💓പ്രാണസഖി 4

എല്ലാവർക്കും നമസ്കാരം 🙏🙏🙏……….

കഥയുടെ കഴിഞ്ഞ ഭാഗത്തിന് നിങ്ങൾ നൽകിയ സപ്പോർട്ടിന് ആദ്യമെ തന്നെ നന്ദി പറയുന്നു. ഇത് കഥയുടെ അവസാന ഭാഗമാണ്…….

എന്നാൽ തുടങ്ങട്ടെ ……..

……………

” എടാ ഒരു കാര്യം പറയാൻ വിളിച്ചതാ …… ലക്ഷ്മിയുടെ കല്യാണം ഉറപ്പിച്ചു. അടുത്ത മാസം . നീ ഒഴിവൊന്നും പറയരുത് നിർബന്ധമായും ലീവെടുത്ത് വരണം ബാക്കി ഡീറ്റെയിൽസ് പിന്നീട് അറിയിക്കാം വിവരം അറിഞ്ഞപ്പോൾ വിളിച്ചറിയിച്ചതാ ബൈ…. അല്പം തിരക്കുണ്ട്. ”

വിനോദ് അതും പറഞ്ഞ് കോൾ കട്ടു ചെയ്തു . എനിക്കെന്തോ ഒരു മരവിപ്പായിരുന്നു അത് കേട്ടപ്പോൾ …. ജീവിതത്തിലെ അവസാന പ്രതീക്ഷയും നശിച്ചതുപോലെ ഒരു തോന്നൽ……

നമ്മൾ പ്രതീക്ഷിക്കുന്നതു പോലെ അല്ലല്ലോ ജീവിതം , അങ്ങനെ ആയാൽ അത് ജീവിതവുമാകില്ല . എന്റെ ജീവിതം എന്നെ പഠിപ്പിച്ച വലിയ ഒരു പാഠം അതായിരുന്നു.

‘ വിനോദ് പറഞ്ഞതു പോലെ വിവാത്തിന് പോകണം … പങ്കെടുക്കണം , കാരണം നശിച്ചു തുടങ്ങിയ ജീവിതത്തിൽ നിന്ന് എന്നെ കര കയറ്റിയവരാണ് , ഒരു പാട് ദിവസം അവർ വിളമ്പി തന്ന ആഹാരം കഴിച്ചതാണ് . പോകണം……. അത് എന്റെ കടമയാണ് . ‘

ഞാൻ അവസാനം തീരുമാനിച്ചു . ജോലിക്ക് തിരിച്ച് കയറിയിട്ട് ഒരു വർഷം മാത്രമേ ആയുള്ളൂ എങ്കിലും ഞാൻ ഒരു മാസത്തെ ലീവിന് അപ്ലെ ചെയ്തു നോക്കി . എന്തോ ഭാഗ്യത്തിന് കിട്ടി. വിനോദ് ഇടയ്ക്ക് വിവാഹ ദിവസം എന്നെ വിളിച്ച് അറിയിച്ചിരുന്നു. വിവാഹത്തിന് നാല് ദിവസം മുൻപ് ഞാൻ നാട്ടിലേക്ക് തിരിച്ചു. ആരോടും ഞാൻ വരുന്ന വിവരം പറഞ്ഞിരുന്നില്ല , വിനോദിനോട് പോലും .

വൈകുന്നേരം എയർ പോട്ടിൽ ഫ്ളൈറ്റ് ഇറങ്ങി നേരെ പോയത് അന്ന് ഞാൻ കാർ എടുത്ത ഷോറൂമിലേക്കാണ്. ആ ഷോറൂമിന്റെ ഓണർ എന്റെ ഒരു പരിചയക്കാരനായിരുന്നു , ലിജോ അതാണ് ആ ചേട്ടന്റെ പേര് . അന്ന് ആ ചേട്ടൻ പറഞ്ഞതാണ് ഇൻഷുറൻസ് ഒക്കെ ഉണ്ടല്ലോ കുറച്ച് പണം കൂടെ അടച്ചാൽ അതേ മോഡലിൽ പുതിയ കാർ തരാമെന്ന് , പക്ഷെ ഞാൻ പറഞ്ഞു എത്ര പണം ചിലവായാലും ആ കാർ ശരിയാക്കി തന്നാൽ മതിയെന്ന് , അതിന് കാരണമുണ്ട് അന്ന് കാർ വാങ്ങിയ ദിവസം മനു അതിന്റെ അടുത്ത് നിന്ന് മാറിയിട്ടില്ലായിരുന്നു. തൊട്ടും തലോടിയും ഡ്രൈവിങ് സീറ്റിൽ കയറിയിരുന്നും ….. അതൊക്കെ ഓർത്തപ്പോൾ , മനുവിന് ഏറെ ഇഷ്ടപ്പെട്ട ആ കാർ വിട്ട് കളയാൻ തോന്നിയില്ല. ഓർമ്മകൾ നശിച്ചാൽ പിന്നെ മനുഷ്യനെ എന്തിനു കൊള്ളാം …..

ഷോറൂമിൽ എത്തിയപ്പോൾ ആ കാറ് കണ്ട് ഞാൻ തന്നെ അതിശയിച്ച് പോയി . എല്ലാ കേടുപാടും തീർത്ത് പുതിയ വണ്ടി കണക്കെ .

ലിജോ ചേട്ടനെ കണ്ട് സംസാരിച്ച് അതിന്റെ ബാലൻസ് പൈസയും കാർഡ് വഴി കൊടുത്ത് കാറുമെടുത്ത വീട്ടിൽ എത്തിയപ്പോൾ സമയം രാത്രി 9 കഴിഞ്ഞിരുന്നു.

കാറ് വീടിന്റെ ഗേറ്റ് തുറന്ന് പോർച്ചിൽ കയറ്റി വീടിന്റെ പുറകിൽ ഒരിടത്ത് മുൻപേ മാറ്റിവച്ചിരുന്ന വീടിന്റെ സ്പെയർ കീയും എടുത്ത് വീടിന്റെ കതകും തുറന്ന് ഞാൻ അകത്ത് കയറി . കുളിച്ച് ഫ്രഷായി ഡ്രസും മാറി നേരെ കട്ടിലിലേക്ക് കിടന്നു , യാത്രാക്ഷീണം കാരണം ഉടനെ ഉറങ്ങിപോയി …..

മൊബൈൽ ഫോണിലെ 6 മണിക്കുള്ള അലാറം കേട്ടാണ് ഞാൻ എണീറ്റത് . വീടിന്റെ പുറത്തിറങ്ങി വീടിന് ചുറ്റും വെറുതേ നടന്നു. ഞാൻ താമസിച്ചിരുന്ന സമയത്ത് അലങ്കോലമായി കിടന്ന വീട് ഇപ്പോൾ നല്ല വൃത്തിയാണ് അകത്തും പുറത്തും . പാവം എല്ലാം ശ്രീവിദ്യയുടെയും ആന്റിയുടെയും പണിയായിരിക്കും. ഞാൻ ആ അസ്ഥിതറകൾക്ക് മുന്നിൽ ചെന്ന് നിന്നു . കണ്ണുകളടച്ചു പ്രാർത്ഥിച്ചു.

‘ നിങ്ങളുടെ ഈ മകനെ ദൈവം ഇപ്പോഴും പരീക്ഷികുകയാണ് , പക്ഷെ ഇനി പതറില്ല .തുടർന്ന് ജീവിക്കാൻ നിങ്ങൾ സമ്മാനിച്ച ഓർമ്മകൾ മതി . ‘

ഞാനതും മനസ്സിൽ ഓർത്ത് തിരിച്ച് വീടിനുള്ളിലേക്ക് നടന്നു . നേരെ ഞാൻ ബാത്ത് റൂമിൽ കയറി ഒന്ന് ഫ്രഷായി തിരിച്ച് റൂമിൽ വന്ന് ഞാൻ ലഗേജിൽ കൊണ്ടുവന്ന സാധനങ്ങൾ ഓരോന്നായി എടുത്തുവച്ചു. തുണികൾ ഓരോന്നായി എടുത്തപ്പോഴാണ് ആ സാധനം എന്റെ കയ്യിൽ തട്ടിയത് , ഒരു വില കൂടിയ വിദേശ മദ്യത്തിന്റെ കുപ്പി …. ഞാനതെടുത്ത് ടേബിളിൽ വച്ചിട്ട് അതിനെ തന്നെ നോക്കി നിന്നു . അവിടുന്ന് തിരിച്ചപ്പോൾ വാങ്ങിയതാണ് മനസ്സിനെ ഒട്ടും നിയന്ത്രിക്കാൻ പറ്റാത്ത അവസ്ഥ വന്നാൽ കുടിക്കാൻ വേണ്ടി ……

” ട് ട്……… ”

റൂമിന്റെ കതകിൽ ആരോ തട്ടുന്ന ശബ്ദം കേട്ടാണ് ഞാൻ അങ്ങോട്ട് നോക്കിയത് . നോക്കിയപ്പോൾ വാതിലിൽ ചാരി എന്നെ നോക്കി നിൽക്കുകയാണ് വിനോദ് .

” നീ എപ്പോഴാ വന്നത്. ഒന്ന് വിളിച്ച് കൂടി പറഞ്ഞില്ലല്ലോ …… ”

ഞാൻ നോക്കിയപാടെ വിനോദ് ചോദിച്ചു.

” ഇവിടെ എത്തിയപ്പോ ഇന്നലെ രാത്രിയായി പിന്നെ നിങ്ങളെ ബുദ്ധി മുട്ടിക്കണ്ട എന്ന് കരുതി ഞാൻ…. ”

” ഓ ഒരു ബുദ്ധിമുട്ട് .. ശരി ….. ഇതുവഴിപോയപ്പോൾ മുറ്റത്ത് കാറ് കിടക്കുന്നു . അങ്ങനെ അല്ലേ ഞാൻ സംശയം തോന്നി കയറി നോക്കിയത് . എടാ ആ കാറ് ? ”

വിനോദ് ഒരു സംശയത്തോടെ ചോദിച്ചു.

” ആ കാറ് തന്നെയാടാ … ശരിയാക്കിയെന്ന് ലിജോ ചേട്ടൻ വിളിച്ച് പറഞ്ഞപ്പോൾ ഞാൻ ഇന്നലെ വരുന്ന വഴി ഷോറൂമിൽ കയറി അതിങ്ങ് കൊണ്ട് പോന്നു. ”

” ഇതെന്താടാ …. ഇതെങ്ങനെ ഇവിടെ വന്നു …. ഇവിടെ ഉണ്ടായിരുന്നതെല്ലാം ശ്രീ മാറ്റിയതാണല്ലോ ? ”

ടേബിളിന്റെ പുറത്ത് ഞാനെടുത്ത് വച്ച കുപ്പി കണ്ട് വിനോദ് തിരക്കി.

” എടാ …. അത്. …… അതിവിടെ ലോക്ക് ചെയ്ത് വച്ചിരുന്ന അലമാരയ്ക്കകത്ത് ഇരുന്നതാ … തുണിയെടുത്ത് വയ്ക്കാൻ അലമാര തുറന്നപ്പോൾ കണ്ട് എടുത്ത് പുറത്ത് വച്ചതാ …. ”

ഞാനവനോട് കള്ളം പറഞ്ഞു . ഞാനത് വാങ്ങി കൊണ്ട് വന്നതാണ് എന്നറിഞ്ഞാൽ അവൻ എന്നെ പിന്നെ വച്ചേക്കില്ല.

