്നെ ഇരിക്കയാണ് കിച്ചു…..

‘നമുക്ക് ആദ്യം ബാങ്കിൽ പോയി ഫീസ് അടച്ചിട്ട്  സഫയറിൽ പോയി ബിരിയാണി കഴിക്കാം…….. ‘

കിച്ചൂസ്സിന്റെ തലയിൽ പയ്യെ മുഖം ചേർത്ത് പറഞ്ഞതും പെണ്ണ് ചാടി എണീറ്റു….

‘പിന്നെ വീട്ടിൽ അമ്മായീം മാമനും  ഓക്കെ ഉളളപ്പോളാ പുറത്ത് പോയി കഴിച്ചിട്ട് ചെല്ലുന്നേ……. ‘

കിച്ചു പിണങ്ങുന്ന പോലെയത്  പറഞ്ഞപ്പോഴാണ് ഞാനും അതേപറ്റി ചിന്തിച്ചത്……

‘മ്മ്മ്മ്മ്… അപ്പോ വേണ്ടാലേ…. എന്ന ബാങ്കിൽ പോയി നേരെ വീട്ടിലേക്ക് പോകാം…… ‘ഞാനത് പറഞ്ഞതും

പെട്ടെന്നാണ് എനിക്കൊരു സംഭവം ഓർമയിലേക്ക് വന്നത്……  കഴിഞ്ഞ വർഷം അപ്പുപ്പൻ മരിച്ച സമയത്ത് വീട്ടിൽ എല്ലാവരും പച്ചക്കറി ഒക്കെയായിരുന്നു….

പക്ഷെ ഞാനും മാമനും ആരുമറിയാതെ  മോഹനേട്ടന്റെ ചായക്കടയിൽ പോയി  സവാളവടയും ബീഫും തട്ടും… എന്നിട്ട് ഒന്നുമറിയാത്ത പോലെ വീട്ടിൽ വന്നൊരു ഇരിപ്പുണ്ട് 😅…..

‘അച്ചേട്ടാ ഇതെന്താ ചിരിക്കണേ….. ‘

കിച്ചു വിളിച്ചപ്പോഴാണ് ഞാൻ ഓർമകളിൽ നിന്ന് മടങ്ങിയെത്തിയത്…….

‘ഒന്നുല്ല എന്റെ പെണ്ണെ…….. ‘ അതും പറഞ്ഞ് ചിരിച്ചോണ്ട് ഞാൻ വേഗം വണ്ടിയെടുത്തു…..തൊട്ടടുത്ത് തന്നെ  എസ് ബി ഐ ബാങ്ക്  ഉളളത്‌ കൊണ്ട് വണ്ടി റോഡ് സൈഡിൽ പാർക്ക്‌ ചെയ്ത്‌ കിച്ചുവിനോട് വണ്ടിയിൽ തന്നെയിരിക്കാൻ പറഞ്ഞ് ഞാൻ വേഗം പൈസയും എടുത്ത് ബാങ്കിലേക്ക് പോയി……

80000 രൂപയിൽ 60000 രൂപ  എന്റെ അക്കൗണ്ടിലേക്കിട്ടു…….ഒരു 10000 രൂപ ഫീസ് ഇനത്തിൽ ചലാൻ വഴി അടച്ചു  റെസിപ്പ്റ്റ് വാങ്ങി…. ഒറ്റയടിക്ക് ഫീസ് അടക്കണ്ടെന്ന് കരുതിയാണ് ആദ്യം പത്ത് അടച്ചത്……..അങ്ങനെ അടച്ചിട്ട് പ്രേത്യേകിച്ച് കാര്യവുമില്ല….ബാക്കി പത്ത് കൈയിലും പിടിച്ചു ഒരു 15 മിനിറ്റിൽ പരിവാടി കഴിഞ്ഞ്

തിരികെ വന്നു………..

‘ഡാ  10000 ഇപ്പോ അടച്ചിട്ടുണ്ട്…

ഇന്നാ റെസിപ്പ്റ്റ് ഇപ്പോ തന്നെ ഫയലിൽ വെച്ചോന്ന് പറഞ്ഞ് റെസിപ്പ്റ്റ് കിച്ചുവിന് കൊടുത്തു….. ‘

സമയം 11 കഴിഞ്ഞു……വേഗം വീട്ടിലേക്ക് വെച്ച് പിടിച്ചു….. വണ്ടിയിൽ ചെറിയ ഫ്രീസർ വെക്കുന്ന കാര്യം ഇന്ന് എന്തായാലും ചെയ്യണം.

അല്ലേൽ ഓട്ടം വന്നാൽ പിന്നെ അതിനൊന്നും സമയം കിട്ടില്ല….

കിച്ചു പുറത്തെ കാഴ്ചകൾ കണ്ടിരിക്കുന്നത് ഇടക്ക് ഇടം കണ്ണിട്ട് നോക്കിയാണ് ഞാൻ വണ്ടിയോടിക്കുന്നത്…..

‘അച്ചേട്ടാ…….. ‘   പെട്ടന്ന് എന്തോ ഓർത്തെന്ന പോലെ കിച്ചു വിളിച്ചു….

‘എന്തോ………. ‘അവൾ വിളിച്ച അതേ ടോണിലാണ് ഞാനും വിളികേട്ടത്….

പക്ഷെ പിന്നെ മൗനമായിരുന്നു മറുപടി……

‘കിച്ചുവേ… കാര്യം പറാ…….. ‘

‘ഒന്നുല്ല അച്ചേട്ടാ….  എന്തോ ഓർത്തു… പെട്ടെന്ന് മറന്ന് പോയി….

