💞എന്റെ കൃഷ്ണ 09 💞

ഗൗരവം ഒന്നുമില്ലാതെ ആ മുഖത്ത് ചിരി കാണുന്നത്  അപൂർവമാണ്…

ഞാനും പയ്യെ എണീറ്റ്  അച്ഛന്റെ പുറകെ  നടന്നു……അച്ഛൻ പതിവ് ഫോൺ വിളി തുടങ്ങാനുളള പുറപ്പാടാണെന്ന്  മടിക്കുത്തിൽ വെച്ചിരുന്ന ഫോൺ തപ്പുന്നത് കണ്ടപ്പോൾ തന്നെ മനസ്സിലായി…..

മനസ്സിൽ വല്ലാത്തൊരു സന്തോഷം….

കാര്യം എങ്ങനെയും കിച്ചുവിനെ അറിയിക്കണം……..അച്ഛന്റെ പിന്നാലെ നടന്നുകൊണ്ടിരിക്കേ  വീടിനകത്തേക്ക് നോക്കി ….. മുൻ വശത്തെ വാതിൽ തുറന്ന് കിടക്കുകയാണ്… മുത്തശ്ശൻറെ മുറിയിൽ ലൈറ്റ് തെളിഞ്ഞിട്ടുണ്ട്….

അച്ഛൻ കൂടെയുളളത്‌ കൊണ്ട് കിച്ചുപെണ്ണിനെ കണ്ടിട്ട് പോകാനും രക്ഷയില്ല…. 😐

അതും ആലോചിച്ചു  നടന്ന എന്റെ നടത്തം സ്ലോ ആയത് കണ്ട് അച്ഛൻ എന്നെയൊരു നോട്ടം………😒

ഡാ, നീ ഇതെന്താ കിടന്ന്  താളം ചവിട്ടുന്നെ…… 😒

അത്‌ കേട്ടതും  നമ്മളില്ലേ എന്നപോലെ  ഞാൻ വേഗം  നടന്ന് കിളിവാതിൽ തുറന്ന് പറമ്പിലേക്ക് കേറി……..

മനസ്സ് മുഴുവൻ നാളത്തെ കാര്യമാണ്….ഓർക്കുന്തോറും ചുണ്ടിൽ അറിയാതൊരു  ചിരി

വരികയാണ്  😊……വീട്ടിലേക്ക് കേറിയതും അമ്മൂസ് സോഫയിലിരുന്ന് ടീവി കണ്ട്  ചക്കവറുത്തത്‌  തട്ടുകയാണ്….

എന്റെ മുഖത്തെ സന്തോഷം കണ്ടിട്ട് അവൾ സൂക്ഷിച്ച് നോക്കുന്നുണ്ട്….

എന്തായാലും ആദ്യം എന്റെ കൊച്ചിനോട് തന്നെ പറയാമെന്നു കരുതി അവളുടെ അടുത്ത് പോയിരുന്നു……

“ഒന്ന് പോയെ…….. ഇതാകെ ഇത്തിരിയുളളു…… “എന്നും പറഞ്ഞ്  അവൾ ചക്കവറുത്തത് ഒളിപ്പിച്ചു…😅

ഹിഹി….ഡീ,  ഞാൻ അതെടുക്കാൻ വന്നതല്ല…… ശോ… 😆

പിന്നെ……? അമ്മൂസ് ചെറുതായി കണ്ണുമിഴിച്ചുകൊണ്ടാണ് ചോദിച്ചത്.

ഡീ അതെയ്…നാളെ ഒരു കാര്യമുണ്ട്..

നാളെ മാമനും അമ്മായിയും ഒക്കെ വരും…….

ആഹ് അതാണോ… അമ്മ പറഞ്ഞല്ലോ…അമ്മു അതും പറഞ്ഞ് പിന്നെയും കൊറിക്കാൻ തുടങ്ങി….

ഏഹ്ഹ്….എന്ത് പറഞ്ഞെന്ന്….. ഞാൻ ഇത്തിരി ആകാംക്ഷയോടെയാണ് ചോദിച്ചത്……

എന്ത് പറയാൻ…. നാളെ അച്ചുച്ചേട്ടന്റെ മാമനും അമ്മായിയും വരുമെന്ന് പറഞ്ഞു ….

അതിനെന്താ….?

അതിനോ… അതിന്…… ആഹ് ഒരു കാര്യമുണ്ട് എന്നൊരു ചിരിയോടെ പറഞ്ഞതും അമ്മൂസിനു ഡൌട്ട് ആയി…

‘അച്ചുച്ചേട്ടാ… എന്താ കാര്യമെന്ന് പറ….’അമ്മൂസ്സ്  ചെറിയ ആകാംഷ കാണിച്ചുകൊണ്ടാണ് ചോദിച്ചത്…..

ഡി നാളെ അവർ വെറുതെ വരുന്നതല്ല…മുത്തശ്ശനായിട്ട് കാര്യങ്ങൾ  സംസാരിക്കാനാ വരുന്നേ… ഞാൻ അത് പറഞ്ഞതും അവളുടെ കണ്ണൊക്കെ വിടർന്നു….

അച്ചുച്ചേട്ടാ…… സത്യായിട്ടും….

😃

എന്നിട്ട് കിച്ചേച്ചിയോട് പറഞ്ഞോ കാര്യം…..

ഏയ്യ്…. അവൾ അറിഞ്ഞിട്ടില്ലടാ ……

കുറച്ച് കഴിഞ്ഞ് വിളിക്കാമെന്ന് പറഞ്ഞ ഞാൻ ഇങ്ങോട്ട് വന്നത്…….

ആഹ വെറുതെയല്ല നാളെ  അമ്മ ബിരിയാണി വെക്കാന്ന് പറഞ്ഞത്‌…😋 അതും പറഞ്ഞു അമ്മു ‘ഞ്ഞം ഞ്ഞം….  എന്ന് ചുണ്ടുകൊണ്ട് കാണിച്ചതും എനിക്ക് ചിരി വന്നു… ഹിഹി….. എന്റ അമ്മൂസ്സേ…..😅

അങ്ങനെ കുറച്ച് നേരം അവളുടെ കൂടെ ടീവിയും കണ്ടിരുന്നു….. അപ്പോഴും ചക്കവറുത്തത് എന്നെ തൊടീച്ചില്ല….. ഇടക്ക് വായിൽ വെച്ച് തരുന്നത് മാത്രം 😅😆……

അപ്പോഴാണ് അമ്മ അടുക്കളയിൽ നിന്നും പണിയൊക്കെ ഒതുക്കി വന്നത്….

ഡാ അച്ഛനെവിടെ….?സാരിത്തലപ്പ് കൊണ്ട് കൈയൊക്കെ തുടച്ച് അമ്മൂസിന്റെ അടുത്ത് വന്നിരുന്നാണ് അമ്മയുടെ ചോദ്യം…

ആവോ…ഫോൺ വിളിക്കായിരിക്കും.

ആഹ് മുറ്റത്ത്‌ ചിരി കേൾക്കുന്നുണ്ട്… ഞാൻ ടീവിയുടെ സൗണ്ട് കുറച്ച് അച്ഛന്റെ ചിരി കേൾപ്പിച്ച് കൊടുത്തു…….

ആഹ് ഇന്ന് ഫോൺ വിളി നേരത്തേ തുടങ്ങിയ….. ഡാ നിന്റെ അച്ഛന് തമിഴ്നാട്ടിൽ വേറെ ഭാര്യയും മക്കളും ഉണ്ടെടാ…. അവരെയാ ഈ വിളിച്ചു കൂട്ടുന്നത്….. ഹിഹി….😅 അതും പറഞ്ഞ് അമ്മ ചിരി തുടങ്ങി….

ഹിഹി… അമ്മ അത് പറഞ്ഞപ്പോൾ അമ്മൂസ് ആദ്യം ഒന്ന് ഞെട്ടിയെങ്കിലും അമ്മയുടെ ചിരി കണ്ടപ്പോഴാണ് അവൾക്ക് തമാശയാണെന്ന് കത്തിയത് 😆……..പാവം വെറുതെ അച്ഛനെ സംശയിച്ചു 😂……

അച്ഛൻ പഴയ കൂട്ടുകാരെയൊക്കെ മാറി മാറി മിക്ക  ദിവസവും വിളിക്കും…. സത്യത്തിൽ സുഹൃത്ത് ബന്ധം ഇങ്ങനെ നിലനിർത്തുക എന്നത് തന്നെ വലിയൊരു കാര്യമാണ്… ഞാനൊക്കെ  പ്ലസ്ടുവിൽ ഒപ്പം പഠിച്ചിരുന്ന കൂട്ടുകാരെ  വരെ മറന്നു….

അമ്മ അമ്മൂസിനോട് ചോറെടുക്കട്ടെയെന്ന് ചോദിച്ചതും

മ്മ്മ്ഹ്….വേണ്ടമ്മേ…. ഒട്ടും വിശപ്പില്ലെന്ന് പറഞ്ഞ് ചിണുങ്ങിക്കൊണ്ട്  അമ്മയുടെ തോളിലേക്ക് ചാരി കണ്ണടച്ചു കിടന്നു..

സഫയറിൽ നിന്ന് നല്ല തട്ട് തട്ടിയത് കൊണ്ട് എനിക്കും ഒട്ടും വിശപ്പില്ല…..

‘ഉറക്കം വരണുണ്ടോ മോൾക്ക്….. ‘

അമ്മുവിന്റെ കവിളിൽ കൈ ചേർത്ത് പിടിച്ചുകൊണ്ട് ഒരു വാത്സല്യത്തോടെയാണ് അമ്മ ചോദിച്ചത്…..

അതിന് മറുപടി പറയാതെ പയ്യെ കണ്ണ് തുറന്ന് തലയാട്ടികൊണ്ട് അവൾ  അമ്മയുടെ മടിയിലേക്ക് ചാഞ്ഞു…..

ഞാനതെല്ലാം ഒരു ചിരിയോടെ നോക്കിയിരിക്കയാണ്… 😊

അമ്മ അവളെ രണ്ട് കൈകൊണ്ടും ചേർത്ത് പിടിച്ചതും അവൾ ഒന്നുകൂടി അമ്മയുടെ കൈക്കുളളിൽ ഒതുങ്ങി……..കാല് പിന്നെ എന്റെ മടിയിലേക്ക് വെക്കാൻ ആരും പറയണ്ട… അത് താനേ വന്നോളും..😅

ഹിഹി… പറഞ്ഞ് തീരുന്നതിനു മുന്നേ കാല് രണ്ടും എനിക്ക് തന്നു 😄……..

അമ്മൂസിന്റെ കിടപ്പ് കണ്ടിട്ട് പാവം തോന്നി…..കൈയൊക്കെ ചേർത്ത് പിടിച്ച് കുഞ്ഞിപിളേളർ കിടക്കുന്ന പോലെയാണ് കിടപ്പ്…. പാവം…😊

അമ്മടെ മോള് ഉറങ്ങിക്കോന്നും  പറഞ്ഞ് അമ്മ അവളെ പയ്യെ തട്ടികൊടുക്കുന്നുണ്ട്….

ഈ അമ്മടെ കാര്യം……

അയ്യാ……ഇളള കുഞ്ഞല്ലേ…..ഉറക്കാൻ എന്ന് ഞാൻ  പറഞ്ഞതും

‘നീ പോടായെന്നും’ പറഞ്ഞ് അമ്മ അമ്മൂസിനെ പിന്നെയും പയ്യെ തട്ടികൊടുക്കാൻ തുടങ്ങി……

ഞാൻ പയ്യെ കാലിലെ വിരൽ ഞൊട്ടിയതും പെണ്ണിന് ഒരനക്കവും കാണുന്നില്ല……ഇത്ര വേഗം ഉറങ്ങിയോ…….

ആഹാ…..അമ്മോയ് ദേ ആള് ഉറങ്ങിയെന്ന്  ഞാൻ ഇത്തിരി ഒച്ചയിൽ പറഞ്ഞതും അമ്മയുടെ കയ്യിൽ നിന്ന് തലക്കൊരെണ്ണം കിട്ടി… എന്നിട്ട് മിണ്ടാതെ പോയെടായെന്ന്    കൈ കൊണ്ടൊരു കാണിക്കലും…..

എന്റ പൊന്നോ…. എന്താണിത്‌….. മിണ്ടാനും പാടില്ലേ…..😐

ഞാൻ അതും പറഞ്ഞ്  അമ്മൂസിന്റെ കാല് അനക്കാതെ സോഫയിൽ വെച്ച് മുറിയിലേക്ക് പോയി……

മുറിയിൽ കേറിയതും നല്ല ഫ്രഷ് മണം…… വെറുതെയല്ല….

അമ്മ മുറിയൊക്കെ തുടച്ച് എല്ലാം അടക്കി പെറുക്കി വെച്ചിട്ടുണ്ട്…

ബെഡ് ഷീറ്റ് ഒക്കെ മാറ്റി വിരിച്ചിട്ടുണ്ട്……

രാത്രി കുളി പതിവില്ലെങ്കിലും ഇന്നൊന്ന് കുളിക്കാമെന്ന് വെച്ചു….. മൊബൈൽ ചാർജിൽ ഇട്ട് തോർത്തുടുത്ത് നേരെ ബാത്റൂമിലേക്ക് കേറി…..