” നീ പറഞ്ഞത് ഞാൻ വിശ്വസിച്ചോട്ടേ …. ? ”

ഒരു സംശയത്തോടെ അവൻ ചോദിച്ചു .

” അതെ ഞാൻ പറഞ്ഞത് സത്യമാടാ … ”

” എങ്കിൽ പിന്നെ ഇതിനി ഇവിടെ വേണ്ട ഞാൻ കളഞ്ഞോളം …. അല്ലെങ്കിൽ എന്തിനാ വെറുതെ പൈസ കൊടുത്ത് വാങ്ങിയ സാധനം കളയുന്നെ മറിച്ച് വിൽക്കാം . ഫോറിൻ സാധനമല്ലേ നല്ല വില കിട്ടും . എന്താടാ കുറച്ച് ദിവസമായി നിന്റെ സ്വഭാവത്തിൽ നല്ല മാറ്റുണ്ടല്ലോ ഞാൻ വിളിക്കുമ്പോഴൊക്കെ ഒരു ഒഴിഞ്ഞ് മാറ്റം …….. എന്താ ? ”

ആ കുപ്പി കയ്യിൽ എടുത്ത ശേഷം എന്റെ മുഖത്തേക്ക് ഒരു കള്ള നോട്ടം നോക്കിക്കൊണ്ട് അവൻ ചോദിച്ചു.

” എടാ …. ഒന്നുമില്ല ജോലി തിരക്കും പിന്നെ അതിന്റെ ടെൻഷനും …. ”

ഞാനവനോട് പറഞ്ഞു.

” പറയുന്നത് കേട്ടാൽ തോന്നും നീ ആ കമ്പനിയുടെ ഓണർ ആണെന്ന് ഒരു ടെൻഷനടി . ഒന്നു പോയേടാ ……. ”

വിനോദ് ചിരിച്ചുകൊണ്ട് പറഞ്ഞു .

” എടാ … നീ എന്നാ വന്നേ , എത്ര ദിവസം ലീവ് ഉണ്ട് . ”

ഞാൻ വിനോദിനോട് ചോദിച്ചു

“എടാ വന്നിട്ട് രണ്ട് ദിവസമായി , മൊത്തം 1 മാസത്തെ ലീവ് . പിന്നെ നീ വരുമെന്ന് പറഞ്ഞതു കൊണ്ട് ഒരുമിച്ച് പോകാം എന്ന് കരുതിയാ ഞങ്ങൾ പിന്നെ വെയിറ്റ് ചെയ്തത് . ”

” എടാ …. അപ്പൊ എന്നാ പോകുന്നേ ….. ”

ഞാനവനോട് തിരക്കി.

” നാളെ രാവിലെ പോകാം . മൂന്ന് ദിവസം കൂടിയല്ലെ ഉള്ളൂ ഒരുപാട് ജേലിയുണ്ട് അവിടെ … ”

” എടാ പയ്യനെന്താ ജോലി ….”

ഞാൻ വെറുതെ അവനോട് തിരക്കി .

” എഞ്ചിനീയറാ അവളെ കണ്ട് ഇഷ്ടപ്പെട്ട് ഇങ്ങോട്ട് പെണ്ണ് ചോദിച്ച് വന്നതാ … പക്ഷെ എനിക്ക് പിടികിട്ടാത്തത് ജാതകത്തിന്റെ കാര്യമാ … എന്തൊ ? ചിലപ്പോൾ രണ്ട് ജാതകവും ഒത്ത് വന്ന് കാണും . ആ എന്തോ ? … എടാ നീ അവൾക്ക് കൊടുക്കാൻ ഒന്നും വാങ്ങിലേ …. ”

വിനോദ് എന്നോടത് ചോദിച്ചപ്പോൾ ബാഗിൽ ഇരുന്ന ഒരു ബോക്സ് എടുത്ത് ഞാൻ അവന്റെ നേരെ നീട്ടി…

” ഉം…… തുറന്ന് നോക്ക്. ”

വിനോദ് അത് വാങ്ങി തുറന്നു …

“ആഹാ കൊള്ളാമല്ലോ മാല ….. രണ്ട് തട്ട് അല്ലേ , എന്തായാലും ഒരു എട്ട് പത്ത് പവൻ കാണുമല്ലോടാ ….. ”

അവൻ അതും പറഞ്ഞ് എന്നെ നോക്കി

” പത്ത് പവനാടാ … ” ഞാനവനോട് പറഞ്ഞു.

” ആഹാ . ഇവിടെ എന്റെ അമ്മ തന്നെ നാല് പവന്റെ വളയാ വാങ്ങി വച്ചേക്കുന്നേ അപ്പൊ നീ പത്ത് കൊടുക്കുന്നോ … ? ”

അവൻ ഒരു അതിശയം കണക്കെ എന്റെ മുഖത്ത് നോക്കി ചോദിച്ചു.

” എടാ എനിക്ക് നിങ്ങളൊക്കെ അല്ലേ ഉള്ളൂ ….. വെറെ ആർക്ക് കൊടുക്കുനാ ……”

ഞാനവന്റെ തോളിൽ കൈവച്ച് പറഞ്ഞു.

” മ് മതി . ഇതെടുത്ത് വച്ചിട്ട് നീ വാ വീട്ടിലേക്ക് പോകാം ഒന്നും കഴിച്ച് കാണില്ലല്ലോ . ”

കയ്യിലിരുന്ന ബോക്സ് എന്റെ നേരെ നീട്ടി കൊണ്ട് അവൻ പറഞ്ഞു . ഞാൻ അതെടുത്ത് അലമാരയിൽ വച്ച് വീടും പൂട്ടി വിനോദിനൊപ്പം അവന്റെ വീട്ടിലേക്ക് നടന്നു.

………

” ആ …… ഹരിയേട്ടാ ….. ഇത് എപ്പൊ എത്തി എന്താ വന്നിട്ട് ഞങ്ങളെ വിളിക്കാത്തെ …..”

വീടിന്റെ മുറ്റത്ത് നിന്ന ശ്രീവിദ്യ ഞാൻ വരുന്നത് കണ്ട പാടെ എന്റെ അടുത്തേക്ക് ഓടി വന്ന് എന്നോട് തിരക്കി .

” എത്തിയപ്പോ ഇന്നലെ രാത്രിയായി ശ്രീ….. പിന്നെ നിങ്ങളെ ബുദ്ധിമുട്ടിക്കണ്ട എന്ന് കരുതി . ”

ഞാൻ അവളുടെ തലയിൽ തലോടിക്കൊണ്ട് പറഞ്ഞു.

ഞാൻ നേരെ വിനോദിന്റെ വീടിനകത്തേക്ക് കയറി …..

” ആ മോനേ എപ്പോ എത്തി. ”

അടുക്കളയിൽ നിന്ന് വന്ന വിനോദിന്റെ അമ്മ എന്നോട് ചേദിച്ചു.

” ഇന്നലെ രാത്രി എത്തി ആന്റി . ”

” ആ അമ്മേ …. ഇവൻ കാറ് തിരിച്ച് എടുത്തിട്ടുണ്ട് നാളെ പോകാൻ വണ്ടിയായി . നമുക്ക് നാളെ പോകാൻ കാറ് കൊണ്ട് വരാൻ പറഞ്ഞ ചേട്ടനോട് വരണ്ട എന്ന് വിളിച്ച് പറയാൻ അച്ഛനോട് പറയണേ .. ”

വിനോദ് ഉടനെ ആന്റിയോട് പറഞ്ഞു .

പുറത്തു നിന്ന് വന്ന വിനോദിന്റെ അച്ഛനും എന്നോട് ഒരു പാട് കാര്യം സംസാരിച്ചു . ജോലിയുടെ കാര്യവും എന്റെ മാറ്റവും എല്ലാം കണ്ട് ദിനേശൻ മാമൻ എന്റെ തോളിൽ കൈവച്ചു പറഞ്ഞു .

” നന്നായി മോനേ ….. എനിക്കിപ്പോഴാ സന്തോഷമായത്. ”

വിനോദിന്റെ അച്ഛൻ അതും പറഞ്ഞ് അകത്തേക്ക് പോയി ….

ഞാൻ അവിടുന്ന് കാപ്പിയൊക്കെ കഴിച്ച് തിരിച്ച് വീട്ടിൽ വന്ന് പിറ്റന്നത്തേക്ക് കൊണ്ടു പോകാനുള്ള ബാഗൊക്കെ റെഡിയാക്കി വച്ചു …..

രാത്രി ഉറങ്ങാൻ നേരം മനസ്സ് മുഴുവൻ അസ്വസ്ഥമായിരുന്നു. പലതവണ തിരിഞ്ഞും മറിഞ്ഞും കിടന്ന് എങ്ങനെയോ നേരം വെളുപ്പിച്ചു. അവളെ , ലക്ഷ്മിയെ എങ്ങനെ ഫെയ്സ് ചെയ്യും എന്നായിരുന്നു മനസ്സ് മുഴുവൻ. പിന്നെ എന്റെ മനസ്സ് കൈവിട്ട് പോകുമോ… എന്നുള്ള പേടിയും..

രാവിലെ എണീറ്റ് റെഡിയായി ബാഗും എടുത്ത് കാറിന്റെ ഡിക്കിയിൽ വച്ച് കാറെടുത്ത് നേരെ വിനോദിന്റെ വീട്ടിലേക്ക് തിരിച്ചു. …. കാറ് വിനോദിന്റെ വീടിനുമുന്നിൽ നിർത്തി ഞാൻ അകത്തേക്ക് കയറി .

” ആ മോനേ കാപ്പി എടുത്ത് കഴിക്ക് ഞങ്ങൾ ഇപ്പൊ റെഡിയാകാം . ”

വിനോദിന്റെ അമ്മ അതും പറഞ്ഞ് റൂമിലേക്ക് പോയി . ഞാൻ ഡൈനിംങ് ടേബിളിൽ എടുത്ത് വച്ചിരുന്ന കാപ്പി എടുത്ത് കഴിക്കാൻ തുടങ്ങി .

” ആ വേഗം കഴിക്ക് ഇപ്പൊ ഇറങ്ങിയാലേ ഉച്ച കഴിയുമ്പോ അവിടെ എത്തു . ”

ഷർട്ടിന്റെ കയ്യും മടക്കിക്കൊണ്ട് വിനോദ് എന്നോട് പറഞ്ഞു .

കുറച്ച് കഴിഞ്ഞ് ഞങ്ങൾ അവിടുന്ന് ഇറങ്ങി …

” എടാ കാറ് ഞാനെടുക്കണോ …. ? ”

ഇറങ്ങാൻ നേരം വിനോദ് തിരക്കി .

” എന്താടാ ഞാനോടിക്കുന്നതിൽ നിനക്ക് പേടിയുണ്ടോ ? ”

” എന്ത് പേടി ….. ഒന്നു പോടാ …… ”

വിനോദ് അതും പറഞ്ഞ് ചിരിച്ചു കൊണ്ട് കാറിന്റെ ഫ്രണ്ട് സീറ്റിൽ കയറി . വിനോദിന്റെ അച്ഛനും അമ്മയും ശ്രീയും പുറകിലും . ഞാൻ കാറെടുത്തു . അത്യാവശ്യം സ്പീഡിൽ തന്നെ കാറ് റോഡിലൂടെ പറപ്പിച്ചു . ഉച്ചയ്ക്ക് ഒരു ഹോട്ടലിൽ കയറി ഊണും കഴിച്ചു.