‘ഏഹ്….ഹ്മ്മ്… ഇനി വീട്ടിൽ ചെന്നിട്ട്  ഓർക്കാണേൽ അപ്പോ തന്നെ എവിടേലും എഴുതിയിട്ടോ….. ‘

കിച്ചു ഒന്ന്  തലയാട്ടി കാണിച്ചു…… പക്ഷെ പെണ്ണിന്റെ മറവി കഥ ഞാൻ വിശ്വസിച്ചിട്ടില്ലെന്ന് പൊട്ടിക്ക് അറിയില്ല  😅…..എന്തോ പറയാൻ വന്നിട്ട് ഞാൻ പിണങ്ങുമെന്ന് പേടിച്ച് പറയാത്തതാണ്….

‘ഹ്മ്മ്….. എന്നിട്ട്  എഴുതിവെച്ച പേപ്പർ നോക്കാനും മറക്കണം… കേട്ടാ…. 😅…..അത് കേട്ടതും പെണ്ണിന് ചിരി പൊട്ടി….. പിന്നെ ഓരോന്നൊക്കെ പറഞ്ഞ് വേഗം  വീടെത്തി…  ഇറയത്ത് മുത്തശ്ശനെ കാണുന്നില്ല……. ഞാനും കിച്ചുവും അകത്തേക്ക് കേറി……

എല്ലാവരും ഇതെവിടെ പോയെന്നാവോ…… ഞാൻ അമ്മായിയുടെ ഫോണിലേക്ക് വിളിച്ചതും ആള് ഫോണെടുത്തു….

‘ആഹ് എന്താടാ…….. ‘

‘എല്ലാരും കൂടി ഇതെവിടെക്കാ പോയെ…… ‘

‘ആഹ് നിങ്ങൾ എത്തിയോ…. ഞങ്ങൾ ദേ കുളക്കടവിൽ ഇരിപ്പുണ്ടെടാ…. ഇപ്പോ വരാമെന്നു’ പറഞ്ഞ് ഫോൺ കട്ടാക്കി….

അവർ എല്ലാവരും കൂടി കുളത്തിന്റെ അവിടെ പോയേക്കാടി… ഇപ്പോ വരുമെന്ന് പറഞ്ഞ്  സോഫയിലേക്കിരിക്കാൻ പോയ എന്റെ കൈയിൽ കിച്ചു പെട്ടെന്നാണ് പിടിച്ചു വലിച്ചുകൊണ്ട് എന്റെ മുറിയിലേക്ക് പോയത്……. എന്താണ് സംഭവമെന്ന്  ചിന്തിക്കുന്നതിനു മുന്നെ  എന്റെ നെഞ്ചിലേക്ക് മുഖം ചേർത്ത് കേട്ടിപിടിച്ചൊരു നിൽപ്പായിരുന്നു ……

പയ്യെ പെണ്ണിന്റെ ഇടുപ്പിൽ  കൈ വെച്ച് ചേർത്ത് പിടിച്ചതും കാൽവിരലുകളാൽ ഉയർന്നുകൊണ്ട് ഒരു വല്ലാത്ത കൊതിയോടെ  എന്റെ രണ്ട് കവിളിലും നെറ്റിയിലുമെല്ലാം ചുംബനം കൊണ്ട് പൊതിഞ്ഞ്  ഇടത്തെ ചെവിയിൽ ചെറിയൊരു കടിയും തന്ന് ഒരു കളളച്ചിരിയോടെ പെണ്ണ് കൈ വിടുവിച്ച് ഹാളിലേക്ക്

ഓടി…….

പെണ്ണിന്റെ ചുണ്ടുകളുടെ തണുപ്പ് അപ്പോഴും ചെവിയിലുണ്ടായിരുന്നു..

പറഞ്ഞറിയിക്കാൻ കഴിയാത്ത  ഒരുതരം അവസ്ഥയിൽ ഞാൻ കട്ടിലിലേക്ക് വീണു….. ചിരി ഉളളിൽ നിന്ന് വരുന്നപോലെ…

‘ഡാാ…..അച്ചു  ‘

സ്വപ്ന ലോകത്ത് നിന്ന് വീണ പോലെയാണ് മാമന്റെ വിളിയിൽ ഞാൻ ഞെട്ടിയത്…….

‘നീയിത് എന്താണ്  കണ്ണടച്ച് ചിരിച്ച് കിടക്കണേ……പോയ കാര്യം ശെരിയായോ  ‘

‘ അതിന് മറുപടി പറയാതെ ചിരിയോടെ തന്നെ തലയാട്ടി കാണിച്ചുകൊണ്ട് തലയിണയെ കെട്ടിപിടിച്ചു കിടന്നു  ‘

‘നിനക്ക് എന്തോ പ്രശ്നം ഉണ്ടെട്ടാ മോനെ…. ‘ മാമൻ അതും പറഞ്ഞ് കട്ടിലിൽ ചാരിയിരിപ്പായി….

‘ഡാ ഡിപ്പോയിൽ നിന്ന് വിളിച്ചിരുന്നു….  ഒരാഴ്ച ബാംഗ്ലൂർ -കൊച്ചി സർവീസിലേക്ക് ഡ്യൂട്ടി മാറ്റിയെന്ന്…..  അപ്പോ   അമ്മായി ഒരാഴ്ച ഇവിടെ ഉണ്ടാകും…..’

‘ആഹ് അത് നന്നായി……അമ്മായി കൃഷ്ണയായിട്ട് നല്ല കൂട്ടാ…… കുറച്ച് ദിവസം നിക്കട്ടെ ‘

‘മ്മ്മ്…. ഡാ എണീക്ക്…. വീട്ടിൽ പോയി അവളുടെം എന്റെയും  ഡ്രസ്സ് എടുക്കണം….. അപ്പോ ഇന്ന്  വൈകിട്ട് എനിക്ക് ഇവിടുന്ന് പോയ മതിയല്ലോ… ‘‌

‘അയ്യോ അത് പറഞ്ഞപ്പോഴാ എനിക്ക് ഇപ്പോ വണ്ടിയിൽ  ഫ്രീസർ വെക്കാൻ പോകണം…… ‘ഞാൻ അതും പറഞ്ഞ് ചാടി എണീറ്റ് ഡ്രസ്സ്‌ മാറാൻ തുടങ്ങി……

‘ആഹാ അയ്ശെരി….ഇത്രേം നേരം ഇവിടെ മന്നിച്ച് കിടന്നിട്ട് ഇപ്പോഴാണ നിനക്ക് ബോധം വന്നത്…….