ഷവർ ഓണാക്കി അങ്ങനെ നിന്നു….. തലയിലൂടെ വെളളം വീഴുമ്പോൾ  ഇടക്ക് ശ്വാസം കിട്ടാതെവരുന്നത് ഇപ്പോഴും എന്തൊപോലെയാണ് 😆…

വേഗം തോർത്തിയിറങ്ങി മുണ്ട് ഉടുത്തുകൊണ്ടിരുന്നപ്പോഴാണ്  ഹാളിൽ കിച്ചൂസിന്റെ ഒച്ച കേട്ടത്…

വാതിൽ പയ്യെ തുറന്ന് നോക്കിയപ്പോൾ കിച്ചുപെണ്ണ് അമ്മൂസിനെ എണീപ്പിക്കാൻ നോക്കേണ്……അമ്മയെ കാണാൻ ഇല്ലലോ….തലയിണയൊക്കെ വെച്ച് കൊടുത്തിട്ടാണ് അമ്മ എണീറ്റത്…. ഞാൻ പയ്യെ പുറത്തേക്കിറങ്ങി……. അടുക്കളയിൽ  ഒച്ചകേൾക്കുന്നുണ്ട്… അമ്മ പണിയിലായിരിക്കും….

‘എണീക്ക് എന്റ അമ്മൂസ്സേ….. എന്ത് ഉറക്കാ ഇത്…… ‘കിച്ചു തട്ടി വിളിക്കുകയാണ്….. അമ്മു എവിടെ എണീക്കാൻ……

‘ഡീ അതവിടെക്കിടന്ന് ഉറങ്ങിക്കോട്ടെ’

ഞാൻ അതും പറഞ്ഞ് കിച്ചൂസിന്റെ അടുത്തേക്ക് പോയി…….

എന്റെ ഒച്ച കേട്ടപ്പോഴാണ് കിച്ചുപെണ്ണ് അമ്മൂസിനെ തട്ടിവിളിക്കുന്നത് നിർത്തിയത്…..

എന്റ അച്ചേട്ടാ, സമയം എന്തായീന്നാ മുത്തശ്ശൻ  അന്വേഷിക്കുന്നുണ്ട്….

ഞാൻ പറഞ്ഞത് കാര്യമാക്കാതെ കിച്ചു പിന്നെയും അവളെ എണീപ്പിക്കാൻ നോക്കുകയാണ്…..

പെട്ടെന്നാണ് കിച്ചു എന്നെ നോക്കിയത്…..

‘ഇതെന്തായിത്…… കുളിച്ചെന്ന് തോന്നണു…….’ കിച്ചുപെണ്ണ് കണ്ണുമിഴിച്ചൊരു ചിരിയോടെയാണത്‌ ചോദിച്ചത്……

മ്മ്മ്……എന്താടി….. 😅

‘ഏയ്യ്…. ഒന്നുല്ല……ദേ തലയിലെ വെളളമൊക്കെ അങ്ങനെ തന്നെയിരിപ്പുണ്ട്……… ‘

ബീച്ചിൽ പോയപ്പോഴിട്ട  ഡ്രെസ്സൊക്കെ  മാറ്റി വീട്ടിലിടുന്ന ചുരിദാറാണ്   കിച്ചൂസിന്റെ വേഷം…. അമ്മ പറയുന്നത് കറക്റ്റാണ്…. എന്തിട്ടാലും  പ്രേത്യേക ഭംഗിയാണ് പെണ്ണിന്……😌

ഞാൻ പയ്യെ അടുത്തേക്ക് നീങ്ങി നിന്നതും പെണ്ണിനൊരു വെപ്രാളം….😅എന്റെ നോട്ടം ശെരിയല്ലെന്ന് തോന്നിയിട്ടാകും പുരികമുയർത്തി എന്തായെന്നർത്ഥത്തിൽ ചെറിയ ചിരിയോടെ ഒരു നോട്ടം😊…..

പെട്ടെന്നാണ് അച്ഛൻ മുറ്റത്ത്‌ നിന്ന് ഫോൺ വിളിച്ചുകൊണ്ടു കേറി വന്നത്……..കിച്ചു വേഗം ഇത്തിരി ഗ്യാപ്പിട്ട് നിന്നു…….ഭാഗ്യം അവളെ തോണ്ടുകയും പിടിക്കുകയും ഒന്നും ചെയ്യാഞ്ഞത്‌ 😐….അല്ല അതിനുളള ടൈം കിട്ടിയില്ല… അതന്നെ കാര്യം 😇.

അച്ഛൻ ആരോടോ സംസാരിച്ചുകൊണ്ട് തന്നെ  സോഫയിൽ വന്നിരുന്നു……അച്ഛന്റെ ഒച്ച കേട്ടത് കൊണ്ടാകും അമ്മ അടുക്കളയിൽ നിന്നും വന്നത്…..  ഞാൻ പിന്നെയവിടെ ചുറ്റിപറ്റി നിന്നില്ല…. വേഗം മുറിയിലേക്ക് പോയി …..ഫോൺ എടുത്ത് കട്ടിലിലേക്ക് കിടന്നു …

എന്തായാലും കിച്ചുപെണ്ണിനെ വിളിക്കാൻ കുറച്ച് കഴിയണം……

കുറച്ചുനേരം അമ്മു മാളിൽ വെച്ച് എടുത്ത  എന്റെയും  കിച്ചൂസിന്റെയും  ഫോട്ടോ നോക്കിയിരുന്നു…..പെണ്ണിനെ കാണുമ്പോ വല്ലാത്തൊരു കൊതി  ഉളളിൽ തോന്നുകയാണ്……ഇന്ന് വിളിക്കുന്നതിന്‌ പകരം പോയി കണ്ടാലോ എന്നൊരു ചിന്ത പെട്ടന്നാണ് മനസ്സിൽ വന്നത്…….. 😇

പണി പാളി  …… ഉളളിൽ തോന്നിയാൽ പിന്നെ പ്രശ്നമാണ്….ഇന്ന് ഇനി എന്തായാലും കണ്ടേ അവസാനിക്കു😅😊……

ഫോണിന്റെ ഡിസ്പ്ലേ മാറ്റാറായി….

പൊട്ടിയ ഡിസ്പ്ലേയിൽ കിച്ചുപെണ്ണിന്റെ മുഖം കണ്ടിട്ട് ഒരു രസുല്ല…. കുറച്ച് നേരം യൂട്യൂബിൽ കേറി സഫാരി ചാനലും കണ്ട് കിടന്നു…..

കുറച്ച് കഴിഞ്ഞപ്പോഴാണ് അമ്മ മുറിയിലേക്ക് വന്നത്……

‘ഡാ നീ ചോറ് കഴിക്കുന്നില്ലേ ….. ‘

തലവേദന എടുത്തിട്ട് വയ്യ…   എങ്ങനെയെങ്കിലുമൊന്ന്  കിടന്ന മതി….

‘ഏയ്യ് എനിക്ക് ഒന്നും വേണ്ട…. എല്ലാം എടുത്ത് വെച്ചോ …..’ ഫോണിൽ നിന്നും കണ്ണെടുക്കാതെ ഞാൻ അമ്മയോടായി പറഞ്ഞു….. കേൾക്കേണ്ട താമസം ആള് വാതിലടച്ചു സ്ഥലം വിട്ടു……😆

ച്ചെ… മനുഷ്യൻ ഫ്രാൻസിലെ നഗരവീഥിയിലൂടെ അംബരചുംബികളായ കെട്ടിടവും കണ്ട് രസം പിടിച്ച് വന്നപ്പോഴാണ് അമ്മയുടെ വരവ്വ്….. ആ ഫ്ലോ അങ്ങ് പോയി 😒……

നാളത്തെ കാര്യം ഫെബിനെയും ആഷിക്കിനെയും വിളിച്ചു പറയണമെന്ന ഓർമ വന്നത്…….

അങ്ങനെ ഫെബിനെ വിളിച്ചു.. കാര്യം പറഞ്ഞതും അവൻ കൈരളി ബാറിൽ 3 സീറ്റ്‌ പിടിക്കുന്ന കാര്യമാണ് ഇങ്ങോട്ട് പറഞ്ഞത്…….കളള് കുടിക്കാൻ ഒരു കാരണം കിട്ടാതെ ഇരിക്കേയിരുന്ന് തടിയൻ…..

‘ഡാ നീ ഉറങ്ങ്യാ….. ‘

വാതിലിൽ തട്ടിയുളള അച്ഛന്റെ ചോദ്യം കേട്ടപ്പോഴാണ് സംസാരം നിർത്തി  ഹെഡ്സെറ്റ് ഊരി വാതിൽ തുറന്ന് നോക്കിയത്….

‘ഡാ നാളെ രാവിലെ പോയി മീൻ വാങ്ങണം…. ആഹ് ചിക്കനും  വാങ്ങിച്ചോ…അമ്മുവിന് അതാ ഇഷ്ട്ടം……’ അതും പറഞ്ഞ് 1000 രൂപ തന്ന് എന്റെ മറുപടിക്ക് നിക്കാതെ   ആള് കിടക്കാൻ മുറിയിലേക്ക് പോയി….

എന്റെ കൈയിൽ എത്ര  പൈസ ഉണ്ടെന്ന് പറഞ്ഞാലും  കാര്യമില്ല…. അതുകൊണ്ട് തന്നെ ഞാൻ ഒന്നും പറയാൻ പോയില്ല…. പൈസയും വാങ്ങി കട്ടിലിലേക്ക് കേറിയപ്പോഴാണ് കിച്ചൂസിനെയും അമ്മുവിനെയും അച്ഛൻ കൊണ്ടാക്കിയിട്ടുണ്ടാകും  എന്ന ബോധം വന്നത്…..😃….

നൈസ് ആയിട്ട് വാതിൽ തുറന്നു….

സമയം 10 കഴിഞ്ഞു….. എന്തായാലും കുറച്ച് കഴിഞ്ഞ്  ഇറങ്ങാമെന്ന് വെച്ച്    നേരെ  ഹാളിൽ പോയി ടീവി കണ്ടിരുന്നു……അപ്പോഴേക്കും അച്ഛനും അമ്മയും ഉറങ്ങും…..

സമയം കടന്ന് പോയതും ടിവി നിർത്തി അച്ഛനും അമ്മയും കിടക്കുന്ന റൂമിന്റെ ഭാഗത്തേക്ക്‌ നടന്നു….നാല് മുറിയുളളതിൽ കിച്ചണിലേക്ക് പോകുന്ന വഴിയാണ് അവരുടെ റൂം….. പയ്യെ വാതിലിൽ  ചെവിയോർത്തതും  അമ്മയുടെ കൂർക്കം വലി കേട്ടു….. ഹാവു സമാധാനം……അമ്മക്ക് പിന്നെ

കട്ടിൽ കണ്ടാൽ മതി… അപ്പോ തന്നെ ആള്  ഉറങ്ങിക്കോളും😁……

പയ്യെ ഹാളിലെ ലൈറ്റ് ഓഫാക്കി  മുൻവശത്തെ വാതിൽ തുറന്ന് പിന്നിലേക്ക് നടന്നു ……

ആകാശത്തേക്ക് നോക്കിയിട്ട് കണ്ണടിച്ചു പോണ വെട്ടം….. മഴ പെയ്തിട്ട് മാനം തെളിഞ്ഞു നിൽക്കുന്നത് കൊണ്ട്  ഒടുക്കത്തെ നിലാവ്വ് ………

പയ്യെ മതിലിനടുത്തെത്തിയതും ചുറ്റുമൊന്ന് നോക്കി….. അയൽവക്കത്ത് വേറെ വീട് ഇല്ലെങ്കിലും നിലാവ് ഉളളതുകൊണ്ട്  ഒരു പേടി……. 😐

അങ്ങനെ മൂന്നാമത്തെ  മതില് ചാട്ടവും സംഭവിച്ചു 😅……..വേഗം നടന്ന് അടുക്കള വശത്തുളള അലക്ക് കല്ലിൽ പോയിരുന്ന് ഫോൺ എടുത്ത് കിച്ചൂസിനെ വിളിച്ചു……. ആദ്യത്തെ റിങ് മുഴുവനാക്കിയില്ല …..

‘ഹലോ അച്ചേട്ടാ…… എത്ര നേരായിന്നോ നോക്കിയിരിക്കണേ….

ഉറക്കം വന്നിട്ട്  കണ്ണടഞ്ഞു പോയി നേരെത്തെ ……. ‘

കിച്ചു ഫോൺ എടുത്തതും പയ്യെ  അടക്കി പിടിച്ചുകൊണ്ടാണ് സംസാരിക്കുന്നത് …….

“അച്ചോടാ……….സാരില്ലാട്ടാ ഉമ്മ്മ്മ്മ്മാ  ” 😊😅

ഹിഹി….. ഞാൻ കൊഞ്ചുന്ന പോലെ പറഞ്ഞത് കേട്ട് കിച്ചൂസിനും ചെറിയ ചിരി വന്നത് ഞാൻ കേട്ടു…….

‘എന്റ കിച്ചൂസ്സേ എല്ലാരും ഉറങ്ങാൻ കാത്ത് നിന്നതാ….. അമ്മു ഉറങ്ങിയോടി……..? ‘

കൊളളാം…. ഉറങ്ങിയോന്നാ…..അവിടെന്ന് വന്ന് ഡ്രസ്സ്‌ പോലും മാറാതെ കിടന്ന് നല്ല ഉറക്കാ പെണ്ണ്……

ആഹ് അതില്ലേ അച്ചേട്ടാ ഇന്ന് അച്ഛൻ എന്താ കുളത്തിന്റെ അവിടെക്ക് വിളിച്ചോണ്ട് പോയെ…. പെട്ടെന്നാണ് ആ കാര്യം ഓർമ വന്നപോലെ കിച്ചുപെണ്ണ് അത് ചോദിച്ചത്…..

കിച്ചുവിന് അതറിയാതെ സമാധാനം കിട്ടില്ലെന്ന്‌ ഉറപ്പാണ് 😅…..

അതവളുടെ ചോദ്യം കേട്ടാൽ തന്നെ അറിയാം……

മ്മ്മ്മ്മ്….. തോന്നി അതന്നെ  ആദ്യം ചോദിക്കുമെന്ന്……അതൊക്കെയുണ്ട് എന്റ കിച്ചൂസ്സേ……😘

‘എന്തോന്നാ അച്ചേട്ടാ…. എപ്പോഴും ഇങ്ങനെയാ …എന്നോട് ഒന്നും പറയില്ല….. ഞാൻ എന്ന  വെക്കാൻ പോവാ…….’