ഒരു മൂന്ന് മണിയോടെ കാറ് ആ സുന്ദരമായ ഗ്രാമത്തിലേക്ക് പ്രവേശിച്ചു. ആ ചെറിയ ടാറിട്ട റോഡിലൂടെ പോയി ലക്ഷ്മിയുടെ വീടിനുമുന്നിൽ ഞാൻ കാറ് നിർത്തി .

കാറിൽ നിന്ന് പുറത്ത് ഇറങ്ങി നോക്കിയപ്പോൾ വിവാഹ ഒരുക്കത്തിന്റെ ഒരു ലക്ഷണവും ആ വീട്ടിലോ … പരിസരത്തോ ഇല്ല ….

‘ ഇന്ന് കഴിഞ്ഞാൽ ഇനി ആകപ്പാടെ രണ്ട് ദിവസമല്ലേ ഉള്ളൂ … ‘

ഞാൻ മനസ്സിൽ ഓർത്തു.

” എടാ വിനോദേ ….. കല്യാണത്തിന്റെ ഒരു ഒരുക്കവും കാണുന്നില്ലല്ലോ…… ”

ഞാൻ കാറിന്റെ ഡോറ് തുറന്ന് ഇറങ്ങിയ വിനോദിനോട് ചോദിച്ചു.

” എടാ… അതിനെന്താ സമയമുണ്ടല്ലോ നമുക്ക് ഒരുക്കാം .. നീ വാ….. ”

വിനോദ് ഒരു അവിഞ്ഞ ചിരിയോടെ എന്നോട് പറഞ്ഞു . ഡോറ് തുറന്നിറങ്ങിയ ശ്രീ എന്നെ നോക്കി ഒരു കള ചിരി ചിരിച്ച ശേഷം ലക്ഷ്മിയുടെ വീട്ടിലേക്ക് ഓടി പോയി. എനിക്കെന്തോ…. ഒരു പന്തികേട് തോന്നി .

” എടാ അവനെയും വിളിച്ചോണ്ട് വാടാ … ”

വിനോദിന്റെ അച്ഛൻ അതും പറഞ്ഞ് മുൻപേ നടന്നു പിന്നാലെ ആന്റിയും .

” നീ എന്താലോചിക്കുവാ ….. വാ ”

വിനോദ് അതും പറഞ്ഞ് എന്നെയും കൂട്ടി നടന്നു .

ഏകദേശം വിനോദിന്റെ അച്ഛന്റെ പ്രായമുള്ള ഒരാൾ വിനോദിന്റെ അച്ഛനോട് വിടിന് പുറത്ത് നിന്ന് സംസാരിക്കുന്നത് ഞാൻ കണ്ടു.

” എടാ…. അതാ ലക്ഷ്മിയുടെ അച്ഛൻ . എന്റെ ചെറിയച്ഛൻ . ”

വിനോദ് അതും പറഞ്ഞ് വീടിനുള്ളിലേക്ക് കയറി കൂടെ ഞാനും . ഒരു സെറ്റിയിൽ ഞാനും വിനോദും ഇരിപ്പ് പിടിച്ചു. പുറത്ത് നിന്ന് വിനോദിന്റെ അച്ഛനും ലക്ഷ്മിയുടെ അച്ഛനും അകത്ത് കയറി വന്നു . വിനോദ് എണീറ്റ കൂട്ടത്തിൽ ഞാനും എണീറ്റു .

” ഇരിക്ക് മോനേ … ”

ഉടനെ തന്നെ ലക്ഷ്മിയുടെ അച്ഛൻ പറഞ്ഞു .

” ഹരി അല്ലേ …. ലക്ഷ്മി പറഞ്ഞ് അറിയാം …. ”

ഉടനെ തന്നെ അയാൾ പറഞ്ഞു…

” എന്താ അങ്കിളെ ഒരുക്കങ്ങളൊന്നും ആയില്ലേ…. ആട്ടേ …. കല്യാണപെണ്ണ് എവിടെ …. ? ”

മനസ്സ് നീറുകയാണെങ്കിലും അതൊന്നും പുറത്ത് കാണിക്കാതെ ചിരിച്ചുകൊണ്ട് ഞാൻ കാര്യങ്ങൾ അന്വേഷിച്ചു.

” കല്യാണപ്പെണ്ണോ എന്താ മോനേ … മോൻ പറയുന്നതൊന്നും മനസ്സിലാകുന്നില്ല …. ”

ഉടനെ തന്നെ ഒന്നും മനസ്സിലാകാത്ത ഭാവത്തിൽ ലക്ഷ്മിയുടെ അച്ഛൻ പറഞ്ഞു.

” ഇവൻ ഇത് ചളമാക്കും … നീ എണീറ്റ് വന്നേ …. ചെറിയച്ചാ…. ഞങ്ങൾ ഇപ്പം വരാം ഒരു അരമണിക്കൂർ . ”

വിനോദ് അതും പറഞ്ഞ് സെറ്റിയിൽ നിന്ന് എണീറ്റ് എന്നെയും വലിച്ചോണ്ട് പുറത്തിറങ്ങി. ഞാൻ നോക്കിയപ്പോൾ ശ്രീവിദ്യ അകത്ത് നിന്ന് വാ പൊത്തി ചിരിക്കുകയാണ് . എനിക്കാണെങ്കിൽ ഒന്നും മനസ്സിലാകുന്നില്ല …..

‘ ദൈവമേ ഇത് എനിക്ക് വട്ടായതാണോ അതൊ എല്ലാർക്കും വട്ടായോ …. ‘

ഞാൻ മനസ്സിൽ ഓർത്തു .

” എടാ എങ്ങോട്ടോ …. ? ”

എന്നെയും വലിച്ചോണ്ട് വേഗത്തിൽ നടക്കുന്ന വിനോദിനോട് ഞാൻ ചോദിച്ചു.

” നീ ….വാ പറയാം. ”

വിനോദ് അതും പറഞ്ഞ് നടക്കുകയാണ് . അവസാനം ആ നടത്തം ചെന്ന് അവസാനിച്ചത് ആ കുളക്കരയിലാണ്. വിനോദ് നേരെ ചെന്ന് താഴെയുള്ള ഒരു പടിക്കെട്ടിൽ ഇരിപ്പ് പിടിച്ചു.

” നീ എന്താ എന്നെ കാഴ്ച കാണാൻ കൊണ്ടു വന്നതാണോ …. എന്താടാ ലക്ഷ്മിയുടെ അച്ഛൻ അങ്ങനെ പറയുന്നേ …. എനിക്കൊന്നും മനസ്സിലാകുന്നില്ല . അതോ മകളുടെ വിവാഹ കാര്യം അങ്ങേര് അറിഞ്ഞില്ലേ …… ? ”

ഞാനിതൊക്കെ ചോദിക്കുമ്പോഴും വിനോദ് താഴത്തെ പടിക്കെട്ടിൽ തലകുനിച്ച് ഇരിക്കുകയാണ് ….

” എടാ എന്താ ? ”

ഞാനതും ചോദിച്ചു കൊണ്ട് പടവുകൾ ഇറങ്ങി അവന്റെ അടുത്ത് എത്തി . അവന്റെ തലപിടിച്ച് പൊക്കി നോക്കിയപ്പോൾ അവൻ ഇരുന്ന് വാ പൊത്തി ചിരിക്കുകയാണ്.

” എന്താടാ നിനക്ക് വട്ടായാ ….. ”

നടക്കുന്നതൊന്നും മനസ്സിലാകാതെ ഞാനവനോട് ചോദിച്ചു.

” എടാ വട്ട് എനിക്കല്ല നിനക്കാ …. എടാ അവൾക്ക് കല്യാണമൊന്നും ആയിട്ടില്ല ഞാൻ നുണ പറഞ്ഞതാ …. ”

ചിരി അടക്കി കൊണ്ട് അവൻ പറഞ്ഞു . പക്ഷെ ആ വാക്കുകൾ കേട്ടപ്പോൾ മനസ്സിൽ എന്തോ ഒരു സന്തോഷം ഒപ്പം ഒരുപാട് ചോദ്യങ്ങളും ഉയർന്നു.

” എന്തിന് ? ”

ഞാനവനോട് ചോദിച്ചു.

” നീ ഇവിടെ ഇരിക്ക് പറയാം. ”

വിനോദ് അതും പറഞ്ഞ് എന്നെ പിടിച്ച് അവന്റെ അടുത്ത് ഇരുത്തി .

” എടാ ഇന്നുവരെ ഞാൻ നിന്നോട് ഇത്തരത്തിൽ നുണ പറഞ്ഞിട്ടില്ല . ഇപ്പൊ പറഞ്ഞെങ്കിൽ തന്നെ അതിന് കാരണവുമുണ്ട് . ”

” എടാ ….. ആ കാരണമാ ഞാൻ ചോദിച്ചത് ”

ഞാനവനോട് പറഞ്ഞു.

” പറയാം നീ ദൃതി പിടിക്കാതെ …. എടാ രണ്ട് മാസം മുൻപാ ചെറിയച്ഛൻ ഗൾഫിലെ ജോലിയൊക്കെ ഉപേക്ഷിച്ച് ഇവിടെ എത്തിയത് എങ്ങനെയെങ്കിലും ലക്ഷ്മിയുടെ വിവാഹം നടത്താൻ വേണ്ടി. അവൾക്ക് വേണ്ടി വിവാഹം ആലോചിച്ച് തുടങ്ങിയപ്പോഴാ ലക്ഷ്മി ചെറിയമ്മയോട് പറഞ്ഞത് അവൾക്ക് നിന്നെ ഇഷ്ടമാണെന്ന് …..

അവൾ അത് ചങ്കൂറ്റത്തോടെ തുറന്ന് പറഞ്ഞെങ്കിൽ നിന്നെ അവൾക്ക് അത്രയ്ക്ക് അസ്ഥിക്ക് പിടിച്ചതു കൊണ്ടാവില്ലേ ……. മ് …… ചെറിയമ്മ അത് എന്നെ വിളിച്ച് പറഞ്ഞു . ഞാൻ ചോദിച്ചപ്പോൾ ചെറിയച്ചനും ചെറിയമ്മയ്ക്കും നൂറ് വട്ടം സമ്മതം . പിന്നെ ഉള്ളത് ജാതക പ്രശ്നവും നിനക്ക് അവളെ വിവാഹം ചെയ്യാൻ ഇഷ്ടമാകുമോ എന്നുള്ളതുമായിരുന്നു.

ഞാൻ ഈ വിവരം വിളിച്ച് വീട്ടിൽ അമ്മയോട് പറഞ്ഞു . അമ്മയും ശ്രീയും കൂടെ നിന്റെ വീട് അരിച്ച് പെറുക്കി നോക്കിയപ്പോൾ എവിടെന്നോ നിന്റെ ജാതകം കിട്ടി . അച്ഛൻ അതും കൊണ്ട് ഇവിടെ വന്ന് ഇവിടത്തെ ഏതോ ജോത്സ്യനെ കാണിച്ചപ്പോൾ അല്ലെ അറിയുന്നത് നിന്റെ ജാതകം അത് വേറെ ലവെലാണെന്ന് . എടാ നിനക്ക് ദീർഘായുസ്സാ മരണം അടുക്കത്തില്ല, അതു കൊണ്ടാ അന്ന് അത്രയും വലിയ അപകടമുണ്ടായിട്ടും കൂടെ നീ തലനാരിഴയ്ക്ക് രക്ഷപ്പെട്ടത് . ലക്ഷ്മിക്ക് ഒരു ഭർത്താവ് യോഗമുണ്ടെങ്കിൽ അത് നീയുമായിട്ടായിരിക്കുമെന്നാ ആ ജോത്സ്യൻ പറഞ്ഞ് …..