ഡാ ഡാ, ആ ഡോർ ചാരിയിട്ട് പാന്റ് ഊരെടാ…….. ‘

‘പണി പാളി 😅…..’ഞാൻ വേഗം ചെന്ന് ഡോർ അടച്ചു…

ഒരു കാവിമുണ്ട് ഉടുത്ത്  കണ്ണാടിയുടെ മുന്നിൽ നിന്ന് ഷർട്ടിന്റെ ബട്ടൻസ് ഇട്ടുകൊണ്ടിരുന്നപ്പോഴാണ് മാമന്റെ വക ചോദ്യം……

“നിനക്ക് നല്ല വേഷത്തിൽ തന്നെ പൊയ്ക്കൂടേടാ….. ഇതിപ്പോ കാക്കിയിട്ട് പോകാൻ ലോഡ് ആയിട്ടൊന്നും അല്ലല്ലോ പോണേ…… ‘

‘ഓഹ് അഹങ്കാരം…… നിങ്ങൾക്ക് നീല യൂണിഫോം കിട്ടിയതിന്റെ അഹങ്കാരം😏….എന്നാലേ ഈ കാക്കിയിട്ട് ഡ്രൈവിംഗ് സീറ്റിലിരുന്ന്

വളയം പിടിക്കുമ്പോ കിട്ടണൊരു

സുഖോണ്ടല്ലോ…. അത് എന്ത് സ്യുട്ടും കോട്ടും ഇട്ട് ഓടിച്ചാലും കിട്ടില്ല…… ‘

നല്ല ഗമയിൽ തന്നെയത് പറഞ്ഞ് ഇത്തിരി സ്പ്രേ കൂടി അടിച്ച് മാമനും ഇത്തിരി അടിച്ച് കൊടുത്ത് 😄….

അടുക്കളയിലേക്ക് പോയതും അമ്മയും കിച്ചൂസും അമ്മായിയും കൂടി നല്ല വാർത്താനം……കാര്യം പറഞ്ഞ് വേഗം  വണ്ടിയുടെ താക്കോലും ഫോണും പൈസയും  എടുത്ത് മുറ്റത്തേക്കിറങ്ങി…..

ഗേറ്റ് അടക്കാൻ നിന്നപ്പോൾ അച്ഛനും മുത്തശ്ശനും കൂടി പറമ്പിൽ നിന്ന് വരുന്നത് കണ്ടെങ്കിലും ഞാൻ കൈപൊക്കി കാണിച്ചുകൊണ്ട് വേഗം റോഡിലേക്ക് നടന്നു……

വണ്ടിയുടെ അടുത്ത് എത്തിയതും കിച്ചൂന്റെ മെസ്സേജ്….

‘എന്തോന്നാ അച്ചേട്ടാ ഒന്നും കഴിക്കാതെ പോയെ……..അമ്മ അടുത്ത് നിന്നത് കൊണ്ടാ… അല്ലേൽ ഞാൻ വിടില്ലായിരുന്നു……..   ‘

ശ്യോ ഇവള്ടെ കാര്യം………

‘എന്റ കിച്ചുവേ ഒട്ടും വിശപ്പില്ലായിരുന്നെടി….. അല്ലേൽ കഴിച്ചിട്ടല്ലേ പോകു…….’ എന്നൊരു റിപ്ലൈയും കൊടുത്ത്  ടയറൊക്കെ നോക്കി, വണ്ടി സ്റ്റാർട്ട്‌ ചെയ്തിട്ടു….

‘മ്മ്മ്മ്മ്….. ‘ അപ്പൊതന്നെ റിപ്ലൈ കിട്ടി….  ഒരു മൂളൽ മാത്രം….

വായിച്ചപ്പോ അത്ര സുഖം തോന്നിയില്ല 😅….കഴിക്കാതെ പോന്നത് ഇഷ്ട്ടായി കാണില്ല….

വെയിലത്ത് കിടന്നത് കൊണ്ട് ക്യാബിനിൽ  നല്ല ചൂട്….ഓവനിൽ കേറിയിരുന്നത്‌ പോലെ…….

ഗ്ലാസ്സ് താഴ്ത്തിയിട്ട് നേരെ വണ്ടിയെടുത്തു……കുറച്ച് ഓടി  കഴിഞ്ഞപ്പോൾ ആ  ചൂട് മാറിക്കിട്ടി….പിന്നെ ഗ്ലാസ്സ് കേറ്റി

എ സി  ഇട്ട്  തൃശൂർറൂട്ട്  വെച്ച് പിടിച്ചു…..പണ്ട്  ലെയ് ലാൻഡ്  ഓടിച്ചിരുന്ന സമയത്ത് കുറച്ചൊന്നുമല്ല ചൂട് സഹിച്ചിട്ടുളളത്‌.

തമിഴ്‌നാട് കമ്പം-തേനി റൂട്ട് പോകുമ്പോൾ ഏക്കറുകണക്കിന് കാറ്റാടിപാടത്തിന്റെ നടുവിലൂടെയൊക്കെയാണ് റോഡ് പോകുന്നത്…… തീ കാറ്റ് എന്ന് പറയുന്നൊരു സാധനമുണ്ട്…… അന്തരീക്ഷത്തിലുളള ചൂട് വായുവിനെ മുഴുവൻ കാറ്റ് വഹിച്ചുകൊണ്ട് വരും….. അത് അടിച്ചു കഴിഞ്ഞാൽ ദേഹം മുഴുവൻ ചുവന്ന് പുഴുങ്ങിയ അവസ്ഥയാകും…

ആ  വെന്തുപോകുന്ന സമയത്ത് ഇത്തിരി ആശ്വാസം പോലെ  കുപ്പിവെളളം തലയിലൂടെ ഒഴിച്ച്  ചവിട്ടി പിടിച്ച് ഒരു പോക്കാണ്….