കിച്ചുപെണ്ണ് പിണങ്ങി തുടങ്ങി…. എന്നാലും കാര്യം അറിയാതെ അവൾ  ഫോൺ വെക്കില്ലെന്ന് എനിക്കറിയാം…..

ആഹാ വെക്കോ? … എന്ന വെച്ചോ….. വേഗം കിടന്ന് ഉറങ്ങിക്കോട്ട…. ഗുഡ് നൈറ്റ്….. ഞാൻ അതും പറഞ്ഞ് കുറച്ചുനേരം മിണ്ടാതെ നിന്നു……

‘ഹലോ………

ഹലോ അച്ചേട്ടാ….. ഹലോ…… ‘

ഞാൻ വെച്ചെന്ന് കരുതി വെപ്രാളപ്പെട്ട് കിച്ചു വിളിക്കുന്നത് കേട്ടപ്പോൾ ചിരി വന്നു  …

ഹിഹി…..ഞാൻ  എവിടേം പോയിട്ടില്ല…. ഇപ്പോ എന്റെ മോള് വേഗം  അടുക്കളവശത്തെ വാതിൽ തുറന്നെ……

‘ഏഹ്ഹ്???അച്ചേട്ടൻ ഇപ്പോ എവിടെയാ നിക്കണേ……… ‘😶

അവളുടെ ഞെട്ടൽ ആ ഒച്ചയിൽ വന്ന മാറ്റത്തിൽ അറിയാം 😄….

ഡീ പൊട്ടീ….. ഒച്ചയെടുക്കല്ലേ….. ഞാൻ പിന്നിൽ നിൽപ്പുണ്ട് …… ഒന്ന് വേഗം വാ എന്റ കിച്ചുവേ…….

ഞാൻ അതും പറഞ്ഞ് വേഗം ഫോൺ വെച്ചു… അല്ലേൽ അവൾ ഇപ്പോഴൊന്നും വരില്ല…….

കുറച്ച് കഴിഞ്ഞതും വാതിലിന്റെ കുറ്റി മാറുന്ന ഒച്ച കേട്ടു…..

പയ്യെ വാതിൽ തുറന്ന് നോക്കിയ കിച്ചു കണ്ടത് ചിരിയോടെ   അവളെയും നോക്കിയിരിക്കുന്ന എന്നെയാണ്…… ഒന്ന് കൂടി വീടിനുളളിലേക്ക് നോക്കികൊണ്ട് കിച്ചു മുറ്റത്തേക്കിറങ്ങി……..

എന്റെ ചിരി കണ്ടിട്ടാകണം  ഒരു നാണത്തോടെയാണ്   പെണ്ണിന്റെ വരവ്വ്…………

നിലാവിന്റെ വെട്ടത്തിൽ അവളെ കാണാൻ ഒരു വല്ലാത്ത  മൊഞ്ചായിരുന്ന്….. ഒപ്പനപാട്ടിലുളള മണവാട്ടിയെ ഒക്കെപോലെ….😌

‘മനസകമില്‍.. മുഹബ്ബത്ത് പെര്ത്ത്

നിനവുകള്‍ കുരുത്ത്

മഹര്‍മാലയെടുത്ത്

മധുമതിയാം മണിമങ്കക്കിണങ്ങുവാന്‍…………’

“യ്യോ ഡീ പിച്ചല്ലേ…. പിച്ചല്ലേ…..കിച്ചൂസ്സേ…………”

എന്റെ ഒച്ചകൂടിയതും കിച്ചു കൈവെച്ച് എന്റെ  വായ പൊത്തിപിടിച്ചു…….

ശോ  മനസ്സിൽ പാടിക്കൊണ്ടിരുന്ന വരി മുഴുവിക്കാൻ സമ്മതിക്കാതെ വയറ്റിൽ നല്ല പിച്ച് പിച്ചി……

ഞാൻ ആ വേദനയിലും അവളുടെ കൈവെളളയിൽ   മുത്തിയതും ചെറു ചിരിയോടെ പെണ്ണ്  എന്നിലേക്ക്  ചേർന്ന് നിന്നു ….. 😌

‘ഒരു പേടിയും ഇല്ലാത്ത ഇങ്ങനൊരു സാധനം…….ന്റ അച്ചേട്ടാ ഒരു ഷർട്ട് ഇട്ടൂടെ ‘…….

അതും പറഞ്ഞ് കിച്ചു

പയ്യെ എന്റെ കവിളിൽ പിടിച്ചൊന്ന്  വലിച്ചു വിട്ടു……..

ഞാൻ കല്ലിൽ ഇരുന്ന്കൊണ്ട് തന്നെ  അരക്കെട്ടിലൂടെ കൈകോർത്ത്‌  കിച്ചൂസിനെ  വട്ടം കെട്ടിപിടിച്ചു……..

‘മ്മ്മ് അച്ചേട്ടാ… എന്താപ്പോ  ഇങ്ങനെ വരാൻ തോന്നാൻ…..’ എന്റെ കവിളുകൾ കൈയിൽ കോരിയെടുത്തെന്ന പോലെ പിടിച്ചുകൊണ്ടാണ് കിച്ചു അത് ചോദിച്ചത്…….

‘മ്മ്മ് ….പറയാടാ കിച്ചൂസ്സേ……..’

ഞാൻ അതും പറഞ്ഞുകൊണ്ട് എണീറ്റ് കിച്ചുവിന്റെ കൈയിൽ പിടിച്ചുകൊണ്ട് നടന്നു…….

എവിടെക്കാ എന്ന് പോലും ചോദിക്കാതെ കിച്ചു എന്റെ കൈയിൽ മുറുക്കെ പിടിച്ചുകൊണ്ട് പിന്നാലെ നടന്നു……

എന്റെ നടത്തം അവസാനിച്ചത് കുളത്തിനരികിലാണ്…… മെല്ലെ അവളുടെ കൈയും പിടിച്ച് പടിക്കെട്ടിറങ്ങി……..

‘ഡി കിച്ചൂസ്സേ…. മുത്തശ്ശനെങ്ങാനും എണീക്കോ……. ‘കുളക്കടവിൽ നിന്ന് കാണാൻ പറ്റുന്ന ദൂരം ഉളെളങ്കിലും ചെറിയൊരു  പേടിയോടെ  ഞാൻ ചോദിച്ചു….

‘ഹിഹി… അപ്പോ പേടിയൊക്കെയുണ്ട് എന്റ ആൾക്ക് …….

പേടിക്കണ്ടാട്ടോ…… മുത്തശ്ശനേയ്യ്  മരുന്ന് കഴിച്ചേക്ക….അതോണ്ട് എണീക്കില്ലാട്ടോ…..’ കിച്ചു ഒരു ചിരിയോടെ അത് പറഞ്ഞപ്പോൾ ആ പേടിയും പോയി…… അമ്മൂസ് പിന്നെ രാവിലെ കുത്തിപൊക്കിയാലേ എണീക്കു…. അതുകൊണ്ട് അതിന്റെ പേടിയില്ല ……

ഞാൻ പയ്യെ പടിക്കെട്ടിലേക്കിരുന്നു…. കാലൊന്ന് നീട്ടിയാൽ വെളളത്തിൽ തൊടാം….. നിലാവ് അടിച്ച് വെളളത്തിന്  “കവര് ‘ അടിഞ്ഞത് പോലെ തിളക്കം….. കിച്ചൂസിനെ നോക്കിയപ്പോൾ രണ്ട് കൈയും  കെട്ടി എന്നെയും നോക്കിയാണ് പെണ്ണിന്റെ നിൽപ്പ്……

‘എന്താടി കിച്ചൂസ്സേ  ഇങ്ങനെ നോക്കണേ……..’ഞാൻ പുരികമുയർത്തി ചോദിച്ചത് കേട്ട്  കണ്ണടച്ചുകൊണ്ട് തോള്‌പൊക്കി ഒന്നുമില്ലെന്ന പോലെ പിന്നെയും ഒരു ചിരി…..

പെട്ടെന്നാണ് ഞാൻ ഇരുന്നയിരുപ്പിൽ കിച്ചൂസിന്റെ കാലിൽ ചുറ്റിപിടിച്ചതും ബാലൻസ് പോയി മുന്നോട്ട് വീഴാൻ പോയ  കിച്ചുവിനെ

വലിച്ച് മടിയിലേക്കിരുത്തിയതും….

എന്താണ് സംഭവിച്ചതെന്ന് മനസ്സിലാക്കുന്നതിന് മുന്നേ എന്റെ പെണ്ണിനെ ഞാൻ  കൈക്കുളളിലാക്കിയിരുന്നു ……

മടിയിൽ കണ്ണുമിഴിച്ചിരിക്കുന്ന  കിച്ചൂസിനെ കണ്ടപ്പോൾ എന്നിൽ  അറിയാതൊരു ചിരി തെളിഞ്ഞു…

പയ്യെ കിച്ചൂസിന്റെ  കവിളിൽ ചുണ്ടുകൾ  ചേർത്തൊന്ന്  ചുംബിച്ചതും പെണ്ണിനും ചിരി പൊട്ടി….. ഹിഹി……😊

എന്റെ കഴുത്തിലൂടെ കൈയിട്ടുകൊണ്ട് കിച്ചു എന്നിലേക്ക് ചാഞ്ഞു….. ആ തണുപ്പിലും അവളുടെ ശ്വാസം കഴുത്തിൽ അടിച്ചപ്പോൾ വല്ലാത്തൊരു  വല്ലാത്തൊരു അനുഭൂതി……

‘കിച്ചുവേ……. ‘

‘മ്മ്മ്….. ‘

കണ്ണടച്ചു കൊണ്ട് എന്റെ കഴുത്തിലേക്ക് ഒന്നുകൂടി  മുഖം ചേർത്തുകൊണ്ടാണ് പെണ്ണ് വിളി കേട്ടത്…

‘ഇങ്ങനെയിരിക്കാൻ ഒട്ടും പേടിയില്ലേ പെണ്ണെ….. ഞാൻ കൈയിൽ പിടിച്ച് നടന്നപ്പോ എവിടേക്കാന്ന് പോലും ചോദിക്കാതെ കൂടെ വന്നേക്കണു….

ഇങ്ങനൊരു പൊട്ടി…… ‘

ഞാൻ എന്തിനാ പേടിക്കണേ ……. എന്റെ അച്ചേട്ടന്റെ കൂടെയല്ലേ വന്നത്…….. ഇങ്ങനൊരു ബുദൂസ്സ്…..

ഹിഹി…. അതും പറഞ്ഞ് കിച്ചു പയ്യെ ചിരിക്കാൻ തുടങ്ങി…….

പാവത്തിന്  പിന്നേം ചിരി തന്നെ…..

അത് കേട്ടതും ഞാൻ അവളെ ഒന്നൂടെ മുറുക്കെ കെട്ടിപിടിച്ചു……

എന്നാലേ നാളെ എന്റെ മോള്  ചെറുതായിട്ടൊന്ന് ഒരുങ്ങി നിന്നോട്ടാ…..  അച്ഛനും അമ്മയും മാമനും അമ്മായിയും കൂടി അങ്ങോട്ടൊന്ന്  വരും…

ഞാൻ അത് പറഞ്ഞ്തീർന്നതും കിച്ചു തലയുയർത്തി  എന്നെ കണ്ണുമിഴിച്ചൊരു നോട്ടം….

‘എന്തിനാ അച്ചേട്ടാ എല്ലാരും കൂടി വരണേ…. ‘ തെല്ലൊരു ആകാംഷയോടെ കിച്ചു ചോദിച്ചത് കേട്ടപ്പോൾ  എനിക്ക് എങ്ങനെയത് പറയണമെന്നൊരു കൺഫ്യൂഷൻ….

നിന്നോടാരാ എണീക്കാൻ പറഞ്ഞെ…. കിടക്കെടി അവിടെ 😆…… അതും പറഞ്ഞ് ഞാൻ കിച്ചുവിനെ പിന്നെയും എന്റെ തോളിലേക്ക് തല ചായ്ച്ചു കിടത്തി………

മ്മ്മ്, അതെയ് നാളെ ഒരുങ്ങി നിക്കാൻ പറഞ്ഞ അങ്ങോട്ട് നിന്ന മതി……. അല്ലാതെ  കോലംകെട്ട് ഒക്കെ  നിന്ന മോന് പെണ്ണ് ആലോചിക്കാൻ വന്നിട്ട് പെണ്ണിനെ  ഇഷ്ടപ്പെടാതെ അവരങ്ങ് പോകും…..

പറഞ്ഞില്ലെന്ന് വേണ്ട….

ഓറ്റ ശ്വാസത്തിൽ ഞാനത് പറഞ്ഞതും  കിച്ചുവിന്റെ  ഞെട്ടൽ ഞാനറിഞ്ഞു……പെണ്ണ് ആകെ മരവിച്ച പോലെ…..

ഏഹ് ഇതെന്താണ് ഒരു സന്തോഷം ഇല്ലാത്തെ….. ഞാൻ കരുതി കേൾക്കുമ്പോ കുറെ ഉമ്മയൊക്കെ തരുമെന്ന്………

‘ഡി കിച്ചൂസ്സേ…….’