പിന്നെയുള്ളത് നിന്റെ ഇഷ്ടം അറിയൽ എന്നുള്ളതായിരുന്നു . നേരെ തുറന്ന് നിന്നോട് ചോദിച്ചാൽ നീ കിടന്ന് ഉരുണ്ട് കളിക്കും എന്ന് എനിക്കറിയാം അതുകൊണ്ടല്ലേ ഞാനീ നാടകം കളിച്ചത്. ലക്ഷ്മിക്ക് വിവാഹം ഉറപ്പിച്ചു എന്ന് ഞാൻ നിന്നെ വിളിച്ച് പറഞ്ഞപ്പോൾ പോയതാ നിന്റെ ഫ്യൂസ് …. പിന്നീട് ഞാൻ വിളിക്കുമ്പോൾ എന്നോട് വലിയ സംസാരമില്ല പിന്നെ ഒരു ഒഴിഞ്ഞ് മാറലും .

പിന്നെ ഞാൻ ഒരു പൊട്ടനാണെന്നാണോ നീ കരുതിയെ , ഇന്നലെ നിന്റെ വീട്ടിലെ ആ കുപ്പി കണ്ട് ഇതെങ്ങനെ ഇവിടെ വന്നു എന്ന് ഞാൻ ചോദിച്ചപ്പോൾ നീ എന്താ പറഞ്ഞേ നീ പണ്ട് ഒരു വർഷം മുൻപ് വാങ്ങി വച്ചത് അല്ലേ … എടാ ആ കുപ്പി പാക്ക് ചെയ്തിട്ട് രണ്ട് മാസമല്ലേ ആയിട്ടുള്ളൂ : അതിന്റെ പുറത്തെ സ്റ്റിക്കറ് കൂടെ നോക്കിട്ട് നീ പറയാൻ കള്ളം കണ്ടുപിടിക്കേണ്ടതായിരുന്നു . പിന്നെ നിന്റെ കയിലെ ആ പത്ത് പവന്റെ മാല കൂടി കണ്ടപ്പോൾ ഞാൻ ഉറപ്പിച്ചു നിനക്ക് അവളെ പെരുത്ത് ഇഷ്ടമാണെന്ന് . എടാ പ്രേമിക്കുന്ന പെണ്ണിനല്ലാതെ ഒരാണ് മറ്റാർക്കെങ്കിലും ഇത്രയും വിലകൂടിയ ഗിഫ്റ്റ് കൊടുക്കുമോടാ പൊട്ടാ … എന്നിട്ട് അവളോട് ഇത്രയ്ക്ക് ഇഷ്ടമായിരുന്നിട്ടും വിവാഹം നിശ്ചയിച്ചു എന്ന് ഞാൻ പറഞ്ഞിട്ടും കൂടെ എല്ലാം ഉള്ളിൽ ഒതുക്കി നടക്കുന്നു , ഇത്രയും കാലം കൂടെ നടന്ന എന്നോട് പോലും പറയാതെ …. ”

വിനോദ് ഇത്രയും ഇടവിടാതെ എന്റെ മുഖത്ത് നോക്കി പറഞ്ഞ ശേഷം ഒരു ചെറിയ പിണക്കത്തോടെ മുഖം തിരിച്ച് ഇരുന്ന.

അവന്റെ വാക്കുകൾ കേട്ടപ്പോൾ സന്തോഷം കാരണം എന്റെ ഹൃദയം നിൽക്കുമോ എന്നു പോലും എനിക്ക് തോന്നിപ്പോയി . എന്തോ ഒരു വല്ലാത്ത ഫീൽ …..

” എടാ സോറി . ”

ഞാനവന്റെ തോളിൽ കൈവച്ച് പറഞ്ഞു .

” എന്തിന് ? എടാ കഴിഞ്ഞ ഒരു മാസമായി നീ തീ തിന്ന് ജീവിക്കുകയാണെന്ന് എനിക്കറിയാം ഞാൻ പറഞ്ഞ നുണ കാരണം … പിന്നെ അത് ഒരു ചെറിയ മധുര പ്രതികാരം കൂടെയായിരുന്നു , നീ കള്ള് കുടിച്ച് നടന്നപ്പൊ ഞാനും കുറെ വേദന അനുഭവിച്ചതാ . അന്ന് ഞാൻ ആദ്യമൊക്കെ നിന്നോട് കുടിക്കരുത് എന്ന് പറഞ്ഞപ്പൊ നീ അത് അനുസരിച്ചില്ലല്ലോ അതിനുള്ള ചെറിയ ഒരു ശിക്ഷ . എടാ …. ലക്ഷ്മി എന്റെ അനുജത്തിയാ അവളെ നിന്റെ കയ്യിലേക്ക് തരുന്നതിൽ കൂടുതൽ സന്തോഷിക്കുന്നത് ഞാനായിരിക്കും …

ഇപ്പൊ കാര്യങ്ങളൊക്കെ മനസ്സിലായല്ലോ … പിന്നെ ഇന്ന് ഇവിടെ വന്നത് നാട്ട് നടപ്പ് അനുസരിച്ച് ഒരു പെണ്ണുകാണൽ അത്രമാത്രം . അതിനിടയ്ക്ക് ഞാനീ നാടകം കളിച്ചതൊന്നും അറിയാത്ത ചെറിയച്ചനോട് കല്യാണപ്പെണ്ണ് എവിടെ ? ഒരുക്കങ്ങളൊന്നും ആവാത്തതെന്താ ? എന്നൊക്കെ ചോദിച്ചാൽ …. ”

വിനോദ് അതും പറഞ്ഞ് വീണ്ടും ചിരിക്കുകയാണ്. എന്റെ മനസ്സിലും വല്ലാത്ത ഒരു സന്തോഷം അത് എന്റെ മുഖത്ത് പുഞ്ചിരിയായി മാറ്റപ്പെട്ടു .

” ചിരിച്ചോണ്ട് ഇരിക്കാതെ എണീറ്റ് വാടാ …. ”

വിനോദ് അതും പറഞ്ഞ് എന്നെയും കൂട്ടി തിരിച്ച് ലക്ഷ്മിയുടെ വീട്ടിലേക്ക് നടന്നു. ഞങ്ങളെയും കാത്ത് വീടിന്റെ മുൻപിൽ തന്നെ വിനോദിന്റെ അച്ഛൻ നിൽപ്പുണ്ട് .

” എവിടെയായിരുന്നെടാ ഇത്രയും നേരം മ് … അകത്ത് കയറ് . ”

വിനോദിന്റെ അച്ഛൻ അത് പറഞ്ഞതും ഞങ്ങൾ അകത്ത് കയറി സെറ്റിയിലിരുന്നു .

” എന്നാലും എന്റെ വിനോദേ …. നീ എന്താ ഈ കാണിച്ചേ . ഹരി മോനേ …. വിവാഹത്തിന് മോന് സമ്മതമാണോ എന്ന് മോന്റോടെ ചോദിച്ച് പറയാന്നാ ഞങ്ങളോട് വിനോദ് പറഞ്ഞത് . അവൻ ഇങ്ങനെ ഒരു നാടകം കളിക്കുമെന്ന് ഒട്ടും പ്രതീക്ഷിച്ചില്ല . വിനോദിന്റെ അച്ഛൻ ഇപ്പൊ പറഞ്ഞപ്പോഴല്ലേ ഞങ്ങൾ കാര്യങ്ങൾ അറിഞ്ഞത് . ”

ലക്ഷ്മിയുടെ അച്ഛൻ എന്നോട് പറഞ്ഞു . വിനോദ് അപ്പോഴും ഇരുന്ന് ചിരിക്കുകയാണ് . വിനോദും വിനോദിന്റെ അച്ഛനും അമ്മയും ശ്രീയും മാത്രമേ ഈ നാടകകാര്യം അറിഞ്ഞുള്ളൂ എന്ന് എനിക്ക് മനസ്സിലായി ….

” നീ മോളേ വിളിക്ക് ….. ”

ലക്ഷ്മിയുടെ അച്ഛൻ അവളുടെ അമ്മയോട് പറഞ്ഞു.

ഉടനെ തന്നെ ഒരു ട്രേയിൽ ചായ കപ്പുകളുമായി ലക്ഷ്മി വന്നു . ചുവന്ന സാരിയാണ് വേഷം, എന്നെ മുൻപ് അറിയാത്ത ഭാവത്തിൽ നാണം കൊണ്ട് മുഖമൊക്കെ കുനിച്ചാണ് പുള്ളിക്കാരി എന്റെ അടുത്ത് വന്ന് എന്റെ നേരെ ട്രേ നീട്ടിയത് . ഞാൻ അതിൽ നിന്നും ഒരു കപ്പ് ചായ എടുത്തു .

” ശരിക്ക് നോക്ക് അവസാനം പെണ്ണിനെ കണ്ടില്ല എന്ന് പറയരുത് . ഓ…. അവളുടെ മുഖത്തെ നാണം കണ്ടില്ലേ …… ഒന്നും അറിയാത്ത പോലെ . ”

വിനോദ് അത് പറഞ്ഞതും ലക്ഷ്മി ട്രേ അവിടെ വച്ച ശേഷം അകത്തേക്ക് ഓടി . എല്ലാവരും വിനോദ് പറഞ്ഞത് കേട്ട് ചിരിക്കുകയാണ് …

” അപ്പൊ ബാക്കി കാര്യങ്ങളൊക്കെ പിന്നീട് സംസാരിക്കാം രണ്ട് ദിവസം കഴിഞ്ഞേ ഞങ്ങൾ പോകുന്നുള്ളൂ …. ”

വിനോദിന്റെ അച്ഛൻ അതും പറഞ്ഞ് പുറത്തേക്ക് ഇറങ്ങി . ചായയൊക്കെ കുടിച്ച് ഞാനും വിനോദും പുറത്തേക്ക് ഇറങ്ങി . ലക്ഷമിയോട് സംസരിക്കണം എന്നുണ്ട് പക്ഷെ ചായകൊണ്ടു വന്ന ശേഷം അവളെ അവിടെ ഒന്നും കണ്ടില്ല .

” എന്താടാ ഒരു വിഷാദ ഭാവം ഓ…. ലക്ഷ്മിയോട് സംസാരിച്ചില്ല അല്ലേ …. ടൈം ഒരു പാട് ഉണ്ട് ഹരി നീ ഇപ്പൊ വാ ….. ”

അതും പറഞ്ഞ് വിനോദ് എന്നെയും കൂട്ടി കാറിലെ ബാഗൊക്കെ എടുത്ത് അവന്റെ വീട്ടിലേക്ക് കയറി .

” നീ നിന്റെ ആ റൂം തന്നെ എടുത്തോ …. ”

വിനോദ് അത് പറഞ്ഞതും ഞാൻ ബാഗുമായി ആ റൂമിൽ കയറി . ഡ്രൈസ് പോലും മാറാതെ നേരെ കട്ടിലിലേക്ക് കിടന്നു . എന്തോ മനസ്സിലെ വലിയ ഒരു സങ്കടം ഒഴിഞ്ഞു പോയ പോലെ .