ഇന്ന് എ സിയും ഇട്ട് സുഖിച്ച് പോകുമ്പോൾ ആ കാലമൊക്കെ ഒരു തമാശയെന്നോണം  ഓർക്കും….😅

12 മണിയായപ്പോൾ തന്നെ വർക്ക്‌ഷോപ്പിൽ എത്തി……എല്ലാ എക്സ്ട്രാ ഫിറ്റിങ്ങ്സും ചെയ്യുന്ന നല്ലൊരു ഗാരേജ് ഒക്കെയുളള വർക്ക്‌ഷോപ്പ് ആണ്…. വണ്ടി കൊണ്ടോയി കേറ്റി എന്താ വേണ്ടതെന്ന് പറഞ്ഞാൽ മതി….പൊളിയാക്കി കൈയിൽ തരും….

വണ്ടി ഇട്ട് കൊടുത്ത്  ഫ്രീസർ വാങ്ങാൻ പണിക്കാരന്റെ കൂടെയൊന്ന് ബൈക്കിന് പോകേണ്ടി വന്നു…. സാധനം എത്തി ഒരു മണിക്കൂറിൽ പണി കഴിഞ്ഞ് തിരിച്ച് പോന്നു….. പണിക്കാശും സാധനത്തിന്റെ പൈസയും എല്ലാംകൂടി 6000 പൊട്ടി… എന്നാലും സാരില്ല……കാര്യം ഉഷാറായി….

പാട്ടൊക്കെ കേട്ട് തിരികെ വന്നുകൊണ്ടിരുന്നപ്പോഴാണ് ആഷിക്കിന്റെ വിളി വന്നത്….. ബ്ലൂടൂത്ത് കണക്ട് ആക്കി കോൾ എടുത്തതും  അവന്റെ വെപ്രാളപ്പെട്ടുളള ഹലോ  കേട്ടപ്പോൾ തന്നെ മനസ്സിലായി എന്തോ പ്രശ്നം ഉണ്ടെന്ന്……

‘ ആഹ് പറയെടാ …. ഇന്ന് വണ്ടിയിൽ കേറീല്ലേ………. ‘

‘ഡാ അച്ചു… ഞാനിപ്പോ  അച്ഛനേം കൊണ്ട് ഹോസ്പിറ്റലിൽ വന്നേക്കാടാ….’

‘ഏഹ്… അച്ഛന് എന്ത്പറ്റിയെടാ…….’

ഒരു വെപ്രാളത്തോടെയാണ് ഞാനത് ചോദിച്ചത്….

‘ഡാ അച്ഛനൊരു കുഴപ്പോം ഇല്ല… പ്രെഷർ കൂടിയതാ…… എട അതല്ല കാര്യം… എന്നെ തസ്നി വിളിച്ചിരുന്നെടാ…. അവളെ വീട്ടുകാര്  ദുബായിലേക്ക് കൊണ്ടുപോകാനുളള പരിവാടിയാട…. എന്തെങ്കിലും ചെയ്യണം അച്ചു…… നീ എന്തേലും വഴി പറ….. ‘

ഇവന്റെ കാര്യം…….. 😶

‘എന്റ മോനെ നീയൊന്ന് സമാധാനപ്പെട്….. നിന്റെ വർത്താനം കേട്ട തോന്നും അവള് വിമാനത്തിൽ കേറി ഇരിക്കേണെന്ന് ……. ഞാൻ ഒരു മണിക്കൂറിനുളളിൽ കൊടുങ്ങല്ലൂർ എത്തും…. നീ ഫെബിനേം കൂട്ടി കോട്ടപ്പുറത് ഉണ്ടാവണം….. ‘

ഞാൻ അതും പറഞ്ഞ് ഫോൺ കട്ടാക്കി…… ശിഹാബ് ഡോക്ടറോട് അവൻ  കാര്യം പറഞ്ഞ് കാല് പിടിച്ചിട്ടും ഉടായിപ്പ് കാണിക്കാൻ നോക്കിയ സ്ഥിതിക്ക് ഒരു തീരുമാനം എടുക്കേണ്ട സമയമായി…..

കാര്യങ്ങൾ മനസ്സിൽ പ്ലാൻ ഇട്ടാണ് ഞാൻ പിന്നെ വണ്ടിയോടിച്ചത്‌……

കോട്ടപ്പുറം ഗ്രൗണ്ടിൽ എത്തിയതും ആഷിക്കും ഫെബിനും നിൽക്കുന്നത്‌ കണ്ട് വണ്ടിയൊതുക്കി……..

എന്നെ കണ്ടപ്പോത്തന്നെ ആഷിക്ക് ഇരിപ്പുറക്കാതെ ഓടി അടുത്തേക്ക് വന്നു…….

‘ആദ്യം ഏതെങ്കിലും അമ്പലത്തിൽ പോയൊരു താലി കെട്ടണം……ഒരു ബലത്തിന് ആദ്യം അത് ചെയ്യാം.  ബാക്കി രജിസ്റ്റർ ഓഫീസിലെ കാര്യം ഒരാഴ്ചക്കുളളിൽ ‘…..കൂടുതൽ വാർത്താനം ഇല്ലാതെ കാര്യം പറഞ്ഞതും രണ്ടും കിളിപോയൊരു നോട്ടം…….

‘ഡാ അച്ചു,  നീയല്ലേ പറഞ്ഞെ ഇങ്ങനെ നടക്കേണ്ട ഒന്നല്ല വിവഹം  എന്ന്…….. 😐’ ഫെബി  പറഞ്ഞത് കേട്ട് ആഷിക്കും എന്നെ നോക്കി….