ഞാൻ പറഞ്ഞതൊക്കെ കേട്ടിട്ടും ഒരനക്കവും ഇല്ലാത്തതുകൊണ്ട് ഞാൻ പയ്യെ കിച്ചുവിന്റെ മുഖം കഴുത്തിൽ നിന്നും മാറ്റാൻ നോക്കി…

എന്റെ കൈ തട്ടിമാറ്റിക്കൊണ്ട് ഒന്നുകൂടി അവൾ   മുഖം കഴുത്തിലേക്ക്  ചേർത്തുകൊണ്ട് രണ്ടു കൈകൊണ്ടും എന്റെ കഴുത്തിൽ ചുറ്റിപിടിച്ചു……

കഴുത്തിൽ നനവ്  പടർന്നപ്പോഴാണ്

എന്നെ നോക്കാത്തതിന്റെ കാര്യം പിടികിട്ടിയത്……..വിതുമ്പൽ അടക്കാൻ പെണ്ണ് വല്ലാണ്ട് കഷ്ട്ടപെടുന്നുണ്ട്…..

ഇതെന്താപ്പോ പറ്റ്യേ……..അയ്യേ…

ഡി പെണ്ണെ……..ഇങ്ങോട്ട്  നോക്ക്യേ..

അതിനും മറുപടി ഒന്നൂടെ മുറുക്കെയുളള കെട്ടിപ്പിടിക്കൽ തന്നെ……..

ആഹാ……. ദേ എണീറ്റില്ലേൽ എടുത്ത് ഞാൻ കുളത്തിലെറിയുമെന്ന് പറഞ്ഞതും കിച്ചുപെണ്ണിന്റെ ചിരി ഞാൻ കേട്ടു……. ഹിഹി……. എണീക്കെന്റെ കിച്ചുവേ………

അത് കേട്ടതും കിച്ചു കണ്ണൊക്കെ തുടച്ച് ഒരു കുഞ്ഞു ചിരിയോടെ എന്റെ മുഖത്തേക്ക് നോക്കിയിരുന്നു……

എന്തിനാപ്പോ കരഞ്ഞേ…….മ്മ്മ്?

കൺപീലികളിൽ പറ്റിയിരുന്ന നനവ് കൂടെ തുടച്ചു കൊണ്ട് ഞാൻ ചോദിച്ചതും കിച്ചു  എന്റെ ചുണ്ടുകളിലേക്ക് അവളുടെ കുഞ്ഞുചുണ്ടുകളെ ചേർത്ത്  നുണഞ്ഞതും ഒരുമിച്ചായിരുന്നു…. 😌

പെട്ടെന്നുളള അവളുടെ നീക്കത്തിൽ ആദ്യമൊന്ന് അമ്പരന്നെങ്കിലും പയ്യെ ഞാനും നുണയാൻ തുടങ്ങി…….

അപ്പോ  പെണ്ണിനും അറിയാം

ഒക്കെ 😊…..മുഖത്ത് നോക്കാതെ കളളച്ചിരിയോടെ പിന്നെയും എന്റെ തോളിലേക്ക് ചാഞ്ഞു…..

എന്റെ ശരീരത്തിലേക്ക് പടരുന്ന പെണ്ണിന്റെ ചൂടിൽ അങ്ങനെയിരിക്കാൻ ഒരു സുഖം…..

ഡി ഉറങ്ങിയാ……..കിച്ചൂന്റെ അനക്കം ഇല്ലാത്തത് കൊണ്ട് ഞാൻ പതിയെ തട്ടി വിളിച്ചു…..

‘മ്മ്മ്മ്……..ഇങ്ങനെയിരിക്കാൻ നല്ല രസോണ്ട് അച്ചേട്ടാ…….’

തോളിൽ കിടന്നുകൊണ്ട് തന്നെ എന്നെ നോക്കിയത് പറഞ്ഞ കിച്ചുപെണ്ണിനെ ഒരു കൊച്ചുകുട്ടിയോടെന്ന പോലെ വാത്സല്യമാണ് തോന്നിയത്……..

ഞാനും പയ്യെ കണ്ണടച്ചു പെണ്ണിന്റെ മുഖത്തോട് മുഖം ചേർത്തിരുന്നു……

‘അച്ചേട്ടാ  ദേ സമയം കുറച്ചായിട്ടാ…. ‘

കിച്ചു അത് പറഞ്ഞപ്പോളാണ് ഞാൻ  കണ്ണ് തുറന്നത്……..

‘മ്മ്മ്…….വിടാൻ തോന്നണില്ല പെണ്ണെ……എന്നാലും പോകാം…..’ ഞാൻ അതും പറഞ്ഞ് പയ്യെ കൈ അയച്ചു……. കിച്ചു എണീറ്റ് മുടി വാരിക്കെട്ടിയത് നോക്കിയിരുന്ന എന്നെ കിച്ചു കൈയിൽ പിടിച്ചു വലിച്ച് എണീപ്പിച്ചു……

സമയം 12 ആയി…….കിച്ചുവിനെ ചേർത്ത് പിടിച്ച് വീടിന്റെ പിൻവശത്തേക്ക് പോയി……

പയ്യെ വാതിൽ തുറന്ന് അകത്തേക്ക് കേറിയ കിച്ചു പെട്ടെന്ന് എന്തോ ഓർത്തെന്ന പോലെ നിന്നു…….

‘അച്ചേട്ടാ നാളെ ഏത് ഡ്രെസ്സാ ഇടണ്ടേ…? ‘ശബ്ദം താഴ്ത്തിയാണ്‌ അവളത് ചോദിച്ചത്….

, മ്മ്മ്…… നാളെ….. അന്ന് വാങ്ങിച്ച റോസ് ചുരിദാർ ഇട്ടാമതിയെടി…… ‘

“മ്മ്മ്മ്മ്… ന്നാ അതിടാ അച്ചേട്ടാ  😊”..

ഞാൻ പറഞ്ഞ ഡ്രസ്സ്‌ തന്നെയായിരുന്നു ആളുടെ മനസ്സിൽ എന്ന് ആ ചിരി കണ്ടാൽ അറിയാം…

കിച്ചു വാതിലടച്ചതും ഞാൻ മതില് ചാടി വീട്ടിലേക്ക് നടന്നു……..

ചാരിയിട്ടിരുന്ന മുൻവശത്തെ വാതിൽ പയ്യെ തുറന്ന് അകത്തേക്ക് കേറി…..മുറിയിലെത്തി കട്ടിലിലേക്ക് കേറി പുതപ്പെടുത്ത് മൂടി തലയിണയും കെട്ടിപിടിച്ച്  കിടന്നതും വേഗം ഉറങ്ങി……

രാവിലെ  അമ്മ  പതിവ് ചായയുമായി വിളിച്ചപ്പോഴാണ്‌ എണീറ്റത്……എണീറ്റ് ചായ വാങ്ങിയതും മാർക്കറ്റിൽ പോയി മീൻ വാങ്ങുന്ന കാര്യം ഓർമിപ്പിച്ച് അമ്മ പോയി……

ചായകുടി കഴിഞ്ഞ് പുതപ്പ് മാറ്റിയതും പതിവ് പോലെ  മുണ്ടില്ല..അത് സ്ഥിരം അഴിഞ്ഞു കിടക്കാറുളള  കട്ടിലിന്റെ സൈഡിൽ നിന്നും എടുത്തുടുത്തു😆…..

രാത്രി ആരേലും വന്ന് അഴിച്ച് കളയുന്നതാണോ എന്ന് വരെ ആലോചിക്കാറുണ്ട് …….😅

വേഗം പല്ലുതേച്ച്  ഷർട്ടിട്ട്  മുറ്റത്തേക്കിറങ്ങി…….. അച്ഛൻ ബൈക്കും കൊണ്ട് ക്ലബിൽ പോയിട്ടുണ്ട്….. രാവിലെ തന്നെ ക്ലബിൽ പോയി അവിടന്നൊരു ചായ  കുടിച്ചില്ലേൽ അച്ഛനൊരു സമാധാനം കിട്ടില്ല……  ഞാൻ  വേഗം കാർ എടുത്ത് മാർക്കറ്റിലേക്ക് വിട്ടു……

മാർക്കറ്റിലേക്ക് കാറ് കേറ്റാൻ പോയില്ല…..റോഡ്സൈഡിൽ പാർക്ക്‌ ചെയ്തിട്ട് നല്ല പുഴമീൻ മാത്രം വിൽക്കുന്ന  ലതികചേച്ചിയുടെ തട്ടിലേക്ക് നടന്നു……  മീഡിയം സൈസ് കരിമീൻ ഒരു 10 എണ്ണം  വാങ്ങി…. തൂക്കം നോക്കി വാങ്ങിയാൽ ചെറുതും വലുതും ഒക്കെയിട്ട് തരും….പിന്നെ കഴിക്കുമ്പോൾ ഒരാൾക്ക് ചെറുതും  മറ്റേയാൾക്ക് വലുതും ഒക്കെ കിട്ടും……അതാണ്  സൈസ് നോക്കി വാങ്ങിയത്.

ഒരു 700 രൂപയും കൊടുത്ത് വരുന്ന വഴി അമ്മൂസിന് വേണ്ടി ഒരു ചെറിയ ചിക്കനും വാങ്ങി വീട്ടിലേക്ക് വിട്ടു…..

അമ്മ അടുക്കളയിൽ തകർക്കുന്ന സൗണ്ട് ഹാളിൽ കേൾക്കാം……..

അമ്മോയ്യ് ദേ ‘ മീമി ആൻഡ്  ചിക്കു റെഡി….. ‘ഞാൻ അതും പറഞ്ഞ് അടുക്കളയിലേക്ക് ചെന്നതും അമ്മയുടെ വായീന്ന് ചെറുതായിട്ട് കേട്ടു….. മീൻ വാങ്ങിയാൽ പുറത്തേക്കൂടെ കൊണ്ടുവന്നോണം എന്ന് പറഞ്ഞാൽ കേൾക്കില്ലന്നെ ഞാൻ…….. ഓർക്കാതെ  ഉളളിലൂടെ

കേറിപ്പോകും 😂😆……

ഇറയത്ത് ഫോണും നോക്കിയിരുന്നപ്പോഴാണ് അച്ഛൻ വന്നത്…… മാമനൊക്കെ എപ്പോ വരുമെന്ന് ചോദിക്കണമെന്ന് ഉളളിൽ തോന്നിയെങ്കിലും ചോദിച്ചില്ല 😅….

അച്ഛനെ മൈൻഡ് ചെയ്യാതെ വാട്ട്സ്ആപ്പ് നോക്കിയിരുന്നു…..

കൊടുങ്ങലൂരുളള ഹെവി ഡ്രൈവേഴ്സിന്റെ ഒരു ഗ്രൂപ്പ്‌ ഉണ്ട്…. “അധോലോകം ഡ്രൈവേഴ്സ് “……

പേര് കേൾക്കുമ്പോൾ തന്നെ  തറ ഗ്രൂപ്പ്‌ ആണെന്ന് തോന്നുന്നുവെങ്കിൽ അത് നഗ്നമായ  സത്യം മാത്രം 😅….

ഇതിൽ വരാത്ത തുണ്ടുകൾ ഇല്ലെന്ന് തന്നെ പറയാം…… 😇

അത്രക്കും മഹനീയമാണ് ഗ്രൂപ്പ്‌ 😆…

പക്ഷെ കാര്യം എന്തൊക്കെ പറഞ്ഞാലും റോഡിൽ എവിടൊക്കെയാണ്

ഹൈവേ പോലീസ് ചെക്കിങ്, എവിടൊക്കെയാണ് വെഹിക്കിൾ ഇൻസ്‌പെക്ടർ കിടക്കുന്നത്,

ഇന്റർസെപ്റ്റർ സ്‌ക്വാഡ്  കിടക്കുന്നത് ഏത് ഭാഗത്താണ്….. ഇതൊക്കെ അറിയാൻ ഗ്രൂപ്പ് നോക്കിയാൽ മതി……

പിളേളര്  ഒക്കെ ചെക്കിങ് കാണുമ്പോൾ തന്നെ  കറക്ട് ആയിട്ട്  ഇട്ടിട്ടുണ്ടാകും …..അത്കൊണ്ട് തന്നെ കുറെ ഫൈൻ ഒഴിഞ്ഞു പൊക്കോളും..

‘ഡാ നീ അവരെയൊന്ന് വിളിച്ച് നോക്ക്യേ…ആവശ്യമുളള കാര്യങ്ങൾക്ക് കൃത്യമായി വൈകി വരാൻ നിന്റെ മാമനെ കഴിഞ്ഞിട്ടേ വേറെ ആളുളളു……’

അച്ഛൻ ഹാളിൽ നിന്നത് വിളിച്ച് പറഞ്ഞത് കേട്ടപ്പോൾ മാമന്റെ സ്വഭാവം  ഒരു നിമിഷം മനസ്സിലേക്ക് ഓടിയെത്തി….. 😁

മാമൻ KSRTC ഡ്രൈവറാണ്‌ …..

ഞാനും മാമനും ഒടുക്കത്തെ കമ്പനിയാണ്……..

പിന്നെ നമ്മുടെ KSRTC ബസ്സ്‌ പോലെ ആവശ്യമുളളപ്പോൾ  കൃത്യമായി വൈകി വരുന്ന സ്വഭാവം, അത് കിറുകൃത്യമായി മാമൻ ഇന്നും പാലിക്കുന്നുണ്ട് 😆😂..

അതാണ് അച്ഛൻ അങ്ങനെ പറഞ്ഞത്…

പക്ഷെ ഒന്നുണ്ട്……….

ഒരാപത്ത് വന്നാൽ……….

പണ്ട് പ്രളയത്തിൽ KSRTC  ഓടിയെത്തിയത് പോലെ,…… എൻജിന്റെ അവസാന തുടിപ്പ് നിൽക്കും വരെ കൂടെയുണ്ടാകും.