‘ അപ്പൊ അവൾക്കും എന്നെ ഇഷ്ടമാണ് . എന്നോട് പറയാനുള്ള മടി കൊണ്ടാകണം അന്ന് ഞാനിവിടെ അത്രയും ദിവസം താമസിച്ചിട്ടും ഒരു സൂചന പോലും തരാത്തത് … ശേ ഞാനെന്താ ഇങ്ങനെ അന്നേ അവളോട് എന്റെ ഇഷ്ടം തുറന്ന് പറയേണ്ടതായിരുന്നു… എന്തായാലും അവസാനം ദൈവം എന്നെ കൈവിട്ടല്ലോ ….. അവളോട് എങ്ങനെ ഒന്ന് സംസാരിക്കും അങ്ങോട്ട് ചെല്ലാമെന്ന് വച്ചാൽ ലക്ഷ്മിയുടെ അച്ഛനും അമ്മയും ശ്രീയുമൊക്കെ അവിടെ ഉണ്ടാകും .. ‘

ഞാൻ മനസ്സിൽ ഓരോ ഓരോ കാര്യങ്ങൾ ആലോചിച്ച് അങ്ങനെ കിടന്നു.

” എന്താ ഈ പകല് കിടന്ന് ദിവാസ്വപ്നം കാണുവാണോ … ? ”

വാതില് തുറന്ന് വന്ന ശ്രീ ആയിരുന്നു അത് എന്നോട് ചോദിച്ചത് … ഞാൻ ഉടനെ തന്നെ കടലിൽ എണീറ്റ് ഇരുന്നു .

” എന്താ ഒരു മൂഡ്‌ ഓഫ് . ചേട്ടന് ഈ വിവാഹത്തിന് താൽപര്യമാണെന്നാണല്ലോ ഏട്ടൻ ഇന്നലെ പറഞ്ഞത് . ഇപ്പൊ എന്താ ഇങ്ങനെ ആലോചിച്ച് ഇരിക്കുന്നേ … ഞങ്ങൾ ചേട്ടനോട് എല്ലാം മറച്ച് വച്ചതിൽ ചേട്ടന് വിഷമമുണ്ടോ …. വിനോദേട്ടനാ പറഞ്ഞേ ചേട്ടടനോട് ഒന്നും പറയരുത് എന്ന്. ”

ശ്രീ എന്റെ അടുത്ത് വന്ന് നിന്ന് പറഞ്ഞു .

” എനിക്ക് സന്തോഷമേ ഉള്ളൂ ശ്രീ …. എപ്പോഴോ ഞാനും ലക്ഷ്മിയെ ഇഷ്ടപ്പെട്ട് തുടങ്ങിയിരുന്നു . എന്നിലെ പേടിയാകാം തുറന്ന് പറയാൻ തടസ്സമായി നിന്നത് . ”

” ആ അപ്പൊ ചേട്ടന്റെ ഇപ്പോഴത്തെ വിഷമത്തിന്റെ കാരണം മനസ്സിലായി . ലക്ഷ്മി ചേച്ചി ആ കുളക്കരയിൽ ഉണ്ടാകും ചേട്ടനോട് അങ്ങോട്ട് ചെല്ലാൻ പറയാൻ വേണ്ടിയാ ചേച്ചി എന്നെ ഇങ്ങോട്ട് പറഞ്ഞ് വിട്ടത് . വേഗം പൊയ്ക്കോ , പിന്നെ അവിടെ പോയി ബ്ബ ബ ബ്ബ അടിക്കരുത് . ”

ചിരിച്ചുകൊണ്ട് അവൾ പറഞ്ഞു .

” എടീ … കുരുപ്പേ ഇത് പറയാൻ വന്നിട്ടാണല്ല ഇത്രയും നേരം നീ ചുറ്റിവളഞ്ഞ് നിന്നത് . ”

ഞാനതും പറഞ്ഞ് പതിയെ അവളുടെ ചെവിയിൽ ഒരു ചെറിയ കിഴിക്കും കൊടുത്ത് പുറത്തേക്കിറങ്ങി .

” ഓടുന്ന ഓട്ടം കണ്ടില്ലേ ….. ”

ഞാൻ ദ്യതി പിടിച്ച് പോകുന്നതിനിടയ്ക്ക് അവൾ ചെവിയിൽ കൈവച്ച് കൊണ്ട് വിളിച്ച് പറഞ്ഞു.

ഞാൻ നേരെ പുറത്തേക്ക് ഇറങ്ങി വിനോദിനെ അവിടെയൊന്നും കണ്ടില്ല റൂമിലായിരിക്കും . എന്നെ കണ്ടാൽ എങ്ങോട്ടാ എന്നുള്ള ചോദ്യം ഉറപ്പാ . ഞാൻ പതിയെ ആരും കാണാതെ വീടിന്റെ പുറക് വശം വഴി പാടവരമ്പിലൂടെ ആ കുളക്കരയിലേക്ക് പോയി . പതിയെ ശബ്ദ്മുണ്ടാക്കാതെ നടന്ന് ഞാനവിടെ എത്തിയപ്പോൾ താടിക്ക് കൈയ്യും കൊടുത്ത് താഴത്തെ പടിക്കെട്ടിൽ ദൂരത്തേക്ക് കണ്ണും നട്ട് ഇരിക്കുന്ന ലക്ഷ്മിയെയാണ് ഞാൻ കണ്ടത് . സാരിയൊക്കെ മാറ്റി ഇപ്പൊ ഒരു ചുരിദാറാണ് വേഷം .

” എന്താ കാത്തിരുന്ന് മുഷിഞ്ഞോ …… ?”

ഞാൻ പതിയെ മുകളിൽ നിന്ന് അവളെ നോക്കി കൊണ്ട് ചോദിച്ചു.

ഒരു നാണം നിറഞ്ഞ ചിരിയോടെ പെട്ടെന്ന് അവൾ എന്നെ തിരിഞ്ഞ് നോക്കി. ഞാൻ നടന്ന് അവളുടെ അടുത്ത് ചെന്നിരുന്നു.

” എന്ത് പറയണം എന്നെനിക്ക് അറിയില്ല പക്ഷേ …. ”

ഞാൻ പറഞ്ഞ് നിർത്തി …

” ഹരിയേട്ടാ എനിക്ക് ഒന്ന് മാത്രം അറഞ്ഞാൽ മതി എന്നെ ഇഷ്ടമാണോ ….. ? അതിന്റെ ഉത്തരം ചേട്ടന്റെ നാവ് കൊണ്ട് തന്നെ എനിക്ക് കേൾക്കണം ….. ”

അവൾ അത് എന്നെ നോക്കി പറഞ്ഞപ്പോൾ ഇന്നേ വരെ കണ്ടിട്ടില്ലാത്ത ഒരു തിളക്കം ഞാനവളുടെ കണ്ണുകളിൽ കണ്ടു.

ഞാൻ അവളുടെ കൈകൾ കോർത്ത് പിടിച്ചു .

” ഒത്തിരി ഇഷ്ടമാണ് എനിക്ക് തന്നെ . അന്ന് ആദ്യമായി കണ്ടപ്പോൾ മനസ്സിൽ കയറി കൂടിയതാണ് ഈ മുഖം , പക്ഷെ അത് ഒരു പ്രണയമായി മാറിയത് എപ്പോഴെന്ന് എനിക്ക് അറിയില്ല . തനിക്ക് എന്റെ കൂടെ ജീവിക്കാൻ ഇഷ്ടമാകില്ല എന്ന് തോന്നിയത് കൊണ്ടാ ഞാൻ എന്റെ ഇഷ്ടം മനസ്സിൽ സൂക്ഷിച്ചത് . പക്ഷെ ഇപ്പോൾ അത് ഇങ്ങനെ വന്ന് നന്നായി അവസാനിക്കുമെന്ന് ഞാൻ ഒട്ടും പ്രതീക്ഷിച്ചില്ല ..”

ഞാനത്രയും പറഞ്ഞപ്പോഴേക്കും അവളുടെ കണ്ണു കളിൽ നനവ് പടർന്നിരുന്നു .

” എന്താ എന്തിനാ താനിപ്പോ കരയുന്നേ … ”

” അല്ല ചേട്ടന് പേടിയുണ്ടോ ….. ജോത്സ്യൻ അങ്ങനെയൊക്കെ പറഞ്ഞെങ്കിലും എന്റെ മനസ്സിൽ ഒരു പേടിയുണ്ട് അങ്ങനെ ഒരു ഭാഗ്യക്കേട് എന്റെ ജാതകത്തിൽ ഉണ്ട് . ”

” എനിക്ക് ഒരു പേടിയും ഇല്ല , ഒരിക്കൽ സ്വയം നശിച്ച് മരിക്കാൻ തീരുമാനിച്ചവനാ ഞാൻ . ആ എന്നെ നിങ്ങൾ എല്ലാവരും കൂടെ മാറ്റിയെടുത്തു. പക്ഷെ തന്നെ നഷ്ടപെടുമെന്ന് തോന്നിയപ്പോൾ ഞാൻ വീണ്ടും ആ ദു:ശീലത്തിലേക്ക് മടങ്ങി പോകുമോ എന്നു പോലും പേടിച്ചു. ഇനി അങ്ങനെയൊന്ന് ഉണ്ടാകില്ല . തന്റെ ജാതകപ്രശ്നം കാരണം എനിക്ക് മരണമാണ് ദൈവം വിധിച്ചിരിക്കുന്നത് എങ്കിൽ ഞാൻ അതിലും സന്തുഷ്ടനാണ് കാരണം ഒരു നിമിഷമെങ്കിലും താൻ ഞാൻ കെട്ടിയ താലി കഴുത്തിൽ അണിയുമല്ലോ, ഒരു നിമിഷമെങ്കിലും താൻ എന്റെ ഭാര്യ ആകുമല്ലോ ……”

ഞാനത് പറഞ്ഞ്പ്പോൾ തന്നെ അവൾ അവളുടെ കൈ കൊണ്ട് എന്റെ വാ പൊത്തി.

” ഇല്ല ചേട്ടാ … മനസ്സിലെ പേടി കൊണ്ട് ചോദിച്ച് പോയതാ , ചേനെ ഞാൻ ആർക്കും വിട്ടുകൊടുക്കില്ല , മരണത്തിലും ഞാനും ഒപ്പം ഉണ്ടാകും . ”

അവൾ അതു പറഞ്ഞപ്പോൾ കണ്ണിലെ നനവ് നിറഞ്ഞ് കവളിലൂടെ ഒഴുകാൻ തുടങ്ങി .

” താനെന്തിനാ വെറുതെ ആവശ്യമില്ലാത്ത കാര്യങ്ങൾ ആലോചിച്ച് കരയുന്നേ… ഇനി അത് ഓർക്കരുത് . ”

ഞാനതും പറഞ്ഞ് അവളുടെ മുഖത്തെ കണ്ണുനീർ തുള്ളികൾ എന്റെ വിരലുകം കൊണ്ട് ഒപ്പി എടുത്തു.