‘ആഹ് ഞാനങ്ങനെ പലതും പറയും…

നീ കിടന്ന് കൊണ പറയാണ്ട് ഇപ്പോ പറയുന്നത് അങ്ങോട്ട് കേട്ട മതി ……

ഡാ ആഷിക്കെ, നിനക്ക് നിന്റെ പെണ്ണ് ദുബായിക്ക് പോകുന്നത് കാണണോ, അതോ നിന്റെ വീട്ടിൽ ഇരിക്കുന്നത് കാണണോ….  ‘

ചെറുതായിട്ടൊന്ന് കലിപ്പിട്ടത്‌ പറഞ്ഞതും രണ്ടും പിന്നൊന്നും മിണ്ടിയില്ല……….

നേരെ ഫോണെടുത്ത്  വേണുവേട്ടനെ വിളിച്ച് കാര്യം അവതരിപ്പിച്ചു….

കാര്യം കമ്പനിയിൽ എല്ലാവരും കൂടി നിൽക്കുമ്പോളൊക്കെ

’24 മണിക്കൂറും അമ്പലവാസി”  എന്നൊക്കെ പറഞ്ഞ് കളിയാക്കിയപ്പോൾ ഓർത്തില്ല  ഇങ്ങനെ വിളിക്കേണ്ടി വരുമെന്ന് 😁.

പെണ്ണ് ആരാണെന്ന് ചോദിച്ചപ്പോൾ ശിഹാബ് ഡോക്ടറുടെ മോളാണെന്ന് പറഞ്ഞതും  ‘ഏത്…? എന്ത് രോഗമായിട്ട് ചെന്നാലും പാരസെറ്റമോൾ എഴുതിത്തരുന്ന അയ്യാൾക്ക് അങ്ങനെ തന്നെ വേണമെന്ന്’ പറഞ്ഞ് വേണുവേട്ടൻ ചിരി തുടങ്ങി……. 😅

ഇങ്ങേരിത് ഈ സമയത്തും കോമഡി പറഞ്ഞ് ആളെ  ചിരിപ്പിക്കാൻ….

വേണുവേട്ടന് പരിചയമുളള കമ്മിറ്റിക്കാരുളള അമ്പലത്തിൽ വെച്ച് കാര്യങ്ങൾ റെഡിയാക്കിയിട്ട് ദിവസം പറയാമെന്ന് പറഞ്ഞ് ഫോൺ വെച്ചതും  ഞാനും ഫെബിനും കൂടി ബാക്കി കാര്യങ്ങൾ പ്ലാൻ ചെയ്ത് തുടങ്ങി….. പക്ഷെ ആഷിക്കിന് ടെൻഷൻ കൂടിയെന്ന് അവന്റെ ഇരിപ്പ് കണ്ടപ്പോ തന്നെ മനസ്സിലായി..

ചെക്കനെ സമാധാനിപ്പിച്ച് ഫെബിന്റെ കൂടെ വിട്ട്   വണ്ടിയെടുക്കാൻ പോയപ്പോഴാണ് സമയം നോക്കിയത്….. 4 മണി കഴിഞ്ഞു……… എന്നാപ്പിന്നെ പോകുന്ന വഴി  അമ്മൂസിനെയും പിക് ചെയ്തോണ്ട് പോകാമെന്ന് കരുതി അച്ഛനെ വിളിച്ച് അമ്മുവിനെ ഞാൻ കൊണ്ടുവന്നോളാമെന്ന് പറഞ്ഞു…  ആള് ഇറങ്ങാനുളള തയ്യാറെടുപ്പിലായിരുന്നെന്ന് മനസ്സിലായി…. അമ്മൂന് ചായക്ക്  കഴിക്കാൻ എന്തെങ്കിലും വാങ്ങിച്ചോന്ന് പറഞ്ഞു അച്ഛൻ ഫോൺ കട്ടാക്കി……  നേരെ സ്കൂളിലേക്ക് വണ്ടിയെടുത്തു…….

ഒരു 10 മിനിറ്റ് ഉളളു  സ്കൂളിലെത്താൻ….. വണ്ടി സ്കൂളിന്റെ അടുത്ത് തന്നെ സൈഡ് ആക്കി കാത്തിരുന്നതും ഇലക്ട്രിക് ബെൽ മുഴങ്ങികേട്ടപ്പോ തന്നെ വണ്ടിയിൽ നിന്നിറങ്ങി…. നമ്മളൊക്കെ പഠിച്ചിരുന്നപ്പോഴുളള  പഴയ ഉരുക്ക്  തകിടിൽ  ഇരുമ്പ് കമ്പി കൊണ്ടടിച്ച് ഉണ്ടാക്കുന്ന

‘ണിം ണിം ‘ ശബ്ദത്തിന്റെ  ഭംഗിയൊന്നും ഈ ഒച്ചയ്ക്കില്ല…. 😊

അതും ആലോചിച്ച് ഗേറ്റിനടുത്തേക്ക് നടന്നു…… പിളേളരോക്കെ ഓരോ ഗ്യാങ്  ആയിട്ടാണ് നടന്ന് വരുന്നത്…..

ദൈവമേ ഇതിന്റെ ഇടയിൽ നിന്ന് എങ്ങനെ കണ്ട് പിടിക്കാനാണ്..😐

അങ്ങനെ നിന്നപ്പോഴാണ് അഞ്ചുപേരുളള ഒരു കൂട്ടത്തിൽ

എന്തോ മണ്ടത്തരം പറഞ്ഞ് ചിരിച്ചോണ്ട് വരുന്ന എന്റെ കൊച്ചിനെ കണ്ടത്…. 😅

അടുത്ത്  എത്തിയപ്പോഴാണ് അമ്മു എന്നെ കണ്ടത്……അച്ഛന് പകരം എന്നെ കണ്ടത്‌ കൊണ്ടാകണം  വായും പൊളിച്ച് ചിരിച്ചോണ്ട് വേഗം വന്നു😆……

ഫ്രണ്ട്സിനെയൊക്കെ പരിചയപ്പെടുത്തി നിന്നപ്പോഴാണ് അമ്മു വണ്ടി  കണ്ടത്……….