അങ്ങനൊരു മൈൻഡ് ആണ് പുളളിയും……

പിന്നെ മാമനും അമ്മായിക്കും  മക്കളില്ലട്ടാ…… എന്ന് വെച്ച് അതിന്റെ വിഷമമൊന്നും അവർക്കില്ല……. രണ്ടും ഫുൾ ഹാപ്പിയാണ്…..😌

“ലൈഫ് ബിഗിൻസ്സ് 40 ” എന്നാണ് പുളളിയുടെ  കാഴ്ചപ്പാട്…

കല്യാണം കഴിഞ്ഞ് 15 വർഷം ആയെങ്കിലും രണ്ടും ഇപ്പോ കല്യാണം കഴിഞ്ഞ പോലെയാണ് നടപ്പ്…. അല്ല, അതിനും മാത്രം പ്രായവും ഇല്ല… മാമന് 42ഉം, അമ്മായിക്ക് 35ഉം ഉളളു….

ഞാൻ ഫോണെടുത്ത് വിളിച്ചതും

ഒന്ന് രണ്ട് റിങ് കഴിഞ്ഞപ്പോൾ തന്നെ  അമ്മായി ഫോൺ  എടുത്തു ……..

‘ആഹ് ഹലോ….. ഡാ അച്ചു…… ‘

“എന്റ ദൈവമേ…. നിങ്ങളിത്‌ വരെ  പുറപ്പെട്ടില്ലേ………. ”

“ഹിഹി…. ഞങ്ങൾ അരമണിക്കൂർ മുന്നേ പുറപ്പെട്ടു……… വേണേൽ ഒരു മണിക്കൂർ മുന്നേ പുറപ്പെടാം…. 😄”

ഹിഹി…. ഞാനും അമ്മായിയും പണ്ടേ ഇങ്ങനെയാണ്‌….. തമ്മിൽ ഒടുക്കത്തെ കെമിസ്ട്രിയാണ്……

എപ്പോഴും ഇങ്ങനെ എതെങ്കിലും  സിനിമ ഡയലോഗ് പറയലും  കൗണ്ടർ അടിയും ഒക്കെയാണ് 😁….

‘അമ്മായീ…. എപ്പോഴാ  എത്തണെ..? ‘

‘ഓഹ് എന്താ അവന്റൊരു വെപ്രാളം….. 😄’

ഹിഹി….. അച്ഛൻ പറഞ്ഞിട്ട് വിളിച്ചതാ എന്റെ അമ്മായീ….,😅

എന്ന ശെരി….. വെക്കട്ടെ….

മ്മ്മ്മ്മ്…. എന്നാലും ഒക്കെ ഒപ്പിച്ച് വെച്ചിട്ട് നീ ഞങ്ങളോട് ഒരു വാക്ക് പറഞ്ഞില്ലല്ലോടാ…….

അതൊക്കെ അങ്ങനെ സംഭവിച്ച് പോയതാ പെണ്ണെ. …… വേഗം വരാൻ നോക്ക്….. ബാക്കിയൊക്കെ നേരിട്ട് പറയാം…….ഓക്കേ…..

മ്മ്മ്മ്മ്…. ശെരി…… ന്നാ വെച്ചോ…. അമ്മായി അതും പറഞ്ഞ് ഫോൺ വെച്ചു….ഇനി എന്നെകൊണ്ട് കിച്ചൂസിനെ ആദ്യം കണ്ടപ്പോ മുതലുളള കഥ പറയിക്കും……. 😊

ഞാൻ വേഗം കുളിക്കാനുളള  തയ്യാറെടുപ്പ് തുടങ്ങി…….

ഇടക്ക് ഒരു തോന്നലിന് പുഷപ്പ് ഒക്കെ എടുക്കും…..വേഗം കുളി കഴിഞ്ഞ് ഒരു  ട്രാക്ക് പാന്റും ടീഷർട്ടും എടുത്തിട്ട് ഹാളിലേക്ക് പോയി ….. അച്ഛൻ ആഹാരം കഴിക്കുന്നുണ്ട്…….

തൊട്ടടുത്ത് കസ്സേരയിട്ട് അമ്മയും വിളമ്പികൊടുത്ത് അടുത്തിരിപ്പുണ്ട്….

‘അമ്മു വന്നില്ലേ അമ്മേ…….. ‘ഞാൻ അതും ചോദിച്ച് ടീവി ഓണാക്കി സോഫയിലേക്ക് ചാഞ്ഞു….

ഇല്ലടാ… രാവിലെ ഞാൻ പോയി നോക്ക്യപ്പോ മോള് എണീറ്റിട്ടില്ല…..

നിനക്ക് കഴിക്കാൻ എടുക്കട്ടേ……

മ്മ്മ് കുറച്ച് കഴിയട്ടെ…..

ഞാൻ പിന്നെയും ടീവിയും നോക്കി കിടന്നു…. അപ്പോഴാണ് കിളികൾ  ഒച്ചയെടുക്കുന്നത് കേട്ടത്…..

ചെറുതും വലുതും ഒക്കെയായി പത്ത് മുപ്പത് ലവ്ബേർഡ്‌സ് ഉണ്ട്….

ഞാൻ വേഗം എണീറ്റ് അടുക്കളയിൽ നിന്ന് തെനമണിയും എടുത്ത് പിന്നിലേക്ക് നടന്നു….. തുറന്ന് വിട്ടാൽ കാക്കയും പരുന്തും കൊത്തിയാലോ എന്ന് പേടിച്ചിട്ടാണ്‌….. അല്ലേൽ പണ്ടേ തുറന്ന് വിട്ടാനെ……..തമിഴ്നാട്ടിൽ നിന്ന് നാല്  കിളിയെ വാങ്ങിയതാ…..അതിന്  കുഞ്ഞുണ്ടായി,  അതിന്റെ കുഞ്ഞിനും കുഞ്ഞുണ്ടായി  ഇപ്പോ കൂടും വലുതാക്കേണ്ട അവസ്ഥ വന്നു..

കൂട്ടിലേക്ക് തെന എറിഞ്ഞുകൊണ്ടിരുന്നപ്പോഴാണ് അച്ചുച്ചേട്ടാന്നും പറഞ്ഞ്  അമ്മൂസ്  പിന്നിലൂടെ വന്ന് കെട്ടിപിടിച്ചത്…..

ആഹ് ഇതെന്ത് പറ്റി എന്റ മോൾക്ക് എണീക്കാൻ തോന്നാൻ….. അവള് ഫാൻ ഓഫാക്ക്യ?  അമ്മൂസിന്റെ രണ്ട് കൈയിലും കൈ ചേർത്ത് പിടിച്ച് ചിരിയോടെയാണ് ഞാനത് ചോദിച്ചത്…..

പിന്നെ……ഇന്ന് ഞാൻ തന്നെയാ എണീറ്റെ………ദേ കുളിച്ച് നല്ല കുട്ടിയായിട്ടാ വന്നേക്കണേ…….

അതും പറഞ്ഞ് അമ്മൂസ് എന്റെ പുറത്ത് മുഖം ചേർത്ത് പിടിച്ചു…..

അതേയ് അച്ചുച്ചേട്ടാ…. എപ്പോഴാ കിച്ചേച്ചിയെ പെണ്ണ്കാണാൻ വരണെ…….

അമ്മൂസ്സിന്റെ വർത്താനം കേട്ടാൽ ചിരി വരും….   ഇവളുടെയൊരു കാര്യം… 😆

ആഹാ അതാണ് നേരത്തേ എണീറ്റ് ചുന്ദരിയായത് അല്ലേ…… അതൊക്കെ അങ്ങോട്ട് എത്തിക്കോളാം….

രാവിലെ വല്ലതും കഴിച്ചോടാ …….?

‘ഏയ്യ് ഇല്ലാ…. കിച്ചേച്ചി ഉപ്പുമാവാ ഉണ്ടാക്കിയേക്കണേ…. എനിക്കൊന്നും വേണ്ട….. അമ്മ എന്താ ഉണ്ടാക്കിയേക്കണേ……? ‘

‘ഹിഹി… അവിടെയും ഉപ്പുമാവ് ആണെടി…… ‘അമ്മൂസിനെ പറ്റിക്കാൻ വെറുതെ പറഞ്ഞതാ… അമ്മ നൂലപ്പവും മുട്ടക്കറിയും വെച്ചത് കണ്ടിട്ടാണ് ഞാൻ വന്നത്…..

‘യ്യ്യോ…. അവിടേം അതന്നെയാ….. ശോ……മ്മ്മ്… എന്നാലും സാരില്ല… അവിടെന്ന് കഴിക്കാം…. ‘

ഹിഹി…. വെറുതെ പറഞ്ഞതാടി…..

അവിടെ നൂലപ്പവും മുട്ടക്കറിയും ആണെടി…… ഹോ ഞാൻ അത് പറഞ്ഞതും അവളുടെ കൊതി കാണണം…..പിന്നെ  അമ്മൂസിനേം കൊണ്ട് നേരെ വീട്ടിലേക്ക് നടന്നു…..

അടുക്കളവാതിലിലൂടെ അകത്തേക്ക് കേറിയതും അച്ഛൻ കഴിച്ച പാത്രമൊക്കെ എടുത്ത് അമ്മ അടുക്കളയിലേക്ക് എത്തി…..

അമ്മുവിനെ കണ്ടാൽ പിന്നെ അമ്മക്ക് വേറെ ആരും വേണ്ട…..

‘അമ്മേ ദേ നല്ല വിശപ്പുണ്ടെന്ന്’ അമ്മു  പറഞ്ഞതും പിന്നെ കാണുന്നത്  അമ്മ എല്ലാം അവിടെ വെച്ച്  പ്ലേറ്റ് എടുത്ത് അവളെയും കൊണ്ട് ഹാളിലേക്ക് പോയതാണ്…… നൂലപ്പം വെക്കലും കറി ഒഴിക്കലും ഒക്കെയായി അമ്മ കൊച്ചിനെ അടുത്തിരുത്തി കഴിപ്പിക്കാൻ തുടങ്ങി…… അമ്മക്ക് അമ്മൂസിനോടുളള സ്നേഹം കാണുമ്പോ ഇടക്ക് അറിയാതെ  കണ്ണ് നിറയും…..

‘അല്ല ഇതെന്താണ് എന്നെ തവിട് കൊടുത്ത് വാങ്ങിയതാണാ…….. ‘

ഞാൻ അടുത്ത് നിൽക്കുന്നത് പോലും അമ്മ മൈൻഡ് ചെയ്തില്ല….. ഞാൻ വേഗം ഒരു പ്ലേറ്റ് എടുത്ത് ഫുഡുമായി  സോഫയിൽ പോയിരുന്ന് കഴിക്കാൻ തുടങ്ങി….ഇന്ന് അധികം കഴിക്കാൻ പറ്റിയില്ല….

ഒരു 7 എണ്ണത്തിൽ നിർത്തി….. 😑…

കൈകഴുകി മുറിയിൽ കേറി വണ്ടി ഓടിയതിന്റെ കണക്ക് എഴുതാൻ ബുക്ക്‌ എടുത്ത് കട്ടിലിലേക്ക് കേറി….

ശെരിക്കും സ്വന്തം വണ്ടി ഓടിക്കുമ്പോൾ  ഇതൊന്നും എഴുതേണ്ട കാര്യമില്ല…. പിന്നെ പണ്ട് മുതൽ ശീലിച്ചുപോയത് കൊണ്ട് എഴുതുന്നു എന്ന് മാത്രം….

കുറച്ച് കഴിഞ്ഞപ്പോഴാണ് അമ്മൂസ് മുറിയിലേക്ക് വന്നത്…. അത് നേരെ വന്ന് കട്ടിലിലേക്ക് ചാഞ്ഞു….

എന്താടി…ഫുഡ് അടിച്ചു ക്ഷീണിച്ച…

എഴുത്തിൽ നിന്ന് കണ്ണെടുക്കാതെ എന്റെ ചോദ്യത്തിന് അമ്മു ഒന്ന് നെടുവീർപ്പിട്ടുകൊണ്ട് എനിക്ക് നേരെ തിരിഞ്ഞു കിടന്നു…..

അച്ചുച്ചേട്ടാ……അമ്മൂസിന്റെ കൊഞ്ചിയുളള വിളി കേൾക്കാൻ  ഒരു പ്രേത്യേക രസോണ്..

എന്തോ ……. ഞാൻ അതെ ടോണിൽ തന്നെ വിളിയും കേട്ടു…….

മ്മ്മ്മ്മ് ഒന്നുല്ല…. വെറുതെ വിളിച്ചതാ…… 😊

ഇതെന്താ ഈ കണക്ക് കൂട്ടുന്നെ എന്നും ചോദിച്ച് അവൾ ബുക്ക്‌ എടുത്ത് നോക്കാൻ തുടങ്ങി…..

മ്ച്ച്  …… ഇവളിത്……..

പിന്നെ നോക്കിയ ഇപ്പോ മനസ്സിലാക്കാനും പറ്റും😆…

അപ്പോഴാണ്  മുറ്റത്ത്‌ ഹെലികോപ്റ്റർ  വന്ന പോലൊരു  സൗണ്ട് കേട്ടത്…… 😆

‘ആഹ് ഡി , ദേ മാമൻ ഒക്കെയെത്തി….’ ഞാൻ അതും പറഞ്ഞ് എണീറ്റത്തിന് പിന്നാലെ അമ്മുവും  എന്റെ പിന്നലെ  വന്നു…..

1994 മോഡൽ ഒരു ബ്ലാക്ക്  അംബാസ്സഡർ ആണ് വണ്ടി……

‘യെവൻ പുലിയാണെന്ന് പറയുന്ന പോലെ ‘😅 ഇപ്പോഴും ചവിട്ടിപ്പിടിച്ചാൽ പറ പറക്കും…….

ഞാൻ മുറ്റത്തേക്കിറങ്ങി  കാറിൽ നിന്ന്  ബേക്കറി സാധനങ്ങൾ വാങ്ങിയത് പിൻസീറ്റിൽ നിന്നെടുക്കുന്ന അമ്മായിയുടെ അടുത്തേക്ക് നടന്നു….. മാമൻ ഗേറ്റ് അടക്കാൻ പോയി വരുന്നുണ്ട്…….