കുളത്തിലെ വെള്ളത്തിലേക്ക് എന്തോ ശക്തമായി വന്ന് പതിച്ച് നിശ്ചലമായി കിടന്ന വെള്ളത്തിൽ ഓളങ്ങൾ രൂപപ്പെട്ടു . ആ ശബ്ദം കേട്ട് ഞങ്ങൾ തിരിഞ്ഞ് നോക്കി . മുകളിലത്തെ പടവിൽ ഞങ്ങളെയും നോക്കി വിനോദ് നിൽക്കുകയാണ് . അവൻ ഞങ്ങളെ പറ്റിക്കാനായി കല്ല് എടുത്ത് വെള്ളത്തിലേക്ക് എറിഞ്ഞതാണ് . ഒരു അവിഞ ചിരിയുമായാണ് പുള്ളികാരന്റെ നിൽപ്പ്. അവനെ കണ്ടതും എന്റെ കൈക്കുള്ളിൽ ഇരുന്ന അവളുടെ കൈകൾ വലിച്ചെടുത്ത് ചാടി എണീറ്റ് ചെറിയ ചമ്മലോടെ നിൽക്കുകയാണ് ലക്ഷ്മി .

” എന്തോന്നാടാ ഇത് , മനസിലെ ഇഷ്ടം അന്നേ തുറന്ന് പറഞ്ഞിരുന്നേൽ എന്നേ നിനക്ക് ഇവളെ നിന്റെ വീട്ടിൽ കയറ്റാമായിരുന്നു . എന്നിട്ട് എന്റെ കണ്ണ് തെറ്റിയ സമയം രണ്ടും കൂടെ ഇവിടെ വന്നിരുന്ന് സെന്റി അടിക്കുന്നു. നിന്നെ അവിടെ അമ്മ അന്വേഷിക്കുന്നു ചെല്ല് ലക്ഷ്മി …”

അവൻ അത് പറഞ്ഞതും പടിക്കെട്ടുകൾ ഓടിക്കയറി എന്നെ നോക്കി ചിരിച്ച ശേഷം ലക്ഷ്മി വീട്ടിലേക്ക് ഓടി ….

” എടാ വാ…. ചെറിയച്ഛന് നിന്നോട് എന്തോ പറയാൻ ഉണ്ടെന്ന് … എന്തായാലും പുള്ളിക്കാരൻ ഭയങ്കര ഹാപ്പിയാ …. ”

അതും പറഞ്ഞ് വിനോദ് എന്റെ തോളിലൂടെ കൈ ഇട്ടു ഞങ്ങൾ പതിയെ വീട്ടിലേക്ക് നടന്നു.

എന്നെയും കാത്ത് ലക്ഷ്മിയുടെ അച്ഛൻ വീടിന്റെ മുൻവശത്ത് തന്നെ നിൽപ്പുണ്ട്.

” ചെറിയച്ചാ ഇതാ …. എന്ത് വേണേലും സംസരിച്ചോ …. ഹരി ഞാൻ റൂമിൽ ഉണ്ടാകും . ”

വിനോദ് അതും പറഞ്ഞ് എന്നെ ലക്ഷ്മിയുടെ അച്ഛന്റെ മുൻപിൽ നിർത്തിയ ശേഷം വീടിന്റെ അകത്തേക്ക് പോയി .

” മോനേ എനിക്ക് കുറച്ച് സംസാരിക്കാനുണ്ട് , ”

” അതിനെന്താ അങ്കിളേ …. ”

” മോൻ എന്നെ ലക്ഷ്മി വിളിക്കുന്നതു പോലെ അച്ഛാ എന്നു വിളിച്ചാൽ മതി . മോൻ എനിക്ക് മരുമകനല്ല മകനാ …”.

” ശരി അച്ഛാ . ”

” മോനേ …. ഏതൊരു പെൺമക്കളുള്ള അച്ഛനും സ്വപ്നം കാണുന്നത് മകളെ നല്ല ഒരുവന്റെ കയ്യിൽ പിടിച്ച് കൊടുക്കണമെന്നാ . എന്റെ മോളുടെ വിവാഹം പലതവണ മുടങ്ങിയപ്പോൾ എന്റെ മനസ്സ് ഒരുപാട് വേദനിച്ചതാ …. പക്ഷെ ദൈവം വലിയവനാ അവൾക്ക് ഇഷ്ടപ്പെട്ട മോനെ തന്നെ എന്റെ മോൾക്ക് ലഭിച്ചില്ലേ …. മോനോട് എത്ര നന്ദി പറഞ്ഞാലും മതിയാവില്ല . ”

” അച്ഛാ നന്ദി പറയേണ്ടത് ഞാനാണ് ….. അച്ഛന്റെ മോളും വിനോദും കൂടെയാ എന്നെ മാറ്റിയെടുത്തത് . എനിക്ക് ലക്ഷ്മിയെ ഇഷ്ടമാണ് അവൾക്ക് എന്നെയും അതു മതിയെനിക്ക് … ”

” മോന് സമ്മതമെങ്കിൽ മോൻ തിരിച്ച് പോകുന്നതിനു മുൻപ് വിവാഹം നടത്തണമെന്നാ എന്റെ ആഗ്രഹം. ഇവിടുത്തെ ക്ഷേത്രത്തിൽ വച്ച് അധികം ആർഭാടമൊന്നുമില്ലാതെ അടുത്ത ബന്ധുക്കളെ മാത്രം വിളിച്ച് . എന്താ മോന്റ അഭിപ്രായം . ”

” എനിക്ക് എതിരഭിപ്രായമൊന്നുമില്ല അച്ഛാ എല്ലാം അച്ഛന്റെ ഇഷ്ടം പോലെ … ”

” എന്നാൽ ശരി മോനേ ഞാൻ വിനോദിന്റെ അച്ഛനോട് കൂടെ സംസാരിക്കട്ടെ … ”

ഞങ്ങൾ അത്രയും സംസാരിച്ച ശേഷം ഞാൻ റൂമിലേക്ക് പോയി . പിന്നീടുള്ള കാര്യങ്ങൾ വേഗത്തിലായിരുന്നു . അവർ തന്നെ വിവാഹ തിയതി നിശയിച്ചു , ഇനി വെറും രണ്ടാഴ്ച മാത്രം . ഒരുക്കങ്ങളും മറ്റും ഉള്ളതുകൊണ്ട് പിറ്റെന്ന് രാവിലെ തന്നെ ഞങ്ങൾ നാട്ടിലേക്ക് തിരിക്കേണ്ടതുണ്ടായിരുന്നു .

…….

” ശ്രീ …… ലക്ഷ്മിയോട് ഒന്ന് വീടിന് പുറകിലേക്ക് വരാൻ പറ എനിക്കൽപ്പം സംസാരിക്കാനുണ്ട്. ”

ഞാൻ ശ്രീ വിദ്യയോട് പറഞ്ഞു

” ഉം.. ഇപ്പൊ എന്റെ ഹെൽപ്പ് വേണം ല്ലേ ഇന്നലെ എന്റെ ചെവി പിടിച്ച് തിരിച്ചതോ ? ”

” എടീ അത് വെറുതെ ചെയ്തതല്ലേ , ഒന്നു പോയി പറ എന്റെ ശ്രീ ”

” ശരി ഞാൻ പറയാം ”

ശ്രീ വിദ്യ അതും പറഞ്ഞ് ലക്ഷ്മിയുടെ വീട്ടിലേക്ക് പോയി ഞാൻ പതിയെ നടന്ന് വീടിന് പുറക് വശത്തേക്ക് നീങ്ങി.

കുറച്ച് നേരം നിന്നപ്പോൾ ലക്ഷ്‌മി പുറക് വശത്തെ വാതിൽ തുറന്ന് വന്നു.

” എന്താ ഹരിയേട്ടാ…. ”

” ഒന്നുമില്ല ലക്ഷ്മി തന്നോട് ഒന്ന് സംസാരിക്കണം എന്ന് തോന്നി ഇനി രണ്ടാഴ്ച കഴിഞ്ഞല്ലേ കാണാൻ പറ്റൂ വിവാഹത്തിന്റെ അന്ന് . ”

ഞാനത് പറഞ്ഞപ്പോഴേക്കും അവളുടെ മുഖം നാണം കൊണ്ട് ചുവന്നിരുന്നു.

” ഞങ്ങൾ അൽപ്പം കഴിഞ്ഞ് ഇറങ്ങും ഞാൻ ഫോണിൽ വിളിച്ചോളാം. ”

” ശരി ഹരിയേട്ടാ …. ”

” ഹരീ നീ എവിടെയാ നമുക്ക് ഇറങ്ങണ്ടെ ”

വിനോറിന്റെ ശബ്ദം ഉച്ചത്തിൽ കേട്ടു . ഞാൻ വേഗം തന്നെ ലക്ഷ്മിയോട് യാത്ര പറഞ്ഞ് അവിടുന്ന് ഇറങ്ങി.

അങ്ങനെ കല്യാണ ഒരുക്കങ്ങൾ ദൃതിയിൽ തന്നെ നടന്നു . എനിക്ക് പിന്നെ ക്ഷണിക്കാൻ ബന്ധുക്കളും സുഹൃത്തുക്കളും അങ്ങനെ ഇല്ലാത്തതുകൊണ്ട് ആ തിരക്കിൽ നിന്നും ഞാൻ രക്ഷപ്പെട്ടു . പിന്നെ എന്റെ മനസ്സിലും വിവാഹം ചെറിയ രീതിയിൽ മതി എന്ന ആഗ്രഹം തന്നെയാണ് ഉണ്ടായിരുന്നത് . എന്നും ലക്ഷ്മിയുമായുള്ള ഫോൺ വിളി തകൃതിയിൽ തന്നെ നടന്നു . അങ്ങനെ ആ രണ്ടാഴ്ച വേഗത്തിൽ കടന്നു പോയി . എന്റെ വീട്ടിൽ നിന്നും ലക്ഷ്മിയുടെ വീട്ടിലേക്ക് കുറച്ച് അധികം ദൂരമുള്ളതു കൊണ്ട് കല്യാണത്തിന്റെ തലേ ദിവസം ഞാനും വിനോദും കൂടെ വിനോദിന്റെ നാട്ടിലേക്ക് തിരിച്ചു . വിനോദിന്റെ അച്ഛനും അമ്മയും സഹോദരിയും രണ്ട് ദിവസം മുൻപേ തന്നെ അങ്ങോട്ട് പോയിരുന്നു .

……….

വൈകുന്നേരം ആയപ്പോഴേക്കും എന്റെ കാറ് ആ സുന്ദരമായ ഗ്രാമത്തിലേക്ക് പ്രവേശിച്ചു. ഞാൻ എന്റെ കാറ് വിനോദിന്റെ വീടിനു മുന്നിൽ നിർത്തി. ലക്ഷ്‌മിയുടെ വീട്ടിൽ ചില ബന്ധുകളൊക്കെ നിൽപ്പുണ്ട്, അവർ എന്നെ നോക്കി എന്തൊക്കെയോ അടക്കം പറയുകയാണ് . ലക്ഷ്മിയുടെ വീടൊക്കെ ചെറുതായി ഒന്ന് ഒരുക്കിയിട്ടുണ്ട്. ഞാൻ കാറിൽ നിന്നും ഇറങ്ങിയതും ശ്രീ ഓടി എന്റെ അടുത്ത് വന്നു.

” എന്താ ഹരിയേട്ടാ വൈകിയത് ”

” വീട്ടിൽ നിന്ന് വൈകിയാ ഇറങ്ങിയത് ശ്രീ….”

” എടാ വാ ”

വിനോദ് അതും പറഞ്ഞ് എന്നെയും കൂട്ടി വിനോദിന്റെ വീട്ടിലേക്ക് കയറി .