‘ഏഹ് ലോറി ആയിട്ടാണോ വന്നേ..😃’

‘ആഹ് ഡി അമ്മൂസ്സേ ….. എന്ന പോകാം…. കടയിൽ നിന്ന് കഴിക്കാൻ എന്തെങ്കിലും വാങ്ങിക്കാം… ‘അതും പറഞ്ഞ് അമ്മുവിന്റെ ബാഗ് ഞാൻ വാങ്ങി പിടിച്ചു….. നല്ല കട്ടി…. ഈ വെയിറ്റും ഇട്ടോണ്ട്  ബസ്സിൽ തൂങ്ങിപിടിച്ച് പോണ പിളേളരെയൊക്കെ സമ്മതിക്കണം….

അങ്ങനെ നേരെ ഇക്കാന്റെ  കടയിലേക്ക് നടന്നപ്പോഴുണ്ട് കോഴിക്കൂട്ടം രാവിലെ നിന്ന അതേ സ്ഥലത്ത് കണ്ണ് ചിമ്മാതെ നിൽക്കുന്നത് കണ്ടത്……. 😅

‘പണി വരുന്നുണ്ട് മക്കളെയെന്ന് മനസ്സിൽ പറഞ്ഞ് ചിരിച്ചോണ്ട് കടയിലേക്ക് കേറി…… 😂’

പപ്പ്സും  മീറ്റ്റോളും വാങ്ങി പൈസ കൊടുത്ത് തിരികെ വന്ന് വണ്ടിയെടുത്ത്  പോകുന്ന പോക്കിൽ

അമ്മു ഫ്രണ്ട്സിന് തല പുറത്തിട്ടാണ്‌ റ്റാറ്റ കൊടുക്കുന്നത്……

കൈ നീട്ടി ഒരടിയും കൊടുത്ത് നേരെയിരിക്കാൻ പറഞ്ഞതിന്  ഒരു പിച്ചും തന്ന് അവള് പാട്ട് വെക്കാൻ സെറ്റ് ഓണാക്കി….. പിന്നെ എണീറ്റ്  വണ്ടിയിൽ നടന്ന് ഓരോന്ന് പരിശോധിക്കാൻ തുടങ്ങി….. ഫ്രീസർ കണ്ടെങ്കിലും വേറെന്തോ സാധനം ആണെന്ന് കരുതി ഇരിക്കേണ്‌ പെണ്ണ് 😆…….

‘ഇതെന്താ  ഇവിടെ ………’

അമ്മുവിന്റെ ചോദ്യം കേട്ട് നോക്കിയതും ഒന്ന് ഞെട്ടി…..

എപ്പോഴോ വാങ്ങിച്ച് വെച്ച സിഗരറ്റ് പാക്കറ്റ് വണ്ടിയിലെ ബെഡിന്റെ അടിയിൽ നിന്ന് തപ്പി പിടിച്ചേക്കേണ്‌

‘പണി പാളി….. 😐

ഇനി ഇതെങ്ങാനും കിച്ചു അറിഞ്ഞ തീർന്നു…… ‘

‘ഏഹ് നോക്കട്ടെ…. ഇതെങ്ങനെ വണ്ടിയിൽ വന്ന്……ആഹ് ഇന്ന് വർക്ക് ഷോപ്പിൽ പോയപ്പോ പണിക്കാര്  ആരോ മറന്നു വെച്ചതാകും…….. ‘

ഏൽക്കില്ലെന്ന് അറിയാമെങ്കിലും ഒരു നമ്പറിട്ട് നോക്കി……. 😇

‘എന്റ ദൈവമേ നൊണ…… ഇത് ഞാൻ കിച്ചേച്ചിയോടും അമ്മയോടും പറയുമെന്ന് പറഞ്ഞ് പുറത്തൊരു അടിയും തന്ന് അമ്മു സീറ്റിൽ വന്നിരുന്നു……

‘ഡാ ഡാ ഏട്ടന്റെ  മുത്തല്ലേ…. എന്ത് വേണേലും വാങ്ങിച്ച് തരാം….. എന്റെ മോൻ പ്രശ്നം ഉണ്ടാക്കല്ലേ….’

അമ്മൂനോട് അടവൊന്നും നടക്കില്ലെന്ന് അറിയാവുന്ന കൊണ്ട് കാലുപിടിക്കല്ലാതെ വേറെ വഴിയില്ല..

‘മ്മ്മ്മ്മ്…. ഇനി ഈ സാധനം കണ്ടാ ഞാൻ എന്തായാലും പറഞ്ഞ് കൊടുക്കും……. ‘അതും പറഞ്ഞ് അവൾ പാക്കറ്റ് എടുത്ത് പുറത്തേക്ക് ഒരേറ്…….. ചിരിച്ചോണ്ട് നിന്നതല്ലാതെ ഒന്നും മിണ്ടാൻ പോയില്ല….. 😅

പാട്ട് വെച്ചോണ്ട് അമ്മൂന്റെ  ഇടക്കിടക്കുളള  കൈ വെച്ചുളള സ്റ്റെപ്പ്  ഇടലൊക്കെ കാണാൻ രസോണ് 😄….

അങ്ങനെ  വീടെത്തി റോഡ്സൈഡിൽ വണ്ടിയിട്ടതും  അമ്മു കഴിക്കാൻ വാങ്ങിച്ചതും കൊണ്ട് വണ്ടിയിൽ നിന്നിറങ്ങി …..

‘ഡീ…..ഈ ബാഗ് കൊണ്ടോടി……. ‘

‘ ശോ എനിക്ക് വയ്യ  ഏട്ടാ…..