ഞാൻ അടുത്ത് ചെന്നതും അമ്മായി പതിവ് പോലെ  കെട്ടിപിടിച്ചു….

കവർ എല്ലാം എടുത്തപ്പോഴേക്കും മാമനും വന്നു…..എന്റെ പുറത്ത് രണ്ട് ഇടിയൊക്കെ ഇടിച്ച് എന്റെ തോളിൽ കൈയിട്ടാണ് നടപ്പ്….. ഇറയത്തേക്ക് കേറിയതും അമ്മയുടെ ഒപ്പം നിൽക്കുന്ന അമ്മൂസിനെ കണ്ടതും അമ്മായി അവളെ ചേർത്ത് പിടിച്ച് വിശേഷങ്ങൾ ചോദിക്കാൻ തുടങ്ങി…. അമ്മായിയുടെ സ്നേഹം കണ്ടാൽ ആദ്യമായാണ് അമ്മുവിനെ കാണുന്നതെന്ന് ആരും പറയില്ല….. മാമനും അമ്മുവിനോട് വിശേഷം ഒക്കെ ചോദിച്ച് ഇറയത്ത് പത്രം വായിച്ചിരുന്ന അച്ഛന്റെ അടുത്ത് പോയിരുന്നു… സമയം 11 ആയിട്ടുളളു……

പതിവ് സംസാരം ഒക്കെ കഴിഞ്ഞ് അകത്തേക്ക് കേറിയതും അച്ഛൻ എന്നാ ഇനി വൈകിക്കണ്ട….. അവിടേക്ക് പോയാലോ എന്ന് ചോദിച്ചതും എന്റെയുളളിൽ  ചെറിയൊരു  ഞെട്ടലും മുഖത്ത് അറിയാതൊരു ചിരിയും ഒക്കെ വന്നുപോയി  ….. അത് വേറെ ആര് കണ്ടില്ലെങ്കിലും എന്റെ കൊച്ച് അത് കണ്ടുപിടിക്കും 😊…..അമ്മൂസിന്റെ നെറ്റി ചുളിച്ചുളള നോട്ടം കണ്ടപ്പോൾ ചിരി അടക്കാനായില്ല…..

ഞാൻ നൈസ് ആയിട്ട് ഫോൺ എടുത്ത്  കിച്ചുവിന് ഇപ്പോ വരുമെന്ന് മെസ്സേജ്  അയച്ചു…..അച്ഛൻ മുറിയിൽ കേറി ഷർട്ടും മുണ്ടും മാറി ഇറയത്ത് പോയിരുന്നു…. അമ്മ വീട്ടിലുടുക്കുന്ന സാരി മാറി  സെറ്റ് സാരി ഉടുത്തതോടെ എല്ലാവരും റെഡി…

ശോ ഇതിപ്പോ  കാര്യങ്ങൾ സംസാരിക്കാൻ പോകുമ്പോ ഞാൻ കൂടെ പോകണോ വേണ്ടയോ എന്നൊക്കെ ഒരു ചിന്ത മനസ്സിലേക്ക് വന്നു……  ആരെങ്കിലും വിളിച്ചിരുന്നേൽ നൈസ് ആയിട്ട് കൂടെ പോകായിരുന്നു….

അതും ആലോചിച്ച് ചുറ്റിപ്പറ്റിനിന്നപ്പോഴാണ് എന്നോട്

അമ്മ  ഡ്രസ്സ്‌ മാറുന്നില്ലേടാ എന്ന് ചോദിച്ചത്… അത് കേട്ടതും ഏയ്യ് ഇത് തന്നെ മതിയെന്നും പറഞ്ഞ്  ഞാൻ വേഗം ഇറയത്തേക്ക് പോയി ….

അച്ഛൻ ഇരിക്കുന്നത് കൊണ്ട് മാമന് എന്നോട് കാര്യങ്ങൾ ഒന്നും ചോദിക്കാൻ പറ്റാത്ത അവസ്ഥയാണ് 😄….

അമ്മയും അമ്മായിയും വാതിൽ ചാരി ഇറങ്ങിയതോടെ അമ്മൂസ് എന്റെ കൈയിൽ തൂങ്ങി നിന്നു….

അച്ഛൻ ആദ്യം മുണ്ടും മടക്കികുത്തി  നടന്നു… മുൻവശത്തെ റോഡിലൂടെ ശെരിക്കുമുളള വഴിയിലൂടെയാണ് അവിടേക്ക് പോയത്….മാമനും അമ്മായിയും അമ്മയും കൂടി എന്തൊക്കെയോ പറഞ്ഞ് ചിരിയോടെയാണ് നടപ്പ്…. പിന്നാലെ  ഞാനും അമ്മൂസും കൂടി നടന്നു……

അവിടേക്ക് എത്തിയതും മുത്തശ്ശൻ വെളള മുണ്ടും ഷർട്ടും ഒക്കെയിട്ട് കസ്സേരയിൽ ചാരിയിരിപ്പുണ്ട്….

ഞങ്ങളെ കണ്ടതും ഒരു ചിരിയോടെ ഊന്നുവടി താങ്ങി എണീക്കാൻ നോക്കിയതും അമ്മ വേഗം ചെന്ന് പിടിച്ചു…..

“അച്ഛനിതെന്താ കാണിക്കണേ….. അവിടെയിരുന്നെ …. പിന്നെ എണീറ്റ് സ്വീകരിക്കാൻ  ഞങ്ങൾ  അന്യരാണല്ലോ…… “അമ്മയുടെ വഴക്ക് കേട്ടതും  ഒരു ചിരിയായിരുന്നു ആള്…..

ഇറയത്ത് ഇട്ടിരുന്ന കസ്സേരയിലും അരമതിലിലും ഒക്കെയായാണ് എല്ലാവരും ഇരുന്നത്……

അകത്തിരിക്കാൻ മാത്രം സൗകര്യവുമില്ല……..അച്ഛൻ മാമനെയും അമ്മായിയേയും ഒക്കെ പരിചയപ്പെടുത്തികൊടുക്കുകയാണ്..

അപ്പോഴും എന്റെ കണ്ണ് അകത്തേക്കാണ്….. കിച്ചുപെണ്ണിത്‌ എന്തെടുക്കാന്നാവോ…..

ആലോചിച്ച് കഴിഞ്ഞില്ല…… ട്രേയിൽ ചായയും കൊണ്ട് ആളെത്തി……..

റോസ് ചുരിദാറിട്ട് ഒരു ചിരിയോടെ ഇറയത്തേക്ക് വന്ന അവളെ കണ്ടതും എല്ലാവരുടെയും മുഖത്തൊരു ചിരി ഞാൻ കണ്ടു….

പ്രേത്യേകിച്ച് അമ്മായിക്ക്…. എന്റെ പെണ്ണിനെ കണ്ടിട്ട്  ആളുടെ കണ്ണ് വിടരുന്നത് ഞാൻ ശ്രെദ്ധിച്ചു… 😊

അമ്മായി ഓരോന്ന് ചോദിക്കുന്നതിനൊക്കെ കിച്ചു ചിരിയോടെ മറുപടി പറയുന്നതിനൊപ്പം എന്നെയും ഇടക്ക് കളളകണ്ണിട്ട് നോക്കുന്നുണ്ട്……

അച്ഛൻ സംസാരിച്ച് പയ്യെ കാര്യത്തിലേക്ക് വന്നതും പതിയെ  എല്ലാവരും നിശബ്ദരായി….

അപ്പോഴും ഞാനും കിച്ചുവും ഇടക്ക് കണ്ണുകൊണ്ട് ഓരോ കാണിക്കലൊക്കെയായിരുന്നു….

പിളേളർക്ക് ഇഷ്ട്ടമായ സ്ഥിതിക്ക് ഇനി  അടുത്ത ബന്ധുക്കളോടൊക്കെ പറഞ്ഞ്  കാര്യങ്ങൾ ഉഷാറാക്കാം…..

കല്യാണം പതുക്കെ ആയാലും മതിയല്ലോ…….അച്ഛനെയും മുത്തശ്ശനെയും നോക്കി മാമൻ ഒന്ന് കാരണവർ കളിച്ചതാണ്…. 😆

‘പക്ഷെ മുത്തശ്ശന്റെ മുഖത്ത് ഒരു സങ്കടം നിഴലിച്ചത്‌ എല്ലാവരും ശ്രെദ്ധിച്ചു…… ‘

‘അത് ബന്ധുക്കൾ എന്നൊക്കെ പറയുമ്പോ…….അത്….. പറയുമ്പോ വിഷമം ഉണ്ട് …….സ്വത്തിന്റെ കാര്യം പറഞ്ഞ് ഞങ്ങളെ അകറ്റി നിർത്തിയ ആളുകളാ മോനെ ഉളളത്‌ …..

അവരോട് ഒക്കെ എന്ത് ആലോചിക്കാനാ…….’

അച്ഛൻ അതൊന്നും ഓർത്ത് വിഷമിക്കണ്ട…….നമ്മുടെ കുട്ട്യോൾടെ കാര്യം ദേ നമ്മളങ്ങ് തീരുമാനിക്കും…

എല്ലാവരെയും വിളിക്കും… വരുന്നവർ വരും… അത്രന്നെ……..

അമ്മയത്‌ പറഞ്ഞതും മുത്തശ്ശന്റെ സങ്കടം ഒരു നിമിഷം കൊണ്ട് ഇല്ലാതായ പോലെ തോന്നി ……

എന്റെ കുട്ടികളുടെ കാര്യത്തിൽ ‘എനിക്കിനി ഒരു പേടിയും ഇല്ല….

എനിക്കെന്തെങ്കിലും പറ്റിയാൽ എന്റെ മക്കൾക്ക് ആരാ ഉളേളയെന്ന്  പേടിച്ചാ ഓരോ ദിവസവും ഞാൻ തളളി നീക്കിയത്….

ഇവിടെ വന്നപ്പോഴാ സമാധാനത്തോടെ ഒന്നുറങ്ങാൻ പറ്റിയത്……ഇപ്പോ കൈ പിടിച്ചു കൊടുക്കാൻ വരെ  എനിക്ക് സമ്മതാ….’ എന്നെയും കിച്ചുവിനെയും നോക്കി മുത്തശ്ശൻ അത് പറഞ്ഞപ്പോൾ സന്തോഷത്തിലുപരി വേറെന്തെല്ലാമോ ആണ് എന്റെ മനസ്സിൽ വന്നത്…..

ഇനി ഞങ്ങൾ ഇല്ലേ  കൂടെ……..

പിന്നെ ബാക്കി കാര്യങ്ങൾ തീരുമാനിച്ചിട്ട് അച്ഛനോട് പറയാം….

അച്ഛൻ ഒന്നും ഓർത്ത് വിഷമിക്കണ്ട..

ഗ്ലാസിലെ ചായ കുടിച്ചു തീർത്തുകൊണ്ട് അച്ഛൻ  മുത്തശ്ശന്റെ കൈപിടിച്ചുകൊണ്ട് എണീറ്റു……

ആഹ് അപ്പോ മോളെ  വേഗം വീട് പൂട്ടി വന്നേ ….വീട്ടിലേക്ക് പോകാം…….അതും പറഞ്ഞ് മുത്തശ്ശനെയും പിടിച്ചു മുറ്റത്തേക്ക് ഇറങ്ങി…. കിച്ചു വേഗം ഗ്ലാസ്സ് കൊണ്ടുപോയി വെച്ച് വാതിൽ അടച്ചതും എല്ലാവരും ഇറങ്ങി….

ഞാനും അമ്മൂസും ഉച്ചക്കത്തെ ഫുഡിന്റെ കാര്യം പറഞ്ഞാണ് നടപ്പ്.. ഞങ്ങൾക്ക് ഒന്നൂടെ വിശപ്പ് ആകാനുണ്ട്…..വീട്ടിലെത്തിയതും കിച്ചുപെണ്ണ് അമ്മായിയുടെയും അമ്മയുടെയും ഇടയിൽ പെട്ട് പോയി……മൂന്നും കൂടി അടുക്കളയിൽ വാർത്താനത്തിലാണ്…   ഞാനും അമ്മൂസും കൂടി ടീവിയും കണ്ടിരുന്നു……..

ഫോൺ നോക്കിയപ്പോഴാണ് വേണുവേട്ടന്റെ  4 മിസ്സ്കാൾ കണ്ടത്….നേരത്തേ സൈലന്റ് ആക്കിയത് കൊണ്ട് വിളിച്ചതും അറിഞ്ഞില്ല…. വേഗം തിരിച്ചു വിളിച്ചു…..

കോൾ എടുത്തപ്പോ തന്നെ രണ്ട് അടിപൊളി  തെറികേട്ടു….

ഹിഹി….. എന്റെ വേണുവേട്ടാ….😅

ഡാ അച്ചു, വേഗം വണ്ടിയെടുത്ത് നേരെ എറണാകുളത്തെ ‘ഐരാവത്’ ടീമിന്റെ  ഗോഡൗണിലേക്ക് വിട്ടോ….. ഇന്നത്തോടെ നമ്മുടെ സ്റ്റോക്ക് തീരും… നാളെ ബാർ തുറക്കുമ്പോ സ്റ്റോക്ക് ഫുൾ ആയിരിക്കണമെന്നും പറഞ്ഞ തോമസ്സേട്ടൻ പോയേക്കുന്നെ…..

ആഹ്ഹ്…. അത് ഓക്കെ….ഒന്ന്  ഫുഡ് കഴിച്ചിട്ട് വേഗം  വിട്ടേക്കാം….

ആഹ് ഓക്കെ….. ഞാൻ അവിടെ വിളിച്ച് കാര്യങ്ങൾ അറേഞ്ച് ചെയ്തോളാം….. അതും  പറഞ്ഞ്  വേണുവേട്ടൻ ഫോൺ കട്ടാക്കി…..