” എടാ ലക്ഷ്മിയെ ഒന്ന് കാണാൻ പറ്റുമോ, ഒന്ന് സംസാരിക്കാൻ . ”

ഞാൻ വിനോദിനോട് തിരക്കി

” എടാ അത് ….. അവിടെ അവളുടെ ബന്ധുകളൊക്കെ വന്നിട്ടുണ്ട് …. നീ ഈ ഒരു ദിവസം കൂടെ ക്ഷമിക്ക് … ”

വിനോദ് ചിരിച്ചു കൊണ്ട് പറഞ്ഞു .

ഞാൻ ഫോണെടുത്ത് ലക്ഷ്മിയെ വിളിച്ചു . ബല്ല് കേട്ടെങ്കിലും കോൾ എടുത്തില്ല . വീണ്ടും വിളിച്ചു.

” ഹലോ ”

ലക്ഷ്മിയുടെ ആ ശബ്ദം എന്റെ കാതുകളിൽ കേട്ടു.

” ലക്ഷ്മി ഞാൻ ഇവിടെ എത്തി തന്നെ ഒന്ന് കാണാൻ പറ്റുമൊ ….. ”

” സോറി ഹരിയേട്ടാ . ചേട്ടൻ വന്നത് ഞാൻ അറിഞ്ഞു . ചില ആന്റിമാരൊക്കെ വന്നിട്ടുണ്ട് എന്നെ ഇടം വലം തിരിയാൻ സമ്മതിക്കുന്നില്ല . ഞാൻ ഫോൺ വയ്ക്കുവാണേ…”

ലക്ഷ്മി അതും പറഞ്ഞ് കോൾ കട്ടു ചെയ്തു . വിനോദ് പറഞ്ഞതു പോലെ ഇന്നൊരു ദിവസം കൂടി ….

ഇടയ്ക്ക് ലക്ഷ്മിയുടെ അച്ഛൻ എന്റെ അടുത്ത് വന്ന് കാര്യങ്ങളൊക്കെ തിരക്കി. എന്റെ ഭാഗത്ത് ബന്ധുക്കൾ ഇല്ലാത്തതു കൊണ്ട് ലക്ഷ്മിക്ക് വാങ്ങിയ വിവാഹവസ്ത്രങ്ങളും മറ്റും വിനോദും അവന്റെ അച്ഛനും അമ്മയും ശ്രീയും കൂടി ലക്ഷ്മിയുടെ വീട്ടിൽ കൊണ്ട് കൊടുത്തു.

രാത്രി ഉറങ്ങാൻ നേരം ഞാൻ ഏറെ സന്തേഷവാനായിരുന്നു. ആ രാത്രി ഞാൻ വർഷങ്ങൾക്ക് ശേഷം മനസ്സ് നിറഞ്ഞ സന്തോഷത്തിൽ ഉറങ്ങി.

രാവിലെ എല്ലാ വിവാഹ വീട്ടിലെയും പോലെ ബഹളം കേട്ടാണ് ഞാൻ ഉണർന്നത് . കുളി കഴിഞ്ഞ് എങ്ങനെയോ ഒരു വിധത്തിൽ കുറച്ച് കാപ്പിയും കഴിച്ച് മുണ്ടും ഷർട്ടും ഇട്ട് വിനോദിന്റെ മുൻപിൽ ഇരുന്നതേ എനിക്ക് ഓർമ്മ ഉള്ളൂ അവൻ മേക്കപ്പ് എന്നും പറഞ്ഞ് എന്റെ മുഖത്ത് എന്തൊകെയോ തേച്ച് പിടിപ്പിച്ച് ,കുറച്ച് കഴിഞ്ഞ് ഞാൻ കണ്ണാടിയിൽ നോക്കിയപ്പോ കുറച്ച് കൂടി ഭംഗിയൊക്കെ എന്റെ മുഖത്ത് വന്നു എന്ന് എനിക്ക് മനസ്സിലായി. ക്ഷേത്രത്തിലേക്ക് പോകാൻ സമയമായപ്പോൾ ഞങ്ങൾ വീടിന്പുറത്ത് ഇറങ്ങി . ഞാൻ ചുറ്റും നോക്കിയെങ്കിലും പുറത്ത് ഞങ്ങളല്ലാതെ മറ്റാരും ഇല്ലായിരുന്നു .

” എടാ അവരൊക്കെ അൽപ്പം മുൻപ് ക്ഷേത്രത്തിലേക്ക് തിരിച്ചു , നീ വന്ന് വണ്ടിയിൽ കയറ് . ”

ഞാൻ ചുറ്റും നോക്കുന്നത് കണ്ട് കാര്യം മനസ്സിലായ വിനോദ് പറഞ്ഞു . വിനോദ് കാറെടുത്തു , ഒരു പത്ത് മിനിട്ട് യാത്ര ചെയ്തപ്പോഴേക്കും കാറ് ഒരു ക്ഷേത്രത്തിനടുത്ത് എത്തി . ഒരു ചെറിയ ദേവീ ക്ഷേത്രം , വിനോദ് എന്നെയും കൂട്ടി നടന്ന് എന്നെ കതിർമണ്ഡപത്തിലിരുത്തി . ഏതാനം കുറച്ച് ആൾക്കാർ മാത്രം , പൂജാരി എന്തൊക്കെയോ മന്ത്രങ്ങൾ പറയുകയാണ് . എന്റെ നെഞ്ച് ഒരു പെരുമ്പറ മുഴങ്ങുന്ന ശബ്ദത്തോടെ പിടയ്ക്കുകയാണ് സന്തോഷവും അതിലുപരി ടെൻഷനും . എന്റെ അവസ്ഥ മനസ്സിലാക്കിയ വണ്ണം ഒന്നുമില്ല എന്ന രീതിയിൽ വിനോദ് കണ്ണടച്ചു കാണിച്ചു .

അൽപം കഴിഞ്ഞപ്പോൾ ഞാൻ വാങ്ങി നൽകിയ ചുവന്ന പട്ടുസാരിയണിഞ്ഞ് ആഭരണമൊക്കെ ഇട്ട് പൂവൊക്കെ ചൂടി സക്ഷാൽ ലക്ഷ്മീ ദേവി കണക്കെ ലക്ഷ്മി എന്റെ അടുത്തേക്ക് നടന്നടുത്തു. ആരൊക്കെയോ ചേർന്ന് അവളെ എന്റെ അടുത്ത് ഇരുത്തി . അവൾ എന്റെ മുഖത്തേക്ക് പുഞ്ചിരി തൂകി കൊണ്ട് നോക്കിയപ്പോൾ സന്തോഷം കൊണ്ട് എതോ ഒരു ലോകത്തിൽ എത്തിയ അവസ്ഥയായരുന്നു എനിക്ക് . പൂജാരി എന്റെ കയ്യിലേക്ക് താലി നീട്ടിയതും ഞാൻ അതു വാങ്ങി അഗ്നി സാക്ഷിയാക്കി അവളുടെ കഴുത്തിൽ അണിഞ്ഞു . അതു കഴിഞ്ഞ് ലക്ഷ്മിയുടെ അച്ഛൻ അവളുടെ കൈപിടിച്ച് എന്നെ ഏൽപ്പിച്ചു. ഞാൻ ആ കയ്യും പിടിച്ച് ആ അഗ്നിയെ വലം വച്ചു . അവിടെ തന്നെ ഒരുക്കിയിരുന്ന സദ്യ വട്ടമൊക്കെ കഴിഞ്ഞ് തിരിച്ച് ലക്ഷ്മിയുടെ വീട്ടിൽ എത്തിയപ്പോൾ ഉച്ച കഴിഞ്ഞിരുന്നു . ലക്ഷ്മിയെ മറ്റൊരു മുറിയിലേക്ക് കൂട്ടിക്കൊണ്ട് പോയി . ഞാൻ വിനോദിന്റെ വീട്ടിൽ ചെന്ന് ഒന്ന് ഫ്രഷായി ഡ്രൈസ് ഒക്കെ മാറി .

“ഹരി നിന്നെ ചെറിയച്ഛൻ തിരക്കുന്നുണ്ട് ”

വിനോദ് അത് പറഞ്ഞപ്പോൾ ഞാൻ പുറത്തേക്ക് ഇറങ്ങി .

” എന്താ മോനേ, മോന് അവിടെ മുറി ഒരുക്കിയിരുന്നല്ലോ ”

എന്നെ കണ്ടതും ലക്ഷ്മിയുടെ അച്ഛൻ പറഞ്ഞു .

” അത് അച്ചാ എന്റെ ഡ്രെസ് ഒക്കെ ഇവിടെ ആയിരുന്നു … പിന്നെ കുളിച്ച് ഫ്രഷായി ”

” ആ ശരി മോനേ … ഇന്നിനി പോയാൽ വൈകും നിങ്ങൾക്ക് നാളെ രാവിലെ പോകാം . മോനേ അവിടെ ഉള്ളവരൊക്കെ തിരക്കുന്നുണ്ട്. വാ ….. ”

” ശരി അച്ഛാ ഞാൻ വരാം. ”

ഞാൻ നേരെ അച്ഛനോടൊപ്പം ലക്ഷ്മിയുടെ വീട്ടിലേക്ക് പോയി. അവിടെയുണ്ടായിരുന്നവരെയൊക്കെ പരിചയപ്പെട്ടു. മണിക്കൂറുകൾ അങ്ങനെ കൊഴിഞ്ഞ് പോയി . ബന്ധുക്കൾ ഒക്കെ പോയി കല്യാണ വീട് നിശബ്ദമായി.

…….

രാത്രി കട്ടിലിൽ ഫോണും നോക്കി ഇരുന്നപ്പോഴാണ് ലക്ഷ്മി വാതിൽ തുറന്ന് കയ്യിൽ പാൽ ഗ്ലാസ്സുമായി നടന്ന് വന്നത് . ഒരു ഇളം പച്ച സാരിയാണ് വേഷം . എന്റെ അടുത്ത് വന്ന ലക്ഷ്മിയെ ഞാൻ കട്ടിലിൽ പിടിച്ച് ഇരുത്തി . അവളുടെ മുഖം നാണം കൊണ്ട് ചുവന്നിരിക്കുകയാണ്.

” ഇതുവരെ നാണം മാറീലെ … ”

ഞാൻ അവളുടെ കയിൽ നിന്നും പാൽഗ്ലാസ്സ് വാങ്ങിക്കൊണ്ട് ചോദിച്ചു. ഗ്ലാസ്സിലെ പാൽ പകുതി കുടിച്ച ശേഷം ഞാൻ അവൾക്കം കൊടുത്തു. അത് അവൾ വാങ്ങി കുടിച്ചു .

” ലക്ഷ്മി …. താൻ കിടന്നോ . എന്റെ അച്ഛനും അമ്മയും അനുജനും തന്നെ കണ്ടിട്ടില്ല . അവർ മരിച്ചു എങ്കിലും ആ മണ്ണിൽ അവർ ഇപ്പോഴും ഉണ്ട്. അതുകൊണ്ട് അവിടെ ആ മണ്ണിൽ തന്നെ നിർത്തി അവരുടെ മരുമകളാണ് താൻ എന്ന് എനിക്ക് പറയണം അതിനു ശേഷമേ നമ്മൾ ശരിക്കും ഒരുമിക്കൂ … ”

” ശരി ഹരിയേട്ടാ ഇനി ഏട്ടന്റെ ഇഷ്ടമാണ് എന്റെയും . ”

അങ്ങനെ രാത്രിയുടെ യാമങ്ങളിൽ എപ്പോഴോ ഞങ്ങളെ ഉറക്കം വന്ന് തലോടി …

……..