വരുമ്പോ എടുത്തോ………

എനിക്ക് വിശക്കണെന്നും പറഞ്ഞ് വീട്ടിലേക്ക് ഒറ്റ ഓട്ടം…… ‘

‘ഡി പയ്യെ പോടി…….. ‘ വിളിച്ചു പറഞ്ഞത്‌ കേട്ടെങ്കിലും തിരിഞ്ഞ് നോക്കാതെയാണ് ഓട്ടം……

‘ഹ്മ്മ്മ്…. വിശപ്പെന്നൊരു സാധനം കൊച്ചിന് സഹിക്കാൻ പറ്റില്ല….’

ഞാൻ  വണ്ടിയിലെ ബെഡ് ഷീറ്റും പുതപ്പും അലക്കാനായി എടുത്ത്, ബാഗും ആയി   വണ്ടിയും ലോക്ക് ചെയ്ത് വീട്ടിലേക്ക് നടന്നു……

ഇറയത്ത് മുത്തശ്ശനിരിപ്പുണ്ട്…

വെളള ഷർട്ടും മുണ്ടും ഇട്ട്  ഊന്ന് വടിയും പിടിച്ച് ഇരിക്കുന്നത് കാണാൻ തന്നെ രസോണ് 😊

‘ബാഗ് മോൻ കൊണ്ടുവന്നല്ലേ….

ബാഗ് എന്തേയെന്ന് ചോദിച്ചിട്ട് പുറകെ വരുമെന്ന് പറഞ്ഞ് അകത്തേക്ക് പോയതാ…… ‘

‘ആഹ് മുത്തശ്ശാ…. വിശക്കണെന്നും പറഞ്ഞ് ഓടിയതാ…… 😅’ഞാൻ അതും പറഞ്ഞ് വീട്ടിലേക്ക് കേറിയതും അമ്മു സോഫയിൽ ഇരുന്ന്  പപ്പ്സ് കഴിക്കുന്നുണ്ട്….. അച്ഛൻ രണ്ട് ഗ്ലാസ്സ് ചായയും കൊണ്ട് അടുക്കളയിൽ നിന്ന് വരുന്നുണ്ട്…….

‘അമ്മ എവിടെ അച്ഛാ …….’

‘അകത്ത്‌ ഉണ്ടെടാ……റേഷൻ കടയിൽ നിന്ന് കിട്ടിയ അരിയിൽ കുറവുണ്ടെന്നും  പറഞ്ഞ് അളന്ന് നോക്കേണ്‌,  ഇന്നാ ചായ പിടിക്കെന്നും പറഞ്ഞ് ഒരു ഗ്ലാസ്സ് എനിക്കും തന്ന് അമ്മുവിന്

ടീ പോയിലും വെച്ച് കൊടുത്ത് ആള്

ഷർട്ടിട്ട് പുറത്തേക്കിറങ്ങി…. ബൈക്ക് സ്റ്റാർട്ടാക്കിയ ഒച്ച കേട്ടപ്പോ തന്നെ ക്ലബ് സന്ദർശനത്തിനു പോകേണെന്ന് മനസ്സിലായി……ടൗണിൽ ഏറ്റോം പഴയ ക്ലബ് ഇവരുടെതാണ്….. ഇവരെല്ലാം  തോളിൽ കൈയിട്ട് നടക്കുന്ന കാലത്ത് തുടങ്ങിയ ക്ലബ് ആണ്….  മെമ്പർമാരാണെങ്കിൽ പെശക് ടീംസും…… തോമസ്സേട്ടനെ പോലത്തെ ആളുകൾ ഉളളപ്പോൾ തന്നെ മനസ്സിലാക്കാൻ പറ്റുമല്ലോ  ക്ലബ്ബിന്റെ  റേഞ്ച്…..

അമ്മുവിന്റെ ഒപ്പം ടീവിയും കണ്ട് ചായയും കുടിച്ച് ഇരുന്നപ്പോഴാണ്

അമ്മായിയും കിച്ചുവും കൈയിൽ  കവറൊക്കെയായി  വന്ന് കേറിയത്…

‘ഇതെവിടെ പോയി രണ്ടും…….. ‘

‘ഞങ്ങൾക്ക് കുറച്ച് ഷോപ്പിംഗ് ഒക്കെയുണ്ടായി മോനെ….. ‘അതും പറഞ്ഞ് അമ്മായി കവറുകൾ ടേബിളിൽ വെച്ചു…….. ‘

‘മാമൻ  പോയോ അമ്മായി….. ‘

ഞാൻ ചോദിച്ചതും അമ്മായി  ഒന്ന് മൂളിക്കൊണ്ട് മുറിയിലേക്ക് പോയി…

ഒരു സുഖമില്ലാത്ത മൂളലാണല്ലോ..😶

അതും ആലോചിച്ച് നോക്കിയത് കിച്ചൂസിന്റെ മുഖത്താണ്….

ചൂണ്ട് വിരൽ തമ്മിൽ കൊളുത്തി കാണിച്ച് മാമനും അമ്മായിയും വഴക്കായെന്ന് കിച്ചു പറഞ്ഞതും

അമ്മായി ഡ്രസ്സ്‌ മാറി റൂമിന് പുറത്തേക്ക് വന്നു…….

‘അതെയ് കെട്ട്യോൻ ആയിട്ട് എന്താ ഉടക്കിയത്….. ‘എന്റെ ചോദ്യം കേട്ടതും അമ്മായി കിച്ചുവിനെയൊരു നോട്ടം…..

‘ ആഹ് ന്യൂസ്‌ കൊടുത്തല്ലേന്ന്  പറഞ്ഞ് കിച്ചുവിന്റെ മൂക്കിൽ പിടിച്ച് വലിച്ചു വിട്ടുകൊണ്ട് ഒരു കിറ്റ് ആയിട്ട് എന്റെ അടുത്ത് വന്നിരുന്നു…..