അമ്മു എന്നെനോക്കി  എവിടെക്കാ എന്ന് കണ്ണുകൊണ്ടൊരു കാണിക്കൽ….

എറണാകുളം വരെ ചെറിയൊരു ഓട്ടമുണ്ടെന്ന്  പറഞ്ഞതും അമ്മു   പോവണ്ടെന്നും പറഞ്ഞ്  എന്റെ കൈ വട്ടം  പിടിച്ച് തോളിൽ തലയും ചായ്ച്ചിരുന്നു 😄…

ആഹ് ഇനി ഫുഡ് കഴിച്ചിട്ട്…. എല്ലാവരും വന്നേ…….. ഡാ രണ്ടും എണീക്ക്….. കഴിക്കാം…. അമ്മായി വന്ന് വിളിച്ചതും വേഗം ടേബിളിൽ  പോയിരുന്നു… എല്ലാവർക്കും ഒരുമിച്ചിരിക്കാൻ പറ്റാത്തത്‌ കൊണ്ട് അമ്മയും കിച്ചുപെണ്ണും അമ്മായിയും പിന്നെയിരിക്കാമെന്ന് പറഞ്ഞ് ഞങ്ങളെ ആദ്യം ഇരുത്തി….

പിന്നെ കഴിക്കലും, കഴിപ്പിക്കലുമായി ഉഷാറായി..

അമ്മുവിന് വേണ്ടി മാത്രം അമ്മ ബിരിയാണിയും വെച്ചത്‌കൊണ്ട് അവൾ ഹാപ്പിയാണ്…..

ഞാൻ വേഗം കരിമീനും കൂട്ടി  ഒരു പിടിപിടിച്ച്  എണീറ്റു….

‘ഡാ……മതിയാക്ക്യ…. ‘എന്റെ സാധാരണ ഫുഡ്അടി കാണാത്തത്‌ കൊണ്ട് മാമന്റെ വക ചോദ്യം…..

ഞാൻ ഓട്ടത്തിന്റെ കാര്യം പറഞ്ഞതും എന്നാ ഞാനും കൂടെ വരാമെന്ന് പറഞ്ഞ് പുളളിയും വേഗം കഴിക്കാൻ തുടങ്ങി….

‘വരുമ്പോ രാത്രി ആകോട്ട…… ‘

ബ്ലോക്കിന്റെ കാര്യം കൂടി ഓർത്താണ് ഞാൻ  സമയം കണക്ക് കൂട്ടിപറഞ്ഞ്…..

‘ആഹ് അതിനെന്താടാ….. ഇന്ന് എന്തായാലും ഞങ്ങള് പോകുന്നില്ല….’

‘ആഹാ…. അപ്പോ പൊളി….. എന്നാ വേഗം കഴിക്ക്…… ഇപ്പോ തന്നെ  പോണം……’

ഞാൻ അതും പറഞ്ഞ് ടി ഷർട്ട് മാത്രം മാറി  കാക്കിഷർട്ടിട്ട്  പുറത്തേക്ക് വന്നു…… എല്ലാവരെയും നോക്കിയപ്പോൾ കഴിക്കുന്നതിന്റെയും കഴിപ്പിക്കുന്നതിന്റെയും തിരക്കിലാണ്….അമ്മൂസ് ആണെങ്കിൽ ഫോണിൽ തോണ്ടി ഇരിപ്പുണ്ട്…. നൈസ് ആയിട്ട് കിച്ചുപെണ്ണിനെ നോക്കി ഇറയത്തേക്ക് വരാൻ കണ്ണുകൊണ്ട് ആക്ഷൻ കാണിച്ചിട്ട് ഇറയത്തേക്ക് നടന്നു……

പാവം….കുറച്ച് കഴിഞ്ഞപ്പോ  എങ്ങനെയോ ചുറ്റിപറ്റി  ഇറയത്തേക്ക് വന്നു 😅

‘എന്റ അച്ചേട്ടാ……എല്ലാവരും ഉളളപ്പോളാണോ ഇങ്ങനെയൊക്കെ….’

വന്നപാടെ എന്നെയൊരു പിണക്കം…

‘ഓഹ് പിന്നെടി …….. എന്നിട്ട് എന്തിനാ വന്നേ……? ‘ ഞാൻ അത് ചോദിച്ചപ്പോ പെണ്ണിന്റെ കളളപിണക്കം ഒക്കെ മാറി ഒരു ചിരി ചുണ്ടിൽ വന്നു….

‘അത് പിന്നെ….. ഹിഹി……. എന്തോന്നാ അച്ചേട്ടാ…… 😊’

ഡി മുത്തശ്ശൻ പറഞ്ഞത് കേട്ടല്ലോ…. വേണേൽ ഇപ്പോതന്നെ കൈയിലേക്ക് തന്നേക്കാമെന്ന്…. മുത്തശ്ശൻ സമ്മതിക്കോന്ന് ആലോചിച്ച് ഞാനടിച്ച ടെൻഷൻ…. ഇപ്പോ ആലോചിക്കുമ്പോ ചിരി വരാ പെണ്ണെ 😅….

‘എന്തിനാ അങ്ങനൊക്കെ ആലോചിച്ചേ….?

ഞാൻ എന്റെ അച്ചേട്ടന്റെയല്ലേ….. അപ്പോ എന്റെ ഇഷ്ട്ടം  മുത്തശ്ശൻ സമ്മതിക്കാതിരിക്കോ…….. ‘

അവളത് പറഞ്ഞതും പെണ്ണിന്റെ കൈവിരൽ ഒന്ന് ഞൊട്ടിയതും ചെറിയ വേദനയിലും ആ കളളച്ചിരി കൂടി ….. 😊

‘ആഹാ… രണ്ടും കൂടി  കൊഞ്ചിക്കൊണ്ട് നീക്കേണല്ലേ……. ‘

അമ്മായി അതും പറഞ്ഞ് ഇറയത്തേക്ക് വന്നതും കിച്ചു വേഗം  അകത്തേക്ക് വലിയാൻ നോക്കി…. പക്ഷെ അമ്മായി വിടോ…… 😅

വട്ടം പിടിച്ച് അവിടെ നിർത്തി…….

അപ്പോഴേക്കും മാമൻ നല്ല ഡ്രസ്സ്‌ മാറി ഒരു ഷർട്ടും കളളിമുണ്ടും ഉടുത്ത് വന്നു……

ആഹ് ഇതാര് ഡൈബർ സുഗുവാ… 😆

ഞാൻ മാമനെ കളിയാക്കിയത് കേട്ട് കിച്ചൂസും അമ്മായിയും ചിരി തുടങ്ങി…….

ഡാ ഡാ….വേണ്ട……. നടക്കെന്നും പറഞ്ഞ് എന്നെയും കൊണ്ട് ആള് മുറ്റത്തേക്കിറങ്ങി  ……ഗേറ്റ് അടക്കാൻ തിരിഞ്ഞപ്പോൾ കിച്ചുവിനെ കാണുന്നില്ല….  അമ്മായി  കഴിക്കാൻ വിളിച്ചുകൊണ്ട് പോയിക്കാണും…….

വേഗം വണ്ടിയുടെ അടുത്തെത്തി പതിവ് ടയർ കൊട്ടിനോക്കൽ ഒക്കെ കഴിഞ്ഞ് കുറച്ച് നേരം  സ്റ്റാർട്ട്‌ ചെയ്തിട്ട് വണ്ടിയെടുത്തു……

സെറ്റ് ഓണാക്കിയതും ആദ്യത്തെ പാട്ട് ‘ചിലമ്പൊലിക്കാറ്റെ ‘ ആഹാ മൈൻഡ്   ഓൺ ആകാൻ  പറ്റിയ പാട്ട്…. നേരത്തേ എത്തിയാൽ വേഗം പോരാമെന്ന് ഉളളത്‌ കൊണ്ട് പോയപ്പോൾ അത്യാവശ്യം പൊളിച്ചാണ് പോയത്…. അച്ഛനാണെങ്കിൽ പയ്യെ പോകാൻ പറയും…. മാമൻ തിരുവനന്തപുരം കോഴിക്കോട്  മിന്നൽ  സർവീസ് ഓടിക്കുന്ന  ആളായത് കൊണ്ട് ഇതൊക്കെ കണ്ടാലും ഒന്നും തോന്നില്ല……

അങ്ങനെ 3 മണിക്ക്  ഗോഡൗണിൽ എത്തി….. തോമസ്സേട്ടന്റെ ബാറിലേക്ക് ലോഡ് എടുക്കാൻ ഏത് വണ്ടി വന്നാലും ടേൺ അനുസരിച്ച് എത്ര വണ്ടി മുന്നിലുണ്ടെങ്കിലും അതൊന്നും മൈൻഡ് ചെയ്യാതെ ലോഡ് ആക്കും …. അതാണ് പുളളിയുടെ പിടിപാട്…..

വണ്ടി ലോഡാക്കാൻ ഇട്ട് കൊടുക്കേണ്ട താമസം,  ഒരു മണിക്കൂർ കൊണ്ട് ലോഡ് ഷീറ്റ് ഇട്ട് കെട്ടി വണ്ടി ഗോഡൗണിൽ നിന്നിറക്കി……

തിരിച്ചുളള വരവ്വ് പിന്നെ പറയണ്ട…. ബ്ലോക്ക്‌ കിട്ടി പ്രാന്ത് പിടിച്ച് ഒരു 7 മണിയായപ്പോ കൊടുങ്ങല്ലൂരെത്തി….

ബാറിലേക്ക് വണ്ടി കേറ്റി ഇറക്കാനായി ഇട്ട് കൊടുത്തു……

മദ്ധ്യകുപ്പികൾ ഓരോ കെയ്‌സുകളായി ഇറക്കുന്ന കാഴ്ച കണ്ട് അവിടെ  നിൽക്കുന്ന പിളേളർ മുതൽ അപ്പാപ്പൻമാർക്ക്  വരെ ഒറ്റ ചിന്തയെ കാണു….. ഈ വണ്ടിയായിട്ട് കടന്ന് കളഞ്ഞാലോന്ന് …..😆😂

അല്ല കുറ്റം പറഞ്ഞിട്ട് കാര്യമില്ല ,

ഇങ്ങനൊരു കാഴ്ച കണ്ടാൽ  ആരായാലും ചിന്തിച്ചു പോകും…😅

‘ഡാ മോനെ ഓരോന്നൊക്കെ തൊണ്ട നനക്കാൻ  സാധനം കിട്ടാതെ നിക്കാ….  ഡീസൽ ടാങ്കിൽ ഒരു കണ്ണ് വേണേ……’

ലോഡ് ഇറക്കുന്ന സപ്ലയർ പയ്യനോട് തമാശയെന്നോണം പറഞ്ഞ് മാമനെയും കൂട്ടി ഒരു ചായ അടിക്കാൻ റോഡിലേക്ക് പോയി….

ഇത്തിരി  നടന്നാൽ കുഞ്ചൂന്റെ തട്ട്കടയാണ്……..ഒരുവിധം എല്ലാ ഡ്രൈവർമാരുടെയും സ്ഥിരം ഹാൾട്ടാണ് കുഞ്ചൂസ്സിന്റെ കട…

കാണുമ്പോ  തന്നെ സുഖവിവരം ചോദിക്കാതെ കുഞ്ചുവിന് ഒരു

സമാധാനം കിട്ടില്ല…… അങ്ങനെ ചായയും കുടിച്ച് നിന്നപ്പോഴാണ് പോലീസ് ജീപ്പ് കൊണ്ടുവന്ന് നിർത്തിയത്……..കോൺസ്റ്റബിൾസ് രണ്ട് പേര് ഇറങ്ങി കടയിലേക്ക് വന്ന് പരിശോധിക്കാൻ തുടങ്ങി……ഈ ലഹരി വസ്തുക്കൾ പിടിക്കാൻ വേണ്ടിയുളള പരിശോധനയാണ്, അത് മിക്ക ദിവസവും ടൗണിൽ നടക്കുന്ന പ്രഹസനമാണ് ….

പെട്ടെന്നാണ് എനിക്ക് അക്കുവിന്റെ ഓർമ വന്നത്…. വിളിക്കാന്ന് പറഞ്ഞിട്ട് അവൻ വിളിച്ചുമില്ല…. ജീപ്പിന് അടുത്തേക്ക് പോയി നോക്കിയപ്പോഴാണ്  ബഹുമാനപ്പെട്ട

ടൗൺ  എസ് ഐ അക്ബർ ലത്തീഫ്  ഇരിക്കുന്നത് കണ്ടത്…..😆

കുഞ്ചുവിനോട് പറഞ്ഞ് ഒരു ചായ കൂടി വാങ്ങി നേരെ അവന്റെ അടുത്തേക്ക് പോയി………

ഇന്നാ സാറെ… ഒരു ചായ കുടിക്കെന്ന് പറഞ്ഞ് ഗ്ലാസ് നീട്ടിയ എന്നെ കണ്ടതും ‘ഡാ മൈരേ.. നീ ആയിരുന്ന’ എന്നും ചോദിച്ച് ചിരിച്ചുകൊണ്ട്  അവൻ പുറത്തേക്കിറങ്ങി………..

മാമനെ വിളിച്ച് അക്കുവിനെ പരിചയപ്പെടുത്തികൊടുത്ത് ചായയും കുടിച്ച് നിൽക്കുന്നതിനിടയിൽ രാവിലത്തെ സംഭവം അവനോട് പറഞ്ഞു…….

അങ്ങനെ നീയും പെണ്ണ് കെട്ടാൻ പോകേണ് അല്ലേടാ …. ആഹ്……

എന്നെയൊക്കെ  വാപ്പ എന്ന് കെട്ടിക്കാൻ ആണെന്നാവോ……..