പിറ്റേന്ന് ലക്ഷ്മി തന്റെ അച്ഛനോടും അമ്മയോടും ജനിച്ചു വളർന്ന നാടിനോടും യാത്ര ചോദിക്കുമ്പോൾ അവളുടെ കണ്ണുകളിൽ നിന്ന് കണ്ണുനീർ പൊഴിയുന്നുണ്ടായിരുന്നു.

” ലക്ഷ്മീ കരയാതെ , എപ്പോൾ വേണമെങ്കിലും നമ്മൾക്ക് വരാമല്ലോ .. ”

ഞാനതും പറഞ്ഞ് അവളെ ചേർത്ത് പിടിച്ചു….. അങ്ങനെ ദൂരങ്ങൾ താണ്ടി ഉച്ച കഴിഞ്ഞപ്പോഴേക്കും കാറ് എന്റെ വീടിന്റെ മുൻപിൽ എത്തി .

” നിങ്ങൾ നിൽക്ക് ഞാൻ നിലവിളക്ക് കൊണ്ട് വരാം ”

വിനോദിന്റെ അമ്മ അതും പറഞ്ഞ് വീടിന്റെ കീയും എടുത്ത് വീട് തുറന്നു.

ഞാനും ലക്ഷ്മിയും കാറിൽ നിന്ന് ഇറങ്ങി.

” വാ ലക്ഷ്മീ ”

ഞാനവളുടെ കയ്യിൽ പിടിച്ചു കൊണ്ട് നടന്ന് ആ അസ്ഥി തറകൾക്ക് മുന്നിൽ എത്തി.

” അച്ഛാ , അമ്മേ ഇതാണ് നിങ്ങളുടെ മരുമകൾ അല്ല മകൾ . മനു ഇതാണ് നിന്റെ ഏട്ടത്തി … ”

അതൊക്കെ ഞാൻ പറയുമ്പോഴും എന്റെ കണ്ണുകൾ നിറഞ്ഞിരുന്നു. ഒരു നിമിഷം അവിടെ നിന്ന് ഞാനും ലക്ഷ്മിയും പ്രാർത്ഥിച്ച ശേഷം ഞങ്ങൾ തിരികെ വീടിനുള്ളിലേക്ക് നടന്നു . ആന്റി കൊണ്ടു കൊടുത്ത നിലവിളക്കുമായി ലക്ഷ്മി വലതുകാൽ വച്ച് എന്റെ വീട്ടിലേക്ക് കയറി …

” എന്തെങ്കിലും ആവശ്യമുണ്ടെങ്കിൽ വിളിക്കണേ ”

എന്നു പറഞ്ഞ ശേഷം വിനോദും അവന്റെ കുടുംബവും അവന്റെ വീട്ടിലേക്ക് പോയി. എന്റെ വീട്ടിൽ ഞാനും ലക്ഷ്മിയും മാത്രമായി .

ബാഗിൽ കൊണ്ടുവന്ന ഡ്രസ് ഒക്കെ അലമാരയിൽ എടുത്ത് വച്ചുകൊണ്ട് നിന്ന ലക്ഷ്മിയെ ഞാൻ പുറകിലൂടെ ചെന്ന് കെട്ടിപ്പിടിച്ചു. അവൾ നാണം കൊണ്ട് എന്റെ കയിൽ കിടന്ന് പുളയുകയാണ് .

” എന്താ ഹരിയേട്ടാ ഇത് ”

അവൾ നാണം കലർന്ന സ്വരത്തിൽ എന്നോട് ചോദിച്ചു.

” ലക്ഷ്‌മി ഇന്നലെ ഞാൻ അങ്ങനെ പറഞ്ഞപ്പോൾ ശ്രദ്ധിച്ചു തന്റെ മുഖത്ത് കൂടി മിന്നിമാഞ്ഞ് പോയ സങ്കടഭാവം . ഇന്ന് തന്നെ ഞാൻ തന്റെ സങ്കടം മാറ്റിത്തരാം . ”

ഞാനതും പറഞ്ഞ് ലക്ഷ്മിയെയും കൊണ്ട് കട്ടിലിലേക്ക് മറിഞ്ഞു . ഞാൻ എന്റെ കയ്യിൽ അവളുടെ മുഖം കോരി എടുത്തപ്പോൾ ഏതോ ഒരു വികാരത്താൽ അവൾ എന്നെ നോക്കുകയാണ് . രാത്രിയുടെ ആ കൂരിരുട്ടിൽ എപ്പോഴോ ഞങ്ങൾ ഒന്നായി ചേർന്നു .

അങ്ങനെ ചില ദിവസങ്ങൾ കടന്നുപോയി. ജീവിതം എന്താണെന്ന് അറിഞ്ഞ് ജീവിക്കാൻ ഞാൻ തുടങ്ങി . ലക്ഷ്മിയുമൊത്തുള്ള സന്തോഷ ജീവിതം .

ഒരു ദിവസം ഞാൻ കാണുന്നത് സങ്കടപ്പെട്ട് ഇരിക്കുന്ന ലക്ഷ്മിയുടെ മുഖമാണ്.

” എന്താ ലക്ഷ്മി… എന്തു പറ്റി എന്തിനാ താൻ സങ്കടപ്പെടുന്നേ….”

” അല്ല , അടുത്ത ആഴ്ച ചേട്ടൻ ലണ്ടനിലേക്ക് പോവല്ലേ അതാലോചിച്ചപ്പോൾ . ചേട്ടൻ പോണ്ട എനിക്ക് ചേട്ടനെ പിരിഞ്ഞിരിക്കാൻ പറ്റില്ല … ”

അതുപറഞ്ഞപ്പോഴേക്കും ലക്ഷ്മിയുടെ കണ്ണുകൾ നിറഞ്ഞിരുന്നു .

” പോണം മോളൂ ….. ജീവിക്കാൻ ഒരു ജോലി കൂടിയേ തീരു … പിന്നെ പിരിഞ്ഞിരിക്കുന്നതിൽ ഉള്ള സങ്കടം . എനിക്ക് തന്നെ പിരിഞ്ഞ് ഇരിക്കാൻ പറ്റുമെന്ന് തോന്നുണ്ടോ . അതുകൊണ്ട് ഞാൻ ഒറ്റയ്ക്കല്ല താനും എന്റെ ഒപ്പം ഉണ്ടാകും. ”

” സത്യമാണോ , പക്ഷെ എങ്ങനെ ? ”

ഒരു ആശ്ചരാത്തോടെ ലക്ഷ്മി എന്നോട് ചോദിച്ചു.

” അന്ന് തന്റെ വീട്ടിൽ പെണ്ണ് കാണാൻ വന്നില്ലേ അന്ന് തന്റെ അച്ഛനോട് പറഞ്ഞ് തന്റെ പാസ്പോർട്ട് ഞാൻ മേടിച്ചിരുന്നു പിന്നെ വിസ കിട്ടാൻ വലിയ പാടില്ലായിരുന്നു . ”

ഞാനതു പറഞപ്പോഴേക്കും അവൾ എന്റെ കഴുത്ത് വരിഞ്ഞു മുറുക്കിയിരുന്നു . അവളുടെ മുഖം ഞാൻ കയിലെടുത്ത് നെറ്റിയിൽ ഒരു മുത്തം സമ്മാനിച്ചു .

” പിണക്കം മാറിയല്ലോ . ”

” മമ് .”

അത് പറഞ്ഞപ്പോൾ അവളുടെ മുഖം സന്തോഷം കൊണ്ട് ചുവന്നിരുന്നു .

ലക്ഷ്മിയുടെ വീട്ടിൽ പോയി അവരോടൊക്കെ യാത്ര പറഞ്ഞ് ഞങ്ങൾ അങ്ങനെ ജീവിതത്തിന്റെ മറ്റൊരു ദിശയിലേക്കുള്ള ചിറകിൽ കയറി . ജീവിതത്തിൽ അന്നായിരുന്നു ഞാൻ വിമാനയാത്ര ആസ്വദിച്ചത് അവളുടെ കയ്യും പിടിച്ച് .

ജീവിതത്തിൽ സന്തോഷം മാത്രം നിറഞ്ഞ് നിന്നു അങ്ങനെ ദിവസങ്ങൾ കടന്നു പോയി . ലണ്ടനിൽ ജോലിയുടെ തിരക്കുകളിൽ മാത്രം മുൻപ് ജീവിച്ചിരുന്നഞാൻ ലക്ഷ്മി വന്നതോടെ പൂർണ്ണമായും മാറി. ഒരു ദിവസം പുറത്ത് കറങ്ങാനായി പോയപ്പോൾ ഒരു കോഫിഷോപ്പിൽ വച്ച് അവൾ തലകറങ്ങി വീണു . ആശുപത്രിയിൽ എത്തിച്ചപ്പോൾ ഞങ്ങളുടെ ജീവിതത്തിലേക്ക് ഒരു പുതിയ അതിത്ഥി കടന്നുവരാൻ പോകുന്നു എന്ന സന്തോഷ വാർത്ത ലഭിച്ചു.

ആ വാർത്ത അറിഞ്ഞ അവളുടെ മുഖം ഏറ്റുവും സന്തോഷം നിറഞ്ഞ രീതിയിൽ ആയിരുന്നു

മാസങ്ങൾ കടന്നു പോയി . അവളുടെ ഡെലിവറി നാട്ടിൽ വച്ച് നടത്തണം എന്ന ലക്ഷ്മിയുടെ ആഗഹത്തിന് വേണ്ടി ലോങ് ലീവ് എടുത്ത് ഞാനും ലക്ഷ്മിയും അങ്ങനെ തിരിച്ച് നാട്ടിലേക്ക് പോന്നു ..

………………………

” ലക്ഷ്മിയുടെ കൂടെ ആരാ വന്നിട്ടുള്ളത് . ”

രണ്ടാമത്തെ നിലയിൽ നിന്നുള്ള നഴ്സിന്റെ ആ ശബ്ദം എന്റെ ഓർമ്മകളെ ചീന്തി എറിഞ്ഞ് വർത്തമാന കാലത്തിലേക്ക് തിരിച്ച് കൊണ്ട് വന്നു .

ആ ശബ്ദം കേട്ടതും ഞാൻ രണ്ടാമത്തെ നിലയിലേക്കുള്ള സ്റ്റെപ്പ് വേഗം ഓടി കയറി ..

” ആൺകുട്ടിയാണ് , ലക്ഷ്മി സുഖമായിരിക്കുന്നു .”

ആ നഴ്സ് അതും പറഞ്ഞ് കുഞ്ഞിനെ എന്റെ കയ്യിലേക്ക് തന്നു .

” കുഞ്ഞിനിടാൻ പേര് വല്ലതും കണ്ട് വച്ചിട്ടുണ്ടോ ബർത്ത് സർട്ടിഫിക്കറ്റിന് എഴുതി

കൊടുക്കനാണ്. ”

” മനു ”

നഴ്സ് ചോദിച്ച ചോദ്യത്തിന് എന്റെ വായിൽ നിന്ന് വന്ന പേര് അതായിരുന്നു .

സങ്കടങ്ങൾ തിരമാലകൾ പോലെ വന്നാലും ആ തിരകൾ ഒരിക്കൽ ശാന്തമാകുക തന്നെ ചെയ്യും.

ശുഭം