‘ഡാ നീ ഇതൊന്ന് നോക്ക്യേ…. എനിക്കിടാൻ വീട്ടിൽ പോയി എടുത്തോണ്ട് വന്ന ഡ്രസ്സുകളാണ്….ഒരെണ്ണം നല്ലത് ഉണ്ടെങ്കിൽ പറ… കീറിയത് തിരഞ്ഞു പിടിച്ച്  എടുത്തോണ്ട് വന്നേക്കേണ് നിന്റെ മാമൻ……. ഒറ്റക്ക് പോയപ്പോഴേ ഞാൻ വിചാരിച്ചതാ എന്തെങ്കിലും മണ്ടത്തരം ഒപ്പിക്കുമെന്ന് ‘

‘ ഹിഹി…. ആഹ് ബെസ്റ്റ്…. എന്നേം വിളിച്ചതാ കൂടെ ചെല്ലാൻ…. പോകാത്തത്‌ എന്തുകൊണ്ടും നന്നായി….എന്നിട്ട് ഡ്രസ്സ്‌ വാങ്ങാൻ പോയതാണോ രണ്ടും  ‘

‘മ്മ്മ് ….. പിന്നല്ലാതെ…. ഈ അലവലാതി പിടിച്ചത് ഇട്ട് നടക്കാനോ…. ദേ നിന്റെ പെണ്ണിനും വീട്ടിൽ ഇടാൻ വാങ്ങിച്ചിട്ടുണ്ട്….’ അതും പറഞ്ഞ് അമ്മായി കവർ എടുത്തോണ്ട് വന്നു…….

കിച്ചു അമ്മായിയുടെ വർത്താനം കേട്ട് ചിരിച്ചോണ്ട് നിൽക്കയാണ്…..

അപ്പോഴാണ് അമ്മ റേഷൻ കടക്കാരൻ മണ്ണെണ്ണ കുറവാണ് ഒഴിച്ചതെന്നും പറഞ്ഞ് ഹാളിലേക്ക് വന്നത്……

ഹിഹി…. ഇത്രേം നേരം അരിയായിരുന്ന് കുറവ്…. ഇപ്പോ മണ്ണെണ്ണയായോ….. 😅. റേഷൻ വാങ്ങുന്ന ദിവസം സ്ഥിരം ഉളളതാണ് ഇത് …..

‘ആഹ് നിങ്ങളെത്തിയാ……. എവിടെ വാങ്ങിയതൊക്കെ …. ‘അമ്മ അതും പറഞ്ഞ് വേഗം കവർ  വാങ്ങി നോക്കാൻ തുടങ്ങി…..

ആൾക്ക് ഇഷ്ട്ടമുളള കാര്യം ഇതൊക്കെയാണ് 😆…പിന്നെ പലചരക്ക് സാധനങ്ങൾ വാങ്ങിയാൽ പ്രേത്യേകം ടിന്നുകളിലാക്കി വെക്കലും 😆….

അമ്മ ഓരോന്ന് നിവർത്തി നോക്കിയപ്പോഴാണ് കിച്ചുപെണ്ണിന് വാങ്ങിയത്‌ ഞാനും നോക്കുന്നത്….

രണ്ട് ടോപ്പും പാന്റും, പിന്നൊരു ഫുൾ പാവാടയും ബനിയനും…. അത് കാണാൻ നല്ല രസോണ്ട്…. പുറത്ത് ഇടാൻ പറ്റിയ ടൈപ്പ്…..

കിച്ചുവിനെ നോക്കി കണ്ണ് കൊണ്ട് അടിപൊളിയാണെന്ന് കാണിച്ചു…

പെട്ടെന്നാണ് അമ്മൂസ് ടീവിയിൽ നോക്കി  ഒന്നും മിണ്ടാതെയിരിക്കുന്നത് ഞാൻ ശ്രെദ്ധിച്ചത്……..പയ്യെ തോള്‌ കൊണ്ട് തട്ടി എന്തായെന്ന് ചോദിച്ചിട്ട് ഒന്നുല്ലന്ന് കണ്ണടച്ച് കാട്ടികൊണ്ട് ടീവി ചാനൽ മാറ്റി…..

കാര്യം എനിക്ക് മനസ്സിലായി…..

എന്റെ കൊച്ചിന് ഒന്നും വാങ്ങിയിട്ടില്ല….. അതന്നെ കാര്യം….

അമ്മയും അമ്മായിയും കിച്ചുവും കൂടി ഡ്രസ്സ്‌ നോക്കുന്ന തിരക്കിലാണ്…

അമ്മൂസിനെ നോക്കിയപ്പോൾ ചെറുതായിട്ട് സങ്കടം വരുന്നുണ്ട് ആൾക്ക്……. 😅

‘അമ്മൂസ്സേ…………… ‘

ഞാൻ പയ്യെ വിളിച്ചത് കേട്ടിട്ടും നോക്കാതെ ഇരിക്കേണ്…..

‘നോക്കെടാ ഇങ്ങോട്ട് ……… ‘അതും പറഞ്ഞ് ഞാൻ താടിയിൽ പിടിച്ച് എന്റെ നേരെ തിരിച്ചതും കണ്ണ് നിറച്ച് ഇരിക്കേണ്….

‘എന്റെ മോന് ഏട്ടൻ വാങ്ങിത്തരില്ലേ

….പിന്നെന്തിനാ വിഷമിച്ചേ …..

വൈകിട്ട് നമുക്ക് രണ്ടുപേർക്കും കൂടി പുറത്ത് പോയി എല്ലാം വാങ്ങിക്കാം…. പോരെ ‘

അത് കേട്ടതും അമ്മു പയ്യെ തോളിലേക്ക് ചാരി…ആരും കാണാതെ കണ്ണിലെ നനവ്വ് എന്റെ ഷർട്ടിൽ തുടച്ചു……. അമ്മൂസ്സിന്റെയൊരു കാര്യം…..

അങ്ങനെ ചായയും കുടിച്ച് മുറിയിലേക്ക് പോയി ഒരു കുളി പാസ്സാക്കി……ഒരു ട്രാക്ക്പാന്റും ഇട്ട് ഫാൻ ഓണാക്കി ഒറ്റക്കിടപ്പ്….

ആഹാ എന്താ സുഖം….