അല്ല ഓരോ  ടെൻഷന്റെ  കൂടെ  ഇനി പെണ്ണും കൂടി കെട്ടിയാൽ നല്ല രസോയിരിക്കും……..

ഓഹ് പിന്നെ…….എന്നിട്ട് ആരും പെണ്ണ് കെട്ടണില്ല… ഒന്ന് പോട അവ്ടെന്ന്……അവനെ  കളിയാക്കുന്ന പോലെയാണ് ഞാനത് പറഞ്ഞത്…..

ഡാ സത്യമാട…. ദേ ഇപ്പോ തന്നെ തമിഴ്നാട്ടിൽ നടന്ന ഒരു കേസിന്റെ കാര്യം ആലോചിച്ച് ഇരുന്നപ്പോഴാ നിന്നെ കണ്ടത്….അത് കാരണം കുറച്ച് നേരമെങ്കിലും അതൊന്ന് തലയിൽ നിന്ന് പോയിക്കിട്ടി… അക്കു അതും പറഞ്ഞ് ചായയുടെ പൈസ  കൊടുക്കാൻ പോയി …….

എന്ത് കേസ് ആണ്….വല്ല കൊലക്കേസ് ആണോ?…… മാമൻ  കേസ് എന്താണെന്നറിയാനുളള ആകാംഷയോടെ അക്കുവിനോട് കാര്യം ചോദിച്ചു…….

ആഹ്  കൊലക്കേസ് ആയിരുന്നേൽ ഇത്രേം ടെൻഷനില്ല അങ്കിളെ…… ഇത് അങ്ങനെയല്ല……… അക്കു ഞങ്ങളെയും വിളിച്ച് കടയിൽ നിന്ന് കുറച്ച് മാറി നിന്നിട്ട് കാര്യം പറഞ്ഞ് തുടങ്ങി…….

നമ്മുടെ കേരളത്തിൽ നിന്നും തമിഴ്നാട്ടിലേക്ക്  ഫാമിലിയായിട്ട് പോകുന്ന കാറുകൾ, പ്രേത്യേകിച്ച് ചെറിയ കാറുകൾ ആളൊഴിഞ്ഞ സ്ഥലത്ത് വെച്ച് അപകടത്തിൽ പെടുന്നു…. ഇതാണ് സംഭവം…….

കേട്ടിട്ട് എന്താ തോന്നണേ……….?

ഇതിലിപ്പോ എന്താ തോന്നാൻ….

വണ്ടി നോക്കി ഓടിച്ചില്ലേൽ ഇടിക്കും…….അല്ലെങ്കിലും ഈ പ്രൈവറ്റ് കരാറുകാരെകൊണ്ട് റോഡിൽ ശല്യമാണ്‌…..മാമൻ  വല്ല്യ പ്രാധാന്യം കൊടുക്കാതെയാണത്‌  പറഞ്ഞത്‌……. പക്ഷെ അക്കു പറഞ്ഞത് കേട്ട് എന്റെ ഉളളിൽ പണ്ട് തമിഴ്‌നാട്ടിൽ വെച്ചുണ്ടായ സംഭവം മനസ്സിലേക്ക് വന്നു……. ഇപ്പോ അക്കു പറഞ്ഞത് കേട്ടപ്പോൾ അന്ന് ആ തമിഴ് ലോറി ഡ്രൈവർ പറഞ്ഞ കാര്യങ്ങൾ  മനസ്സിലേക്ക് ഓടിയെത്തി…….

‘ഡാ അച്ചു, നീയിത് എന്താ ആലോചിക്കുന്നേ…… ‘

അക്കുവിന്റെ ശബ്ദമാണ് എന്നെ ആലോചനയിൽ നിന്ന് ഉണർത്തിയത്……

‘ അക്കു …… സംഭവം നിസ്സാരമല്ല…സംഭവിച്ചത് ഒക്കെ സാധാരണ ആക്‌സിഡന്റുകളും അല്ല’

ഞാൻ പറഞ്ഞത് കേട്ട് അക്കുവും മാമനും എന്നെ തന്നെ നോക്കി നിന്നു..

‘നീ കാര്യം തെളിച്ച് പറ…..’

അക്കുവിന്റെ ശബ്ദത്തിൽ ഒരു പേടി നിഴലിച്ചതായി എനിക്ക് തോന്നി…..

ഡാ ഒരു 3 വർഷം മുന്നെയാണ്….. അന്ന് ഞാൻ  റാവുത്തർ മുതലാളിയുടെ  ലെയ്‌ലാൻഡ് ഓടിക്കുന്ന സമയം…..

ഒരു ദിവസം തമിഴ്നാട്ടിലേക്ക് ഓട്ടം പോയതായിരുന്നു…..  സേലം ഹൈവേ പിടിച്ച് പോകുന്ന വഴി ടോൾ എടുക്കാതെ ആ പൈസ ലാഭിക്കാൻ വേണ്ടി ഹൈവേയിൽ നിന്നിറങ്ങി  വേറെയൊരു  റൂട്ട് പോകുന്ന വഴിയാണ് ഒരു കേരള രെജിസ്ട്രേഷൻ കാർ തവിട് പൊടിയായി കിടക്കുന്നത് കണ്ടത്…… ഞാൻ വേഗം ലോറി ഒതുക്കി ചെന്ന് നോക്കിയതും ഒരു 6 പേരോളം ആ കാറിലുണ്ടായിരുന്നു…. ആർക്കും അനക്കമൊന്നുമില്ല…..

ഇടി കഴിഞ്ഞിട്ട് ഒരു 10 മിനിറ്റ് ആയിട്ടുളളു എന്ന് തോന്നി…… അധികം വണ്ടികൾ വരാത്ത വഴിയായത് കൊണ്ട് ആരും കണ്ടിട്ടുമില്ല……

ഞാൻ വേഗം 102 ആംബുലൻസ് സർവീസിൽ വിളിച്ച് കാര്യം പറഞ്ഞു…ഒപ്പം ഫയർ ഫോഴ്‌സിനെയും വിളിച്ചു….. ഡോർ വെട്ടി  പൊളിക്കാതെ ആരെയും പുറത്തെടുക്കാൻ പറ്റില്ലെന്ന് എനിക്കുറപ്പായിരുന്നു….

അങ്ങനെ ഒറ്റയ്ക്കു ഒന്നും ചെയ്യാൻ കഴിയാതെ പകച്ചു നിന്നുപോയി…. അപ്പോഴാണ് അത് വഴി ഒരു ലോറി വന്നത് ……. ഞാൻ കൈകാട്ടിയതും സംഭവം മനസ്സിലായ ഡ്രൈവർ വേഗം  വണ്ടിയൊതുക്കി വന്നു………

6 ജീവൻ ചോരയിൽ കിടക്കുന്ന കണ്ടിട്ടും   അയ്യാളിൽ വലിയ ഭാവമാറ്റം ഒന്നും ഉണ്ടായില്ല…….

ആകെ മരവിച്ച് നിന്ന എന്നെ സമാധാനിപ്പിച്ചുകൊണ്ട് അയ്യാൾ കാര്യങ്ങൾ എനിക്ക് പറഞ്ഞ്തന്നു……

അതൊക്കെ അവിടെ സാധാരണമാണെന്ന്……. ഇങ്ങനെയുളള  കരുതികൂട്ടിയുളള അപകടം മാസത്തിൽ രണ്ടും മൂന്നും ഒക്കെ പലയിടത്തായി സംഭവിക്കാറുണ്ടെന്ന് ……

ഡാ പക്ഷെ ആര്?  എന്തിന് വേണ്ടി….? എന്തെങ്കിലുമൊരു മോട്ടീവ് വേണ്ടേ…

അക്കു വല്ലാത്തൊരു  ആകാംഷയോടെയാണ് എന്നോടത്‌ ചോദിച്ചത്‌……

മോട്ടീവ് ഇല്ലെന്ന് ആര് പറഞ്ഞു..?

ഇതുപോലെയുളള

അപകടത്തിൽപ്പെടുന്നവരുടെ

ആഭരണങ്ങൾ എവിടെ പോയെന്ന് ആരെങ്കിലും അന്വേഷിക്കാറുണ്ടോ…..

ഇങ്ങനെ ഉറ്റവരെ  മരിച്ച് കെട്ടിപൊതിഞ്ഞു വീട്ടിലേക്ക് കൊണ്ടുവരുമ്പോൾ  ആരാ ഉണ്ടായിരുന്ന  സ്വർണവും പണവും നോക്കുന്നത്…… ഡാ അക്കു,

നിനക്ക് അന്വേഷിച്ചാൽ മനസ്സിലാകും സ്ത്രീകൾ കൂടുതലുളള വണ്ടികളായിരിക്കും കൂടുതലും അപകടത്തിൽ പെട്ടിട്ടുണ്ടാകുകാ…..

കേരളത്തിൽ നിന്നും ഒരു കാർ തമിഴ്നാട്ടിലെ ഒരു പെട്രോൾ പമ്പിൽ, അല്ലെങ്കിൽ ഒരു ഹോട്ടലിൽ നിർത്തിയാൽ  ആ കാറിൽ ആണെത്ര, പെണ്ണെത്ര, കഴുത്തിലും കയ്യിലും ആഭരണം എന്തോരം….. വിലപിടിപ്പുളള മറ്റു വസ്തുക്കൾ എന്തൊക്കെ എന്നെല്ലാം നിരീക്ഷിക്കാൻ ആൾക്കാരുണ്ട്…..

അവർ ചായ വിൽപ്പനക്കാരായോ,

ഭിക്ഷാടകരായോ ഒക്കെ വന്ന് നോക്കി പോകും….. പിന്നെ ആ വണ്ടി അധികദൂരം ഓടില്ല………ആളൊഴിഞ്ഞ സ്ഥലത്ത് വെച്ച് ലോറി വന്നിടിക്കും……..  അതൊക്കെയാണ്‌ അവിടെ നടക്കുന്നത്……. ഞാൻ അതും പറഞ്ഞ് കടയിൽ നിന്ന് വെളളം ജഗ്ഗ് എടുത്ത് കുടിക്കാൻ തുടങ്ങി……. എന്റെ കൈയ്യിൽ നിന്ന് മാമാനും വാങ്ങി കുടിച്ചു…… എല്ലാം കേട്ടിട്ട് പുളളിയുടെ കിളിയും പോയി…….

കേസ് ഇത്രയും പണിയാണെന്ന് കരുതിയില്ലെടാ…… ഇനി

ഡാ നീ പറഞ്ഞ കാര്യങ്ങൾ വെച്ചൊന്ന് അന്വേഷിച്ച് നോക്കട്ടെ…..

എന്തായാലും ഈ കാര്യം ഞാൻ

എസ് പി ക്ക് റിപ്പോർട്ട്‌ ചെയ്യാം…..

ആഹ് അതൊക്കെ നിന്റെ പോലീസ്  കാര്യം……അന്ന് ആ ഡ്രൈവർ പറഞ്ഞുതന്ന  കാര്യം  പറഞ്ഞെന്നെ ഉളളു…… അവരെ പിടിക്കുന്നതും പിടിക്കാതെയിരിക്കുന്നതും ഒക്കെ പോലീസിന്റെ കഴിവ് പോലെയിരിക്കും……. പിന്നെ അപകടം തടയാൻ ഒറ്റ വഴിയേ ഉളളു……..

“എന്താടാ…….? ” മാമനും അക്കുവും ഒരുമിച്ചാണ് ചോദിച്ചത്‌…….

ഈ തമിഴ്നാട്ടിലേക്കും മറ്റും  ഒക്കെ പോകുന്നവർ മാക്സിമം മറ്റു കേരള വണ്ടികളുടെ ഒപ്പം നിന്ന് ഓടുക….. അല്ലെങ്കിൽ ഏതെങ്കിലും ചരക്ക് ലോറികളുടെ പിന്നിൽ നിന്ന് ഓടുക….അതന്നെ വഴി……

അങ്ങനെ സംസാരിച്ച് നിന്നപ്പോഴാണ് വണ്ടി ലോഡിറക്കി കഴിഞ്ഞെന്നും പറഞ്ഞ് വിളി വന്നത്……. അക്കുവിനോട് വിളിക്കാമെന്ന് പറഞ്ഞ് വേഗം ബാറിലേക്ക് നടന്നു…  അവിടെന്ന് വണ്ടിയെടുത്തത്‌  മാമനാണ്….

വീടെത്താൻ അരമണിക്കൂർ പിടിക്കും…… ഞാൻ കുറച്ച് നേരം  ബെഡിലേക്ക് കിടന്നു…… കുറച്ച് നാളായി വണ്ടിയിൽ ചെറിയൊരു ഫ്രീസർ വെക്കണമെന്ന ആലോചന വന്നിട്ട്….ഈ ചൂടിൽ തണുത്ത  വെളളം കുടിക്കാതെ രക്ഷയില്ല….. വണ്ടിയിൽ എത്രയൊക്കെ ac കൂട്ടിയിട്ടാലും ഉച്ചസമയത്ത് ഒരു രക്ഷയില്ല……പിന്നെ  നാളെ കിച്ചൂസിനെ കോച്ചിങ് സെന്ററിൽ കൊണ്ടുപോണം……രാവിലെ തന്നെ അതങ്ങ് റെഡിയാക്കണം….

വണ്ടി ഓടിയ പൈസ ബാങ്കിൽ ഇടണം……..അങ്ങനെ ഓരോ കാര്യങ്ങൾ മനസ്സിലേക്ക് വന്ന് പയ്യെ കണ്ണുകൾ അടഞ്ഞുപോയി…..

‘ഡാ ഡാ…… എണീക്ക്….. വീടെത്തി….’

വണ്ടിയൊതുക്കി മാമൻ തട്ടി വിളിച്ചപ്പോളാണ് ചെറുതായൊന്ന് ഞെട്ടിക്കൊണ്ട് എണീറ്റത്…….😇